CM Revanth Reddy : తెలంగాణ ముఖ్యమంత్రి రేవంత్ రెడ్డి నీటి పారుదల శాఖ ఉన్నతాధికారులతో కీలక సమావేశం నిర్వహించారు. ఈ సమావేశానికి నీటి పారుదల శాఖ మంత్రి ఉత్తమ్ కుమార్ రెడ్డి, రాష్ట్ర ప్రభుత్వ సలహాదారు (నీటి పారుదల శాఖ) ఆదిత్యనాథ్ దాస్ హాజరయ్యారు. ఈ సందర్భంగా ముఖ్యమంత్రి పలు కీలక ఆదేశాలను జారీ చేశారు.
పోలవరం ప్రభావంపై ఐఐటీ హైదరాబాద్ నివేదిక
పోలవరం ప్రాజెక్టు నిర్మాణం వల్ల తెలంగాణపై పడే ప్రభావాన్ని అంచనా వేయడానికి ఐఐటీ హైదరాబాద్ టీమ్ ద్వారా సమగ్ర నివేదిక తయారు చేయాలని సీఎం రేవంత్ రెడ్డి అధికారులను ఆదేశించారు. “ఈ నివేదికను నెల రోజుల్లోగా సిద్ధం చేయాలి,” అని స్పష్టం చేశారు. ఐఐటీ టీంతో సమన్వయం కోసం ప్రత్యేక అధికారిని నియమించాలని సూచించారు. ప్రాజెక్టు వల్ల భద్రాచలం దేవాలయానికి, పరిసర ప్రాంతాల భద్రతకు ఎదురయ్యే ముప్పును విశ్లేషించేలా సమగ్ర అధ్యయనం చేపట్టాలని ఆదేశించారు.
భద్రాచలం వరదలపై చర్చ
2022లో భద్రాచలం ప్రాంతం 27 లక్షల క్యూసెక్కుల వరద నీటితో ముంపునకు గురైనట్లు అధికారులు వివరించారు. ఈ ఘటన నుంచి సాధ్యమైనంత వరకు భద్రాచలం రక్షణకు చర్యలు తీసుకోవాల్సిన అవసరాన్ని సీఎం రేవంత్ చర్చించారు. ఆంధ్రప్రదేశ్ ప్రభుత్వం ఇటీవల ప్రారంభించిన గోదావరి బనకచర్ల ప్రాజెక్టు అంశం ప్రస్తావనకు వచ్చింది. ఆంధ్రప్రదేశ్ ప్రభుత్వం ఈ ప్రాజెక్టుపై పవర్ పాయింట్ ప్రజెంటేషన్ ఇచ్చిందని, ఇది వరద జలాల ఆధారంగా నిర్మాణం కావాలని, అయితే అనుమతులు లేకుండా నిర్మాణం చేపట్టినట్లు అధికారులు సీఎంకు వివరించారు.
రాష్ట్ర ప్రయోజనాల పరిరక్షణపై సీఎం ఆదేశాలు
ఈ అంశంపై సీఎం రేవంత్ రెడ్డి ఆగ్రహం వ్యక్తం చేశారు. “తెలంగాణ ప్రభుత్వ అభ్యంతరాలను ఏపీ ప్రభుత్వ ప్రధాన కార్యదర్శికి స్పష్టంగా తెలియజేయాలి. అవసరమైతే గోదావరి రివర్ మేనేజ్‌మెంట్ బోర్డుతో పాటు కేంద్ర జలశక్తి మంత్రిత్వ శాఖకు లేఖలు రాయాలి,” అని అధికారులను ఆదేశించారు.
తెలంగాణ ప్రాజెక్టుల రక్షణకు చర్యలు
రాష్ట్రంలోని ప్రాజెక్టుల రక్షణ, ప్రాధాన్యత కోసం సీఎం రేవంత్ పలు కీలక నిర్ణయాలు తీసుకున్నారు. “ప్రతి ప్రాజెక్టుపై వ్యూహాత్మకంగా అధ్యయనం చేయాలి. ప్రాజెక్టుల రక్షణతోపాటు, నీటి పారుదల వ్యవస్థల పునర్నిర్మాణానికి ప్రాధాన్యత ఇవ్వాలి,” అని ముఖ్యమంత్రి స్పష్టం చేశారు. రాష్ట్ర ప్రాజెక్టుల భద్రత, ప్రాధాన్యతపై తెలంగాణ ప్రభుత్వ దృఢనిశ్చయాన్ని ప్రతిబింబించింది. సీఎం రేవంత్ రెడ్డి నేతృత్వంలో తెలంగాణ తన నీటి పారుదల హక్కులను నిలబెట్టుకునే క్రమంలో ఆచరణాత్మక చర్యలు తీసుకుంటోంది.
700 Women Extortion: ‘అమెరికా మోడల్‌‌ను’ అంటూ.. 700 మంది అమ్మాయిలకు కుచ్చుటోపీ