Syed Mushtaq Ali Trophy: భారత దేశీయ టోర్నమెంట్ అయిన సయ్యద్ ముస్తాక్ అలీ ట్రోఫీ (Syed Mushtaq Ali Trophy)లో పాల్గొంటున్న నలుగురు ఆటగాళ్లను తక్షణమే సస్పెండ్ చేశారు. ఈ ఆటగాళ్లపై అవినీతి ఆరోపణలు రావడంతో, అస్సాం క్రికెట్ అసోసియేషన్ (ACA) వెంటనే ఈ చర్య తీసుకుంది. ఈశాన్ అహ్మద్, అమన్ త్రిపాఠి, అమిత్ సిన్హా, అభిషేక్ ఠాకూర్ అనే నలుగురు ఆటగాళ్లు అస్సాం జట్టులోని ఇతర ఆటగాళ్లను ప్రభావితం చేయాలని, రెచ్చగొట్టాలని ప్రయత్నించినట్లు ఆరోపణలు వచ్చాయి. వీరి నలుగురిపై గౌహతిలోని క్రైమ్ బ్రాంచ్లో ఎఫ్ఐఆర్ (FIR) కూడా నమోదైంది. ఈ కేసు విచారణ పూర్తయ్యే వరకు ఈ నలుగురు ఆటగాళ్లు అస్సాం క్రికెట్ అసోసియేషన్ నిర్వహించే ఏ టోర్నమెంట్లోనూ పాల్గొనలేరు.
నలుగురు ఆటగాళ్లు సస్పెండ్
నవంబర్ 26 నుండి డిసెంబర్ 8 మధ్య జరిగిన మ్యాచ్ల సందర్భంగా ఈశాన్, అమన్, అమిత్, అభిషేక్లపై మిగిలిన ఆటగాళ్లను ప్రభావితం చేయాలని ప్రయత్నించినట్లు ఆరోపణలు వచ్చాయి. ఈ విషయం దృష్టికి రాగానే అస్సాం క్రికెట్ అసోసియేషన్ వెంటనే ఈ నలుగురు ఆటగాళ్లపై కఠిన చర్య తీసుకుంది. బీసీసీఐ (BCCI) అవినీతి నిరోధక భద్రతా విభాగం ఈ విషయాన్ని బయటపెట్టినట్లు సమాచారం.
Also Read: Trump Tariffs In India : భారత్ పై టారిఫ్స్.. ట్రంప్ పై పెరుగుతున్న వ్యతిరేకత
ఈ నలుగురు ఆటగాళ్లు క్రీడా స్ఫూర్తిపై చెడు ప్రభావం చూపే తప్పుడు పనులకు పాల్పడ్డారని అస్సాం క్రికెట్ అసోసియేషన్ ఒక పత్రికా ప్రకటనలో తెలియజేసింది. పరిస్థితి మరింత దిగజారకుండా ఉండటానికి ఈ నలుగురు ఆటగాళ్లను తక్షణమే సస్పెండ్ చేస్తున్నట్లు ప్రకటించింది. సస్పెన్షన్లో ఉన్న సమయంలో ఈ ఆటగాళ్లు ఏ రాష్ట్ర స్థాయి టోర్నమెంట్లోనూ పాల్గొనలేరు. ఇలాంటి ఘటన క్రికెట్లో జరగడం నిజంగా దురదృష్టకరమని కొందరు క్రీడా పండితులు అంటున్నారు.