Revanth On Budget: కేంద్ర బడ్జెట్ లో తెలంగాణకు తీవ్ర ఆన్యాయం జరిగిందని కేంద్ర ప్రభుత్వంపై ఆగ్రహం వ్యక్తం చేశారు తెలంగాణ సీఎం రేవంత్ రెడ్డి. మంగళవారం హైదరాబాద్లోని తన నివాసంలో మీడియాతో మాట్లాడిన రేవంత్.. ఏపీ పునర్వ్యవస్థీకరణ చట్టంలో రాష్ట్రానికి హామీ ఇచ్చిన ప్రాజెక్టులకు నిధులు ఇవ్వకుండా మోదీ తెలంగాణ హక్కులను కాలరాశారని ధ్వజమెత్తారు. కేంద్ర బొగ్గు, గనుల శాఖ మంత్రి కిషన్రెడ్డి మండిపడ్డారు. తెలంగాణకు అన్యాయం జరుగుతున్నప్పుడు కేంద్ర బొగ్గు, గనుల శాఖ మంత్రి కిషన్రెడ్డి మోడీ ముందు బానిసలా తలవంచుకున్నాడని మండిపడ్డారు. రాష్ట్ర ప్రయోజనాలను కాపాడలేకపోతే కిషన్రెడ్డి బాధ్యత వహించి మంత్రి పదవి నుంచి తప్పుకోవాలని సీఎం సూచించారు.
కేంద్ర బడ్జెట్ విధానం చూస్తుంటే రాష్ట్రంపై బీజేపీ వివక్ష మాత్రమే కాదు, తెలంగాణపై కేంద్రం ప్రతీకారం తీర్చుకుంటున్నట్లు కనిపిస్తోంది. మొత్తం బడ్జెట్ ప్రతుల్లో తెలంగాణ అనే పదంపై కేంద్రం నిషేధం విధించినట్లుగా ఒక్క మాట కూడా కనిపించలేదని అసహనం వ్యక్తం చేశారు. తెలంగాణకు కేటాయించని నిధుల అంశంపై బుధవారం అసెంబ్లీలో చర్చ చేపట్టాలని శాసనసభా వ్యవహారాల మంత్రి డి.శ్రీధర్బాబును ఆదేశించిన రేవంత్రెడ్డి, మోడీకి తొత్తుగా లేకుంటే బిఆర్ఎస్ అధినేత కేసీఆర్ కూడా చర్చకు రావాలని ఆహ్వానించారు.
బీజేపీ చెప్పుకునే “సబ్కా సాథ్ సబ్కా వికాస్” నినాదాన్ని బూటకమని పేర్కొన్న ముఖ్యమంత్రి, 2047 నాటికి విక్షిత్ భారత్ గురించి కేంద్రం చేస్తున్న వాదనలలో తెలంగాణ భాగం కాదా అని ప్రశ్నించారు. భారతదేశం 5 ట్రిలియన్ డాలర్ల ఆర్థిక వ్యవస్థగా ఎదగాలన్నది బీజేపీ లక్ష్యం నిజమైతే, దేశంలోని ఐదు ప్రధాన నగరాల్లో హైదరాబాద్ ఒకటని అర్థం చేసుకోవాలని గుర్తు చేశారు. మెట్రో రైలు విస్తరణ, ప్రాంతీయ రింగ్రోడ్డు (ఆర్ఆర్ఆర్), మూసీ రివర్ ఫ్రంట్ అభివృద్ధి, ఐటీఐఆర్ కారిడార్ ఏర్పాటుతో రాష్ట్రంలో అభివృద్ధి మరియు పెట్టుబడులు వస్తాయని అన్నారు. తద్వారా యువతకు ఉద్యోగావకాశాలు లభిస్తాయి. కానీ ఈ ప్రాజెక్టులపై ఎలాంటి చర్చ జరగలేదు మరియు నిధులు కేటాయించలేదు అని సీఎం పేర్కొన్నారు.
ఏపీ పునర్వ్యవస్థీకరణ చట్టాన్ని సాకుగా చూపి ఏపీలో రాజధాని అమరావతి నిర్మాణం, పోలవరం ప్రాజెక్టు, వెనుకబడిన జిల్లాలకు కేంద్ర బడ్జెట్లో నిధులివ్వడాన్ని వ్యతిరేకించడం లేదని స్పష్టం చేశారు. అయితే తెలంగాణకు ఎందుకు ఇవ్వలేదని సీఎం రేవంత్రెడ్డి కేంద్రాన్ని సూటిగా ప్రశ్నించారు. 18 సార్లు ఢిల్లీ వెళ్లి కేంద్రాన్ని నిధులు కోరానని గుర్తు చేసిన రేవంత్ .. నేనే మూడు సార్లు ప్రధాని మోడీని కలిసి విజ్ఞప్తి చేశానని చెప్పుకొచ్చారు. బడ్జెట్లో వివక్ష లేకుండా నిధులు కేటాయించాలని కోరానని అన్నారు. కానీ, కక్ష పూరితంగా వ్యవహరించిందని బీజేపీ ప్రభుత్వాన్ని విమర్శించారు సీఎం రేవంత్ రెడ్డి.
కేంద్రీయ గిరిజన విశ్వవిద్యాలయం, పాలమూరు-రంగారెడ్డి లిఫ్ట్ ఇరిగేషన్ స్కీమ్ (పీఆర్ఎల్ఐఎస్), బయ్యారం స్టీల్ ప్లాంట్, కాజీపేట కోచ్ ఫ్యాక్టరీ నిర్మాణానికి తెలంగాణకు ఎందుకు నిధులు కేటాయించలేదని ప్రశ్నించారు. తెలంగాణ ప్రజలు లోక్సభ ఎన్నికల్లో బిజెపికి 38 శాతం ఓట్లు ఇచ్చారు. 8 మంది బిజెపి ఎంపీలను ఎన్నుకున్నారు. తద్వారా మోడీ తన ప్రధాని కుర్చీని నిలుపుకున్నారని ఎద్దేవా చేషారు. కాగా రేపు బుధవారం పార్లమెంట్లో తమ నిరసన తెలిపేందుకు తమిళనాడు, కర్ణాటక, ఇతర దక్షిణాది రాష్ట్రాలతో సహా ఇతర పార్టీల ఎంపీల మద్దతును కాంగ్రెస్ ఎంపీలు సేకరిస్తారని ప్రకటించిన రేవంత్, రాష్ట్ర ప్రభుత్వం నిధులను డిమాండ్ చేసి సాధించే ప్రణాళికను సిద్ధం చేసిందని అన్నారు.
Also Read: Nirmala Sitharaman : అమరావతికి రూ.15వేల కోట్ల సాయంపై నిర్మలా సీతారామన్ క్లారిటీ