Hussain Sagar: నగరంలో వర్షం దంచికొట్టింది. దాదాపు మూడు గంటల పాటు కుండపోత వర్షం కురవడంతో నగరం అస్తవ్యస్తంగా మారింది. దీంతో వాతావరణ శాఖ హెచ్చరికలు జారీ చేసింది. అటు జీహెచ్ఎంసీ కూడా ప్రజలకు సూచనలు చేసింది. అత్యవసరమేతేనే తప్ప నగర వాసులు బయటకు రావొద్దని సూచించింది. మరోవైపు నగరంలో కురిసిన భారీ వర్షాలకు హుస్సేన్ సాగర్ నిండుకుండలా మారింది. భారీ వర్షపాతం నమోదు కావడంతో హుస్సేన్ సాగర్ కు జలకళ సంతరించుకుంది.
గత రెండు రోజులుగా కురుస్తున్న వర్షాలకు హైదరాబాద్ నడిబొడ్డున ఉన్న హుస్సేన్ సాగర్ సరస్సు ఫుల్ ట్యాంక్ ను దాటింది. శనివారం నాటికి సరస్సు నీటి మట్టం 513.53 మీటర్లకు చేరుకుంది. ఇది ఎఫ్‌టిఎల్ 513.41 మీటర్లను మించిపోయింది. పెరుగుతున్న నీటి నిర్వహణకు తూము గేట్లను 2 అడుగుల మేర ఎత్తి 12 వెంట్ల ద్వారా నీరు వెళ్లేలా చేశారు.
శనివారం నాటికి హైదరాబాద్ హుస్సేన్ సాగర్ ఇన్ ఫ్లో 2,075 క్యూసెక్కులు ఉండగా, ఔట్ ఫ్లో 1,538 క్యూసెక్కులుగా ఉంది. అత్యధికంగా హిమాయత్‌నగర్‌లో 5.8 మిమీ నమోదైంది. రాష్ట్రం మొత్తం మీద అత్యధికంగా సిద్దిపేట జిల్లాలో 82 మిల్లీమీటర్ల వర్షపాతం నమోదైంది. ఈరోజు తెలంగాణలోని పలు జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు కురుస్తాయని భారత వాతావరణ శాఖ అంచనా వేసింది. హైదరాబాద్‌లో తేలికపాటి నుంచి ఓ మోస్తరు వర్షాలు కురిసే అవకాశం ఉంది.ఈ వర్షాల వల్ల హుస్సేన్ సాగర్‌తోపాటు నగరంలోని ఇతర నీటి వనరులలో నీటి మట్టాలు మరింత పెరిగే అవకాశం ఉంది.
1563లో ఇబ్రహీం కులీ కుతుబ్ షా నిర్మించిన హుస్సేన్ సాగర్ హైదరాబాద్‌లోని ప్రసిద్ధ పర్యాటక ఆకర్షణలలో ఒకటి. ఈ సరస్సుకు మాస్టర్ ఆర్కిటెక్ట్ అయిన హుస్సేన్ షా వలీ పేరు పెట్టారు. ఇది ఉస్మాన్ సాగర్ మరియు హిమాయత్ సాగర్ నిర్మాణానికి ముందు నీటి సరఫరాకు ప్రధాన వనరుగా పనిచేసింది. సరస్సు మధ్యలో ఉన్న బుద్ధ విగ్రహాన్ని 1992లో ఏర్పాటు చేశారు. ఇది ఒక ప్రసిద్ధ పర్యాటక ప్రదేశం కాబట్టి, చాలా మంది సరస్సును ఫుల్ ట్యాంక్ స్థాయిలో వీక్షించేందుకు సందర్శిస్తారు. అయితే నీటి మట్టం ఎక్కువగా ఉన్నప్పుడు సరస్సు వద్ద జాగ్రత్తగా ఉండటం ముఖ్యం.
Also Read: Cholesterol : రోజూ ఉదయాన్నే ఇలా చేస్తే ఒక్క నెలలోనే కొవ్వు కరిగిపోతుంది