ప్రపంచంలో స్మార్ట్ ప్రపంచానికి కొత్తదనాన్ని తీసుకువచ్చిన బ్రాండ్ ఏది అనగానే ముందుగా గుర్తుకు వచ్చే పేరు నథింగ్ ఫోన్. సరికొత్త లుక్ లో అత్యాధునిక సాంకేతికతతో ఇది వినియోగదారులకు అందుబాటులోకి వచ్చింది. ఈ బ్రాండ్ నుంచి ఇప్పటికే రెండు స్మార్ట్ ఫోన్లు అందుబాటులోకి వచ్చిన విషయం తెలిసిందే. ఈ ఏడాది మార్చి నెలలో నథింగ్ ఫోన్ 2ఏ ని తీసుకొచ్చింది. అయితే తాజాగా ఇప్పుడు దీనికి అప్ గ్రేడ్ వెర్షన్ ని ప్రకటించింది. నథింగ్ 2ఏ ప్లస్ పేరుతో దీనిని లాంచ్ చేసింది. దీనిలో అప్ గ్రేడ్ అయిన కెమెరా సిస్టమ్, కొత్త డిజైన్, మెరుగైన డిస్ ప్లే, మెరుగైన చార్జింగ్ స్పీడ్ లను కలిగి ఉంటుంది.
కాగా ఈ నథింగ్ ఫోన్ ప్రారంభ దర రూ. 24,999గా ఉంది. మరి ఈ స్మార్ట్ ఫోన్ కి సంబంధించి మరిన్ని వివరాల్లోకి వెళితే.. నథింగ్ ఫోన్ 2ఎ ప్లస్ రెండు ర్యామ్ వేరియంట్ లలో లాంచ్ అయ్యింది. అందులో ఒకటి 8జీబీ, 12జీబీ ర్యామ్ కాగా రెండవది 256 జీబీ స్టోరేజీ వేరియంట్ ఒకటి. అయితే కేవలం ఇండియాలో మాత్రమే రెండు ర్యామ్ సైజ్ లను తీసుకొచ్చింది. యూఎస్, యూకే లలో మాత్రం కేవలం 12జీబీ ర్యామ్ ఫోన్ నే తీసుకొచ్చింది. ఇకపోతే ధర విషయానికి వస్తే.. 8జీబీ ర్యామ్ వేరియంట్ మొదటి రోజు విక్రయానికి మాత్రం రూ. 24,999, దీని తర్వాత ఫోన్ ధర రూ. 27,999 కి పెరుగుతుంది. 12 జీబీ మోడల్ మొదటి రోజు రూ. 26,999 కి అందుబాటులో ఉండగా, తర్వాత రూ. 29,999 కి వస్తుంది.
నథింగ్ ఫోన్ 2ఏ ప్లస్ ఇండియాలోకి ఆగస్టు 7 నుంచి కొనుగోలుకు అందుబాటులో రానుంది. మొదట భారతీయ మార్కెట్లో అందుబాటులోకి వచ్చిన తర్వాత సెప్టెంబర్‌ లో మాత్రమే ఇతర మార్కెట్‌ లకు అందుబాటులో ఉంటుంది. అలాగే నథింగ్ ఫోన్ 2ఏ ప్లస్ స్పెసిఫికేషన్ ల విషయానికి వస్తే.. ఈ ఫోన్లో కొత్త మీడియా టెక్ డైమెన్సిటీ 7350 ప్రో చిప్‌సెట్‌ ను ఉపయోగించింది. గ్రాఫిక్స్ కోసం ఏఆర్ఎం మాలి జీ610 జీపీయూతో కలిసి ఉంటుంది. దీనిలో బ్యాటరీ 5000 ఎంఏహెచ్ ఉంటుంది. 50వాట్ల ఫాస్ట్ చార్జింగ్ సపోర్టుతో వస్తుంది. నథింగ్ ఫోన్ 2ఎ ప్లస్ లోని కెమెరా సిస్టమ్ కూడా అప్‌గ్రేడ్ అయ్యింది. స్మార్ట్‌ఫోన్‌ లో మూడు 50 మెగా పిక్సెల్ కెమెరాలు ఉన్నాయి. ఇందులో ఒకటి సెల్ఫీల కోసం ముందు ఉంటుంది. వెనుక వైపు రెండు ఉన్నాయి.
ఇవి హెచ్డీఆర్ ఫోటో, 4కే వీడియో రికార్డింగ్‌ కు మద్దతు ఇస్తాయి. ఫుల్ హెచ్డీ ప్లస్ 6.7 అంగుళాల అమోల్డ్ డిస్‌ప్లేను కలిగి ఉంటుంది. 1300 నిట్స్ పీక్ బ్రైట్ నెస్ తో వస్తుంది. 120 హెర్జ్ అడాప్టివ్ రిఫ్రెష్ రేట్‌కు సపోర్ట్ చేస్తుంది. 240 హెర్జ్ టచ్ శాంప్లింగ్ రేట్‌ను కలిగి ఉంది. ఇది ఆండ్రాయిడ్ 14 ఆధారంగా రూపొందింది. నథింగ్ ఓఎస్ 2.6 అవుట్ ఆఫ్ ద బాక్స్ తో నడుస్తుంది. 3 సంవత్సరాల సాఫ్ట్‌వేర్ అప్‌డేట్‌లు, 4 సంవత్సరాల సెక్యూరిటీ అప్‌డేట్‌ లను కూడా హామీ ఇస్తుంది. ఈ ఫోన్ చాట్ జీపీటీ ఇంటిగ్రేషన్ తో వస్తుంది.