Rohit Sharma: రోహిత్ శర్మ (Rohit Sharma) ఛాంపియన్స్ ట్రోఫీ 2025 టైటిల్‌ను గెలుచుకోవడంతో అతను రిటైర్మెంట్ పుకార్లకు కూడా ముగింపు పలికాడు. వన్డే ఫార్మాట్‌లో కొనసాగుతానని హిట్‌మన్ స్పష్టం చేశాడు. ఫైనల్ మ్యాచ్‌లో రోహిత్ ప్రదర్శన అద్భుతంగా ఉంది. నివేదికల ప్రకారం.. ఛాంపియన్స్ ట్రోఫీ గెలిచిన తర్వాత రోహిత్‌పై బీసీసీఐ విశ్వాసం మరింత పెరిగింది. ప్రస్తుతం రోహిత్ నుంచి టెస్టు కెప్టెన్సీ తీసుకునే ఆలోచనలో సెలక్టర్లు లేర‌ని స‌మాచారం. అంటే జూన్‌లో జరగనున్న ఇంగ్లండ్ టూర్‌లో రోహిత్ సారథ్యంలో టీమిండియా ఆడనున్న‌ట్లు తెలుస్తోంది.
ఇండియన్ ఎక్స్‌ప్రెస్ ప్రకారం.. ఇంగ్లండ్‌తో సిరీస్‌లో భారత్‌కు నాయకత్వం వహించడానికి రోహిత్‌కు బిసిసిఐ, సెలక్షన్ కమిటీ మద్దతు లభించింది. ఇంగ్లండ్‌తో జరగనున్న సిరీస్‌కు కెప్టెన్‌గా ఉండేందుకు రోహిత్ సరైన అభ్యర్థి అని అందరూ భావించినట్లు ఒక మూలాధారం తెలిపింది. ఇంగ్లండ్ టూర్‌కు వెళ్లే భారత జట్టుకు సారథ్యం వహించేందుకు అతనే సరైన అభ్యర్థి అని అందరూ భావిస్తున్నారు. రోహిత్ కూడా రెడ్ బాల్ క్రికెట్ ఆడేందుకు తన ఆసక్తిని వ్యక్తం చేశాడని నివేదిక పేర్కొంది.
Also Read: Nitish Reddy: సన్‌రైజర్స్ హైదరాబాద్‌కు బిగ్ న్యూస్.. ఫిట్‌గా స్టార్ ప్లేయ‌ర్‌!
అయితే వన్డేల్లో రోహిత్ శర్మ కెప్టెన్సీపై ఇంకా ఎలాంటి నిర్ణయం తీసుకోలేదు. రిటైర్మెంట్ వార్తలను కొట్టిపారేసిన తర్వాత 2027లో జరగనున్న వన్డే ప్రపంచకప్‌లో హిట్‌మ్యాన్ జట్టుకు నాయకత్వం వహిస్తాడా లేదా అని తెలుసుకోవాలని అభిమానులు తహతహలాడుతున్నారు. రోహిత్ కెప్టెన్సీలో గత 9 నెలల్లో టీమిండియా రెండు ఐసీసీ ట్రోఫీలను గెలుచుకుంది. 2024లో వెస్టిండీస్ గడ్డపై భారత జట్టు టీ-20 ప్రపంచకప్‌ను గెలుచుకోగా, ఇప్పుడు దుబాయ్‌లో జరిగిన ఛాంపియన్స్ ట్రోఫీ టైటిల్‌ను కైవసం చేసుకుంది.
సిడ్నీ టెస్టుకు రోహిత్ దూరంగా ఉన్నాడు
ఆస్ట్రేలియాతో జరిగిన బోర్డర్-గవాస్కర్ సిరీస్‌లోని ఐదవ మ్యాచ్‌లో రోహిత్ ప్లేయింగ్ ఎలెవన్ నుండి తనను తాను మినహాయించడంతో టెస్ట్ కెప్టెన్‌గా రోహిత్ భవిష్యత్తు గురించి చర్చ తీవ్రమైంది. అతని తర్వాత టెస్టు జట్టుకు కెప్టెన్ కోసం సెలక్టర్లు వెతుకుతున్నారని కూడా నివేదికలు వ‌చ్చాయి. ఈ ఏడాది జనవరి ప్రారంభంలో టెస్టు క్రికెట్‌కు రిటైర్మెంట్ ఇచ్చే ఉద్దేశం తనకు లేదని రోహిత్ స్పష్టంగా చెప్పాడు. ఆ సమయంలో తన బ్యాట్‌ నుంచి పరుగులు రాకపోవడంతో జట్టు నుంచి వైదొలగాలని నిర్ణయించుకున్నట్లు చెప్పాడు.