- ఎట్టకేలకు మీడియా ముందుకు వచ్చిన కేసీఆర్
- మళ్లీ ప్రజల్లోకి కేసీఆర్..సంబరాలు చేసుకుంటున్న పార్టీ శ్రేణులు
- సీఎం రేవంత్ జిల్లా నుండే కేసీఆర్ పోరాటం
KCR : చాలా కాలం తర్వాత మీడియా ముందుకు వచ్చిన మాజీ ముఖ్యమంత్రి, బీఆర్ఎస్ అధినేత కేసీఆర్ తనదైన శైలిలో విమర్శల విల్లు ఎక్కుపెట్టారు. దాదాపు గంటన్నర పాటు సాగిన ఆయన ప్రసంగం అటు కేంద్రంలోని బీజేపీని, ఇటు రాష్ట్రంలోని కాంగ్రెస్ ప్రభుత్వాన్ని ఏకకాలంలో టార్గెట్ చేసారు. ముఖ్యంగా ఏపీ సీఎం చంద్రబాబు నాయుడుతో రేవంత్ రెడ్డి ప్రభుత్వం కుమ్మక్కై తెలంగాణ నీటి వాటాను తాకట్టు పెడుతోందని ఆయన చేసిన ఆరోపణలు రాజకీయ ప్రకంపనలు సృష్టిస్తున్నాయి. “తెలంగాణ నీళ్లను దోచుకుంటుంటే చూస్తూ ఊరుకోనని, ప్రజల పక్షాన పోరాడేందుకు తానే స్వయంగా రంగంలోకి దిగుతానని” ఆయన ప్రకటించడం ద్వారా తన రాజకీయ పునరాగమనంపై స్పష్టమైన సంకేతాలిచ్చారు.
Kcr Pm
అయితే, కేసీఆర్ ముందున్న మొదటి మరియు అత్యంత వ్యక్తిగతమైన సవాలు తన కుమార్తె కవితకు సంబంధించిన వ్యవహారం. ఢిల్లీ మద్యం పాలసీ కేసులో కవిత అరెస్ట్ కావడం, ఆ తర్వాత ఆమె పార్టీలోని ఇతర ముఖ్య నేతలపై (కేటీఆర్ వంటి వారిపై) పరోక్షంగా చేస్తున్న వ్యాఖ్యలు లేదా ఆరోపణలు పార్టీలో అంతర్గత కలకలానికి దారితీస్తున్నాయి. ప్రత్యర్థులు సైతం “ఇంటిని చక్కదిద్దుకోలేని వారు రాష్ట్రాన్ని ఏం కాపాడతారు?” అంటూ విమర్శలు గుప్పిస్తున్నారు. ఈ తరుణంలో కవిత విషయంలో పార్టీ వైఖరిని స్పష్టం చేస్తూనే, కుటుంబం మరియు పార్టీ కేడర్లో నెలకొన్న గందరగోళాన్ని తొలగించి, వారిని ఏకతాటిపైకి తీసుకురావడం కేసీఆర్కు కత్తిమీద సాము లాంటిదే.
ఇక రెండో ప్రధాన సవాలు అసెంబ్లీలో ఆయన ఉనికి. ప్రతిపక్ష నేత హోదాలో ఉండి కూడా అసెంబ్లీకి రావడం లేదని సీఎం రేవంత్ రెడ్డి మరియు కాంగ్రెస్ మంత్రులు నిత్యం కేసీఆర్ను ఎద్దేవా చేస్తున్నారు. కేవలం మీడియా సమావేశాలకే పరిమితం కాకుండా, ప్రజా సమస్యలపై అసెంబ్లీ వేదికగా ప్రభుత్వాన్ని నిలదీయగలరా? అన్నది ఇప్పుడు మిలియన్ డాలర్ల ప్రశ్న. బయటకు వచ్చి ప్రజల్లోకి వెళ్తానని చెబుతున్న కేసీఆర్, సభలో అడుగుపెట్టి రేవంత్ రెడ్డి విమర్శలకు ధీటైన సమాధానం ఇస్తారా లేదా అన్నది ఆసక్తికరంగా మారింది. ఈ రెండు సవాళ్లను ఆయన ఎలా అధిగమిస్తారనే దానిపైనే బీఆర్ఎస్ భవిష్యత్తు మరియు తెలంగాణలో ఆ పార్టీ పుంజుకునే అవకాశాలు ఆధారపడి ఉన్నాయి.