. మేడారం మహా జాతరకు ప్రభుత్వం విస్తృత ఏర్పాట్లు
. అమ్మవార్ల గద్దెల పునరుద్ధరణకు సీఎం చేతుల మీదుగా ప్రారంభం
. భక్తులతో కిటకిటలాడుతున్న మేడారం
Madaram : తెలంగాణలో అతిపెద్ద గిరిజన పండుగగా పేరొందిన మేడారం మహా జాతరకు రాష్ట్ర ప్రభుత్వం ఘనంగా ఏర్పాట్లు చేస్తోంది. ఈ నెల 18న ముఖ్యమంత్రి రేవంత్ రెడ్డి మేడారం వెళ్లనుండగా, జనవరి 28 నుంచి 31 వరకు జరగనున్న మహా జాతరకు అన్ని శాఖలు సమన్వయంతో పనులు నిర్వహిస్తున్నాయి. అమ్మవార్ల గద్దెల పునరుద్ధరణ, భక్తులకు మౌలిక వసతుల కల్పన, భద్రతా చర్యలు వంటి అంశాలపై ప్రభుత్వం ప్రత్యేక దృష్టి సారించింది. ఇప్పటికే మేడారం పరిసర ప్రాంతాల్లో రహదారులు, తాగునీటి సరఫరా, వైద్య సేవలు, పారిశుధ్య ఏర్పాట్లు వేగంగా కొనసాగుతున్నాయి. మేడారం మహా జాతరలో ప్రధాన ఆకర్షణగా నిలిచే అమ్మవార్ల గద్దెల పునరుద్ధరణ కార్యక్రమం ఈ నెల 19న జరగనుంది.
ఈ కార్యక్రమాన్ని ముఖ్యమంత్రి రేవంత్ రెడ్డి స్వయంగా ప్రారంభించనున్నారు. ఈ వేడుకకు ఉప ముఖ్యమంత్రి మల్లు భట్టివిక్రమార్కతో పాటు పలువురు మంత్రులు, ప్రజాప్రతినిధులు హాజరు కానున్నారు. వేలాది మంది భక్తులు నిలువెత్తు బంగారంతో మొక్కులు చెల్లించే ఈ పవిత్ర ప్రాంతంలో సంప్రదాయాలకు అనుగుణంగా పునరుద్ధరణ పనులు చేపడుతున్నారు. భక్తుల రద్దీ దృష్ట్యా గద్దెల వద్ద సౌకర్యవంతమైన దర్శన ఏర్పాట్లు, క్యూలైన్లు, సమాచారం అందించే కేంద్రాలు ఏర్పాటు చేస్తున్నారు. ఇదిలా ఉండగా, మేడారం మహా జాతరకు ముఖ్యమంత్రి, ఉప ముఖ్యమంత్రి, సభాపతి, ఇతర మంత్రులకు అధికారిక ఆహ్వానాలు అందాయి. అసెంబ్లీలో మంత్రులు సీతక్క, కొండా సురేఖ, అడ్లూరి లక్ష్మణ్ స్వయంగా ఆహ్వాన పత్రికలను అందజేశారు. మేడారం ప్రాంత అభివృద్ధికి ప్రభుత్వం రూ.230 కోట్ల నిధులను కేటాయించడం విశేషం. ఈ నిధులతో శాశ్వత మౌలిక వసతులు, రహదారులు, విద్యుత్, తాగునీటి ప్రాజెక్టులు చేపడుతున్నారు.
మేడారంలో ఇప్పటికే భక్తుల రద్దీ కొనసాగుతోంది. ఆదివారం సెలవు దినం కావడంతో తెలంగాణతో పాటు ఆంధ్రప్రదేశ్, ఛత్తీస్గఢ్, మహారాష్ట్ర రాష్ట్రాల నుంచి సుమారు రెండు లక్షల మంది భక్తులు తరలివచ్చారు. జంపన్న వాగులో పుణ్యస్నానాలు ఆచరించిన భక్తులు, జంపన్న, నాగులమ్మకు ముడుపులు కట్టి తమ భక్తిని చాటుకున్నారు. గద్దెల వద్ద పసుపు, కుంకుమ సారె సమర్పించి మొక్కులు తీర్చుకున్నారు. భక్తుల సంఖ్య రోజురోజుకూ పెరుగుతుండటంతో పోలీసులు, అగ్నిమాపక శాఖ, వైద్య బృందాలు అప్రమత్తంగా ఉన్నాయి. ఎలాంటి అవాంఛనీయ సంఘటనలు జరగకుండా పటిష్టమైన భద్రతా ఏర్పాట్లు చేశారు. మేడారం మహా జాతరను విజయవంతంగా నిర్వహించేందుకు ప్రభుత్వం, అధికారులు, స్థానికులు సమిష్టిగా కృషి చేస్తుండగా, భక్తుల విశ్వాసం, సంప్రదాయాల మధ్య ఈ జాతర మరింత వైభవంగా జరగనుందని అందరూ ఆశిస్తున్నారు.