ఓ యువకుడి స్పీడ్ మోజు చివరకు కటకటాలపాలు చేసింది. నగరంలోని ఔటర్ రింగ్ రోడ్ (ORR)పై గంటకు 200 కిలోమీటర్లకు పైగా వేగంతో కారు నడిపి, ఆ వీడియోను సోషల్ మీడియాలో పోస్ట్ చేయడంతో పోలీసులు కేసు నమోదు చేసి అరెస్టు చేశారు. ఈ ఘటన మే 19న జరిగినప్పటికీ వీడియో సోషల్ మీడియాలో వైరల్ కావడంతో పోలీసులు విచారణ చేపట్టారు. విచారణలో నిందితుడు అల్కాపూర్కు చెందిన శ్రీకరింగుల సాయిరామ్గా గుర్తించారు. నర్సింగి టోల్గేట్ నుంచి అప్పా జంక్షన్ వైపు సుమారు గంటకు 200 కిలోమీటర్ల వేగంతో కారు నడిపినట్లు పోలీసులు వెల్లడించారు. సోషల్ మీడియాలో షేర్ చేసిన వీడియోలో సాయిరామ్ ప్రమాదకరంగా అతివేగంతో వాహనం నడుపుతూ కనిపించాడు. టోల్ టికెట్ తీసుకున్న అనంతరం కారుని 200 కిమీ వేగంతో డ్రైవ్ చేశాడు. డ్రైవ్ చేసే టప్పుడు కారులో సాంగ్స్ పెద్ద సౌండ్ పెట్టుకుని డ్రైవ్ చేశాడు.
ఈ వీడియోను అతను తన సోషల్ మీడియా హ్యాండిల్ **”runningeagle310″**లో పోస్ట్ చేశాడు. సోషల్ మీడియా వీడియో ఆధారాల ఆధారంగా పోలీసులు సాయిరామ్ను అరెస్టు చేసి, అతని కారును స్వాధీనం చేసుకున్నారు. ప్రజల భద్రతకు ప్రమాదం కలిగించేలా వ్యవహరించినందుకు అతనిపై కేసు నమోదు చేసినట్లు పోలీసులు తెలిపారు. అయితే అతను 200 కి.మీ వేంగంతో డ్రైవ్ చేస్తూ సోషల్ మీడియాలో పెట్టేదాకా పోలీసులకు తెలియకపోవడంపై నెటిజన్లు ఆగ్రహం వ్యక్తం చేస్తున్నారు. ఓఆర్ఆర్పై స్పీడ్ గన్లు ఎమైయ్యాయని నెటిజన్లు ప్రశ్నిస్తున్నారు. వరుస ప్రమాదాలు జరుగుతున్నా ఔటర్ రింగ్ రోడ్ పై పోలీసుల నిఘా లేకపోవడం ఆందోళన కలిగించేలా ఉందని వాహనదారులు, నెటిజన్లు ఆగ్రహం వ్యక్తం చేస్తున్నారు.