డిజిటల్ లావాదేవీలు మన రోజువారీ జీవితంలో భాగమైపోయాయి. అందులో ప్రధాన పాత్ర పోషిస్తున్న యాప్‌ ఫోన్‌పే. దేశవ్యాప్తంగా కోట్లాది మంది బ్యాంక్‌ వినియోగదారులు ఫోన్‌పే ద్వారా మనీ ట్రాన్స్‌ఫర్‌, బిల్లులు చెల్లించడం, రీఛార్జ్‌లు వంటి లావాదేవీలు చేస్తున్నారు. అయితే, ఆన్‌లైన్ మోసాలు పెరుగుతున్న నేపథ్యంలో డిజిటల్ భద్రతపై ఆందోళనలు ఎక్కువవుతున్నాయి. ఈ నేపథ్యంలో, ఫిన్‌టెక్ దిగ్గజం ఫోన్‌పే కొత్తగా ‘ఫోన్‌పే ప్రొటెక్ట్’ అనే భద్రతా ఫీచర్‌ను ప్రారంభించింది. ఇది వినియోగదారులను సైబర్‌ మోసాల నుంచి రక్షించడానికి రూపొందించబడింది. అనుమానాస్పద నంబర్లకు డబ్బు పంపే ప్రయత్నం చేసినప్పుడు యూజర్‌ను ముందుగానే హెచ్చరిస్తుంది. దీంతో లావాదేవీల సమయంలో మరింత జాగ్రత్త తీసుకోవడానికి ఇది సహాయపడుతుంది.
Jemimah Rodrigues: జెమిమా రోడ్రిగ్స్‌కు ఉన్న స‌మ‌స్య ఏంటో తెలుసా?
ఈ ఫీచర్‌ టెలికమ్యూనికేషన్స్‌ శాఖ (DoT) అభివృద్ధి చేసిన ఫైనాన్షియల్‌ ఫ్రాడ్‌ రిస్క్‌ ఇండికేటర్‌ (FRI) అనే సాంకేతిక సాధనంతో అనుసంధానించబడింది. DoT గుర్తించిన అనుమానాస్పద నంబర్లకు లావాదేవీలు జరగకుండా ఇది ఆటోమేటిక్‌గా నిరోధిస్తుంది. ఫోన్‌పే సిస్టమ్‌ ఇంటెలిజెన్స్‌ రియల్‌టైమ్‌లో డేటాను విశ్లేషించి, యూజర్‌ ఫ్రాడ్‌ నంబర్‌కు డబ్బు పంపే ప్రయత్నం చేస్తే వెంటనే స్క్రీన్‌పై అప్రమత్తత సందేశం చూపిస్తుంది. ఎక్కువ ప్రమాద స్థాయిలో ఉన్న నంబర్లను లావాదేవీకి అడ్డుకుంటుంది, మధ్యస్థ ప్రమాద నంబర్ల విషయంలో యూజర్‌కు హెచ్చరిక ఇచ్చి నిర్ణయం తీసుకునే అవకాశం ఇస్తుంది. ఈ సాంకేతికత ఫోన్‌పేను దేశంలో DoT-FRI వ్యవస్థను అనుసంధానించిన మొదటి ప్లాట్‌ఫామ్‌గా నిలిపింది.
భారతదేశంలో డిజిటల్ చెల్లింపులు వేగంగా పెరుగుతున్న సమయంలో సైబర్‌ మోసాలపై ఆందోళన కూడా పెరుగుతోంది. ఇలాంటి పరిస్థితుల్లో ఫోన్‌పే ప్రొటెక్ట్ లాంటి సాంకేతిక పరిష్కారం వినియోగదారులకు విశ్వాసాన్ని అందిస్తోంది. కంపెనీ ట్రస్ట్‌ అండ్‌ సేఫ్టీ హెడ్‌ అనుజ్‌ భన్సాలీ మాట్లాడుతూ.. ప్రతి లావాదేవీ సురక్షితంగా జరిగే ఆర్థిక పర్యావరణాన్ని సృష్టించడమే మా లక్ష్యం” అని పేర్కొన్నారు. ఈ సౌకర్యం ద్వారా ఫోన్‌పే డిజిటల్ ఫైనాన్స్‌లో భద్రతా ప్రమాణాలను కొత్త స్థాయికి తీసుకెళ్లింది. 2025 ఇండియా మొబైల్‌ కాంగ్రెస్‌లో ఈ ప్రాజెక్టుకు విస్తృత గుర్తింపు లభించడం, భారత్‌ సైబర్‌ సెక్యూరిటీ రంగంలో ఫోన్‌పేను పయనీకుడిగా నిలిపింది. మొత్తం మీద, ‘ఫోన్‌పే ప్రొటెక్ట్’ భారతీయ డిజిటల్ పేమెంట్‌ వ్యవస్థలో సురక్షిత భవిష్యత్తుకు పునాది వేస్తోంది.