తెలంగాణ ఎమ్మెల్సీ ఎన్నికల్లో బీజేపీ (BJP) విజయం సాధించడం రాజకీయ వర్గాల్లో చర్చనీయాంశమైంది. ముఖ్యంగా కరీంనగర్ టీచర్స్ ఎమ్మెల్సీగా బీజేపీ మద్దతుదారు మల్క కొమరయ్య (Malka Komaraiah) గెలవడం ఆ పార్టీకి విజయోత్సాహాన్ని తెచ్చిపెట్టింది. ఈ ఫలితంతో బీజేపీ తన రాజకీయ వ్యూహాన్ని మరింత గట్టిగా అమలు చేయబోతోందని స్పష్టమవుతోంది. కేంద్ర హోంశాఖ సహాయ మంత్రి బండి సంజయ్ బీజేపీ విజయం ప్రధాని నరేంద్రమోదీ పట్ల ఉన్న విశ్వాసం వల్లే సాధ్యమైందని వ్యాఖ్యానించారు. ఉపాధ్యాయులు, ఉద్యోగులకు ప్రకటించిన పన్ను మినహాయింపులు కూడా ఈ విజయానికి సహాయపడినట్లు బీజేపీ నేతలు విశ్లేషిస్తున్నారు.
బీఆర్ఎస్ బలహీనత – బీజేపీకి కలిసొచ్చిన అంశాలు
ఈ ఎన్నికల్లో బీఆర్ఎస్ (BRS) పోటీ చేయకపోవడం బిజెపి కి కలిసొచ్చింది. కానీ గతంలో బలమైన ప్రాబల్యం కలిగిన బిఆర్ఎస్ ప్రస్తుతం తెలంగాణలో తన పట్టును కోల్పోతున్న సంకేతాలు కనిపిస్తున్నాయి. జీవో 317 పై ఉపాధ్యాయులు, ఉద్యోగులు అసంతృప్తితో ఉండటం కూడా బీజేపీకి అనుకూలంగా మారింది. ఉపాధ్యాయ సంఘాలు, ఉద్యోగ సంఘాలు గతంలో బీఆర్ఎస్‌కు మద్దతుగా ఉన్నా, ఈసారి బీజేపీ వైపుకు వెళ్లినట్లు స్పష్టమైంది. గతంలో బీఆర్ఎస్ తీసుకున్న కొన్ని నిర్ణయాలు ఉపాధ్యాయులలో వ్యతిరేకతను కలిగించాయని రాజకీయ విశ్లేషకులు భావిస్తున్నారు.
బీజేపీ వ్యూహం – ఉత్తర తెలంగాణలో దూకుడు
బీజేపీ ఉత్తర తెలంగాణలో తన బలాన్ని పెంచేందుకు ప్రత్యేక వ్యూహం అమలు చేస్తోంది. గత అసెంబ్లీ ఎన్నికల్లోనూ ఉత్తర తెలంగాణలో బీజేపీ ప్రభావం కనపడింది. ఇప్పుడు ఎమ్మెల్సీ ఎన్నికల్లోనూ గెలిచి, తన జోరును కొనసాగిస్తోంది. ఉపాధ్యాయులు, ఉద్యోగులు తమ భవిష్యత్తును మోదీ పాలనతో ముడిపెడుతున్నారు. పన్ను మినహాయింపు, ప్రభుత్వ విధానాలు, ఉద్యోగులకు ప్రకటించిన ప్రయోజనాలు బీజేపీకి అనుకూలంగా మారాయి. దీనితో భవిష్యత్‌లో బీజేపీ తెలంగాణ రాజకీయాల్లో మరింత ప్రాబల్యం సంపాదించే అవకాశం ఉందని విశ్లేషకులు భావిస్తున్నారు.
రాబోయే రోజుల్లో రాజకీయ మార్పులు
ఈ ఎన్నికల ఫలితాలు బీఆర్ఎస్‌కు తీవ్ర నష్టం కలిగించే అవకాశముంది. బీఆర్ఎస్ తన బలమైన కోటగా భావించిన నార్త్ తెలంగాణలో కోల్పోతున్న మద్దతును తిరిగి సంపాదించుకోవడానికి ప్రయత్నాలు చేయకపోతే, భవిష్యత్‌లో మరిన్ని పరాజయాలు ఎదుర్కోవాల్సి వస్తుంది.