ఈ ఏడాది ఐపీఎల్లో విరాట్ కోహ్లీ గురించి ఆసక్తికరమైన విషయాన్ని ఆఫ్ఘనిస్థాన్ స్టార్ ఆల్రౌండర్ రషీద్ ఖాన్ గుర్తుచేసుకున్నాడు . నెట్స్లో దాదాపు రెండున్నర గంటల పాటు భారత స్టార్ ప్రాక్టీస్ను చూసి తాను షాక్ అయ్యానని చెప్పాడు. రషీద్ గత ఐపీఎల్ సీజన్ లో కొత్త జట్టు గుజరాత్ టైటాన్స్ తరపున ఆడాడు. ఆ జట్టు టైటిల్ నెగ్గడంలో తన వంతు పాత్ర పోషించాడు. ఈ టోర్నీ సందర్భంగా కోహ్లీ గురించి ఒక సంఘటనను అతను గుర్తుచేసుకున్నాడు.
‘ఐపీఎల్ సమయంలో మేము మరుసటి రోజు ఆర్ సీబీతో మ్యాచ్ కోసం సన్నద్ధం అవుతున్నాం. అదే సమయంలో ఈ పోరు కోసం కోహ్లీ కూడా నెట్ ప్రాక్టీస్ చేస్తున్నాడు. నేను సరదాగా తను నెట్స్లో ఉన్న సమయాన్ని లెక్కించా. నిజం చెప్పాలంటే, అతను రెండున్నర గంటల పాటు బ్యాటింగ్ చేయడం చూసి నేను షాకయ్యా. ఎందుకంటే మా నెట్ సెషన్ మొత్తం పూర్తయింది. అయినప్పటికీ, అతను బ్యాటింగ్ చేస్తూనే ఉన్నాడు. మరుసటి రోజు, తను మాపై దాదాపు 70 పరుగులు చేశాడు. కోహ్లీ ఆలోచనా విధానం ఎప్పుడూ సానుకూలంగానే ఉంటుంది’ అని రషీద్ ఖాన్ పేర్కొన్నాడు.