Lords Successful Chase: వరల్డ్ టెస్ట్ ఛాంపియన్‌షిప్ 2023-25 ఫైనల్ లార్డ్స్ (Lords Successful Chase) మైదానంలో జరుగుతోంది. ఆస్ట్రేలియా- దక్షిణాఫ్రికా మధ్య ఫైనల్ మ్యాచ్ నిర్ణాయక దశకు చేరుకుంది. మూడో రోజు ఆట ప్రారంభించిన ఆస్ట్రేలియా తమ రెండవ ఇన్నింగ్స్‌లో 207 పరుగులు చేసి ఆలౌట్ అయింది. దీంతో సౌతాఫ్రికా జట్టుకు 282 పరుగుల విజ‌యలక్ష్యం ల‌భించింది. లార్డ్స్ మైదానంలో నాల్గవ ఇన్నింగ్స్‌లో పెద్ద స్కోరును ఛేజ్ చేయడం అనేది ఎవరెస్ట్ శిఖరాన్ని అధిరోహించడం కంటే కూడా కష్టమైన పనిగా కనిపిస్తుంది. లార్డ్స్ మైదానం గణాంకాల ప్ర‌కారం.. ఫైనల్‌లో దక్షిణాఫ్రికా జట్టు ఎంత స్కోరును ఛేజ్ చేయగలదో తెలుసుకుందాం.
దక్షిణాఫ్రికా ఎంత టార్గెట్‌ను ఛేజ్ చేయగలదు?
లార్డ్స్ మైదానం చరిత్రలో ఇప్పటివరకు విజయవంతంగా ఛేజ్ చేయబడిన అత్యధిక స్కోరు 344 పరుగులు. ఇది 1984లో ఇంగ్లండ్‌పై వెస్టిండీస్ సాధించింది. లార్డ్స్ మైదానంలో 300 పరుగులకు పైగా స్కోరును ఛేజ్ చేసిన ఏకైక జట్టు వెస్టిండీస్. హోస్ట్ ఇంగ్లండ్ కూడా లార్డ్స్ మైదానంలో 300 పరుగులకు పైగా టార్గెట్‌ను ఛేజ్ చేయలేకపోయింది.
1984 తర్వాత లార్డ్స్ మైదానంలో నాల్గవ ఇన్నింగ్స్‌లో ఆడిన విదేశీ జట్టుల పరిస్థితి చాలా దారుణంగా ఉంది. 1984 తర్వాత లార్డ్స్ మైదానంలో అత్యధిక స్కోరును ఛేజ్ చేసిన విదేశీ జట్టు పాకిస్తాన్. ఇది 1992లో ఇంగ్లండ్‌పై 141 పరుగుల టార్గెట్‌ను ఛేజ్ చేసింది. గత 41 సంవత్సరాలుగా లార్డ్స్ మైదానంలో ఏ విదేశీ జట్టూ 150 పరుగుల లక్ష్యాన్ని కూడా సాధించలేకపోయింది.
Also Read: Team India Head Coach: స్వ‌దేశానికి గౌత‌మ్ గంభీర్‌.. టీమిండియాకు తాత్కాలిక హెడ్ కోచ్ ఎవ‌రంటే?
ప్రస్తుతం ఆస్ట్రేలియా మొత్తం లీడ్ 281 పరుగులు ఉంది. 282 పరుగుల లక్ష్యాన్ని సాధించడానికి దక్షిణాఫ్రికా జట్టుకు ఏదో ఒక అద్భుతం అవసరం. పాట్ కమిన్స్, మిచెల్ స్టార్క్, జోష్ హాజెల్‌వుడ్ త్రయం ముందు ఈ లక్ష్యాన్ని సాధించడం టెంబా బవుమా సైన్యానికి అంత సులభం కాదు. ఈ వార్త రాసేస‌మ‌యానికి సౌతాఫ్రికా జట్టు రెండో ఇన్నింగ్స్‌లో 1 వికెట్ న‌ష్టానికి 57 పరుగులు చేసి ప‌టిష్ట స్థితిలో క‌నిపిస్తోంది. క్రీజులో మార్క‌ర‌మ్ (27), ముల్ద‌ర్ (23) పరుగులతో ఉన్నారు.
ఆసీస్ సెకండ్ ఇన్నింగ్స్‌
మూడవ రోజు ఆస్ట్రేలియా తమ ఇన్నింగ్స్‌ను 144/8 స్కోరు నుండి ముందుకు కొనసాగించింది. మిచెల్ స్టార్క్ ఫెవికాల్‌లా క్రీజ్‌పై నిలిచాడు. కానీ మూడో రోజు ఆట ప్రారంభమైన కొద్దిసేపటికే నాథన్ లియాన్ 2 పరుగులు చేసి ఔట్ అయ్యాడు. ఇక్కడి నుండి జోష్ హాజెల్‌వుడ్, మిచెల్ స్టార్క్ దక్షిణాఫ్రికా బౌలర్లకు చెమటలు పట్టించారు. స్టార్క్, హాజెల్‌వుడ్ మధ్య 59 పరుగుల భాగస్వామ్యం నెలకొంది. స్టార్క్ 58 పరుగులతో నాటౌట్‌గా వెనుదిరిగాడు. అటు జోష్ హాజెల్‌వుడ్ 17 పరుగులతో తన వంతు సహకారం అందించి ఔట్ అయ్యాడు. దీంతో ఆసీస్ రెండో ఇన్నింగ్స్‌లో 207 పరుగులకు ఆలౌట్ అయింది.
లార్డ్స్ మైదానంలో ఛేజ్ చేయబడిన 5 అత్యధిక స్కోర్లు
- వెస్టిండీస్ – 344 పరుగులు (వర్సెస్ ఇంగ్లండ్)
- ఇంగ్లండ్ – 282 పరుగులు (వర్సెస్ న్యూజిలాండ్)
- ఇంగ్లండ్ – 279 పరుగులు (వర్సెస్ న్యూజిలాండ్)
- ఇంగ్లండ్ – 218 పరుగులు (వర్సెస్ న్యూజిలాండ్)
- ఇంగ్లండ్ – 193 పరుగులు (వర్సెస్ వెస్టిండీస్)
లార్డ్స్ మైదానంలో విదేశీ జట్టులు ఛేజ్ చేసిన 5 అత్యధిక స్కోర్లు
- వెస్టిండీస్ – 344 పరుగులు (వర్సెస్ ఇంగ్లండ్)
- పాకిస్తాన్ – 141 పరుగులు (వర్సెస్ ఇంగ్లండ్)
- భారత్ – 136 పరుగులు (వర్సెస్ ఇంగ్లండ్)
- ఆస్ట్రేలియా – 131 పరుగులు (వర్సెస్ ఇంగ్లండ్)
- ఆస్ట్రేలియా – 127 పరుగులు (వర్సెస్ ఇంగ్లండ్)