Holi Celebrations in Hunsa Village : తెలంగాణలోని నిజామాబాద్ జిల్లాలో హోలీ పండుగ వేళ ఒక వింతైన, ఒళ్లు గగుర్పొడిచే సాంప్రదాయం వెలుగులోకి వచ్చింది. సాధారణంగా రంగులు పూసుకుని జరుపుకునే ఈ పండుగను, సాలూర మండలం హున్సా గ్రామస్థులు మాత్రం రక్తం చిందించేలా ‘పిడిగుద్దుల’ ఆటతో జరుపుకుంటారు. ఏటా నిర్వహించే ఈ వింత క్రీడలో భాగంగా గ్రామస్థుల మధ్య పిడికిళ్లతో యుద్ధం జరుగుతుంది. తరతరాలుగా వస్తున్న ఈ ఆచారం ప్రకారం, హోలీ రోజున రక్తం చిందితేనే గ్రామానికి శుభం జరుగుతుందని, వర్షాలు బాగా కురిసి పంటలు పండుతాయని ఇక్కడి ప్రజల నమ్మకం.
ఈ వింత ఆచారం వివరాల్లోకి వెళ్తే.. గ్రామంలోని హనుమాన్ దేవాలయం వద్ద సాయంత్రం వేళ జనం రెండు వర్గాలుగా విడిపోతారు. ఒక వర్గం వారు ఒక పొడవైన తాడును గట్టిగా పట్టుకోగా, ఎదుటి వర్గం వారు ఆ తాడును దాటి ముందుకు రావడానికి ప్రయత్నిస్తారు. ఈ క్రమంలో రెండు వర్గాల వారు ఒకరిపై ఒకరు పిడికిళ్లతో దాడులు చేసుకుంటారు. కళ్లు, ముఖం అని తేడా లేకుండా ఒకరినొకరు బలంగా గుద్దుకోవడంతో చాలా మందికి గాయాలవుతాయి, రక్తం కూడా వస్తుంది. ఈ పిడిగుద్దులాట చూస్తున్నంత సేపు యుద్ధ వాతావరణాన్ని తలపిస్తుంది.
అయితే, ఈ క్రీడలో అత్యంత ఆశ్చర్యకరమైన విషయం ఏమిటంటే.. ఎంత భీకరంగా కొట్టుకున్నా, ఆట ముగిసిన వెంటనే వారంతా కరచాలనం చేసుకుని, ఆలింగనం చేసుకుని హోలీ శుభాకాంక్షలు చెప్పుకుంటారు. ఒకరిపై ఒకరు ఎలాంటి కక్షలు, కార్పణ్యాలు పెట్టుకోకుండా కేవలం భక్తిశ్రద్ధలతో, గ్రామ సంప్రదాయం కోసం ఈ పని చేస్తామని వారు చెబుతున్నారు. దీనికి సంబంధించిన వీడియోలు ప్రస్తుతం సోషల్ మీడియాలో వైరల్ అవుతుండటంతో, ఈ ‘బ్లడీ హోలీ’ (Bloody Holi) గురించి తెలుసుకుని నెటిజన్లు విస్తుపోతున్నారు.