తెలంగాణాలో అధికారమే లక్ష్యంగా ముందుకు వెళ్తున్న కాంగ్రెస్ పార్టీ సమీక్ష చేసుకోవడంతో పాటు భవిష్యత్తు ప్రణాళిక రూపొందించడానికి హైదరాబాద్ లోని కీసరలో రెండు రోజుల పాటు నవసంకల్ప్ చింతన్ శిబిర్ సమావేశాలు నిర్వహిస్తోంది.
పార్టీ బలోపేతం, ఎన్నికల్లో వ్యవహరించాల్సిన వ్యూహాలపై ఈ సమావేశంలో చర్చించే అవకాశం ఉంది. కీసరలోని బాలవికాస్ వేదికగా, జూన్‌ 1, 2 తేదీల్లో తెలంగాణ కాంగ్రెస్ నవసంకల్ప్ చింతన్ శిబిర్ సమావేశాలు నిర్వహించనున్నట్లు సీఎల్పీ నేత బట్టి విక్రమార్క ప్రకటించారు.
కాంగ్రెస్ అధ్యక్షుడు రేవంత్ రెడ్డి అమెరికా పర్యటనలో ఉండడంతో, అధ్యక్షుడు లేకుండానే ఈ సమావేశాలు జరగనున్నాయి. ఈ సమావేశాల నిర్వహణ కమిటీకి చైర్మన్ గా సీఎల్పీ నేత భట్టి విక్రమార్క వ్యవహరించగా మరో 33 మంది సభ్యులుగా ఉన్నారు. ఈ సమావేశాలకు మొత్తం 108 మందిని ఆహ్వానించారు. ఈ సమావేశాలకు ముఖ్య అతిధిగా ఏఐసీసీ ప్రధాన కార్యదర్శి కేసి వేణుగోపాల్ హాజరు కానున్నారు.
ఈ సమావేశాల్లో ఆరు అంశాలపై, ఆరు కమిటీలను ఏర్పాటు చేయనున్నారు. వారి అభిప్రాయాలు తీసుకొని, మిగతా నేతలతో చర్చించి పలు అంశాలపై కాంగ్రెస్ ఒక పాలసీని రూపొందించుకోనుంది.
ఇటీవల కాంగ్రెస్ జాతీయ కమిటీ రాజస్థాన్ లో చేసిన చింతన్ శిబిర్‌లో చేసిన తీర్మానాలను ఈ సమావేశంలో ఆమోదించడంతోపాటు, రాష్ట్ర స్థాయి అంశాలు, సమస్యలపై రోడ్ మాప్‌ను సిద్ధం చేయనున్నట్లు కాంగ్రెస్ నేతలు తెలిపారు. రెండు రోజుల పాటు జరిగే ఈ కార్యక్రమంలో, మొదటి రోజు మొత్తం చర్చ ఉంటుంది. రెండోరోజు ప్రకటనలు, తీర్మాణాల ఆమోదం ఉంటుందని కమిటీ చైర్మన్ బట్టి తెలిపారు.