- సాహెబ్ నగర్ ప్రభుత్వ భూమి విషయంలో సుప్రీం కీలక ఆదేశం
- అటవీశాఖ కు ప్రభుత్వ భూమి అప్పగింత
- సుప్రీం తీర్పు తో ఊపిరి పీల్చుకున్న తెలంగాణ ప్రభుత్వం
Supreme Court : తెలంగాణ రాష్ట్ర ప్రభుత్వానికి మరియు అటవీ శాఖకు అత్యున్నత న్యాయస్థానం సుప్రీంకోర్టులో భారీ ఊరట లభించింది. రంగారెడ్డి జిల్లా వనస్థలిపురం పరిధిలోని సాహెబ్ నగర్లో ఉన్న సుమారు 102 ఎకరాల విలువైన భూమిపై గత కొంతకాలంగా నెలకొన్న న్యాయ వివాదానికి తెరపడింది. ఈ భూమి ప్రభుత్వానిదేనని, ప్రత్యేకించి అటవీ శాఖకు చెందుతుందని సుప్రీంకోర్టు స్పష్టం చేసింది. రాజధాని హైదరాబాద్కు అతి సమీపంలో, అత్యంత ఖరీదైన ప్రాంతంలో ఉన్న ఈ భూమి అటవీ సంపదగా గుర్తింపు పొందడం పర్యావరణ పరిరక్షణ దృష్ట్యా కూడా కీలక పరిణామంగా భావించవచ్చు.
ఈ వివాదం గతంలో హైకోర్టు వరకు వెళ్లగా, అక్కడ ప్రైవేట్ వ్యక్తులకు అనుకూలంగా తీర్పు రావడం గమనార్హం. సాహెబ్ నగర్లోని ఈ సర్వే నంబర్లకు సంబంధించిన భూమి తమదేనంటూ కొందరు వ్యక్తులు పిటిషన్లు దాఖలు చేయగా, హైకోర్టు వారి వాదనలతో ఏకీభవించింది. అయితే, రాష్ట్ర ప్రభుత్వం పట్టువదలక ఈ భూమిని అటవీ భూమిగా నిరూపించేందుకు అవసరమైన పక్కా ఆధారాలు, చారిత్రక రికార్డులతో సుప్రీంకోర్టును ఆశ్రయించింది. కేసును క్షుణ్ణంగా పరిశీలించిన జస్టిస్ సుధాంశు ధూలియా, జస్టిస్ రాజేష్ బిందాల్లతో కూడిన ద్విసభ్య ధర్మాసనం, హైకోర్టు తీర్పును కొట్టివేస్తూ భూమిపై ప్రభుత్వ హక్కులను ఖరారు చేసింది.
Supreme Court
ఈ తీర్పుతో సుమారు వేల కోట్ల రూపాయల విలువైన ప్రభుత్వ ఆస్తి అన్యాక్రాంతం కాకుండా కాపాడబడింది. న్యాయస్థానం కేవలం తీర్పు ఇవ్వడమే కాకుండా, తదుపరి చర్యల కోసం స్పష్టమైన గడువును కూడా విధించింది. రాబోయే 8 వారాల్లోగా ఈ 102 ఎకరాల భూమిని అటవీ భూమిగా నోటిఫై చేయాలని రాష్ట్ర ప్రభుత్వ ప్రధాన కార్యదర్శిని (CS) ఆదేశించింది. దీనివల్ల భవిష్యత్తులో ఈ భూమిపై ఎలాంటి ఆక్రమణలు జరగకుండా చట్టపరమైన రక్షణ లభిస్తుంది. ప్రభుత్వ భూములను కాపాడటంలో ఈ తీర్పు ఒక మైలురాయిగా నిలుస్తుందని న్యాయ నిపుణులు విశ్లేషిస్తున్నారు.