ICC Women World Cup Schedule: భారతదేశంలో జరగనున్న మహిళల వరల్డ్ కప్ 2025 షెడ్యూల్ (ICC Women World Cup Schedule) విడుదలైంది. జూన్ 16న ఐసీసీ ఈ షెడ్యూల్ను విడుదల చేసింది. భారతదేశంతో పాటు శ్రీలంకకు కూడా ఆతిథ్య బాధ్యతలు అప్పగించింది. పాకిస్తాన్ మహిళల క్రికెట్ జట్టు హైబ్రిడ్ మోడల్ కింద తమ అన్ని మ్యాచ్లను శ్రీలంకలోని కొలంబోలో ఆడనుంది. టోర్నమెంట్ తొలి మ్యాచ్ను భారత్- శ్రీలంక ఆడనున్నాయి.
సెప్టెంబర్ 30 నుండి ప్రారంభం
మహిళల వరల్డ్ కప్ 2025 సెప్టెంబర్ 30 నుండి ప్రారంభమవుతుంది. మొదటి మ్యాచ్ భారత్- శ్రీలంక మధ్య బెంగళూరులోని ఎం. చిన్నస్వామి స్టేడియంలో జరుగుతుంది. భారత్- పాకిస్తాన్ మధ్య మ్యాచ్ అక్టోబర్ 5న కొలంబోలోని ఆర్. ప్రేమదాస స్టేడియంలో జరుగుతుంది. పాకిస్తాన్ సెమీఫైనల్-1కు అర్హత సాధిస్తే, ఆ మ్యాచ్ కొలంబోలో జరుగుతుంది. లేకపోతే గౌహతిలోని ఏసీఏ స్టేడియం దీనిని ఆతిథ్యం ఇస్తుంది. సెమీఫైనల్ మ్యాచ్లు అక్టోబర్ 29, 30న.. ఫైనల్ మ్యాచ్ నవంబర్ 2న జరుగుతాయి. ఫైనల్ వేదిక బెంగళూరు లేదా కొలంబోలో ఉంటుంది. ఇది పాకిస్తాన్ అర్హతపై ఆధారపడి ఉంటుంది.
భారత్-శ్రీలంకలోని ఐదు నగరాల్లో మ్యాచ్లు
ఐసీసీ ఈ టోర్నమెంట్ కోసం భారత్లోని బెంగళూరు (ఎం. చిన్నస్వామి స్టేడియం), గౌహతి (ఏసీఏ స్టేడియం), ఇండోర్ (హోల్కర్ స్టేడియం), విశాఖపట్నం (ఏసీఏ-వీడీసీఏ స్టేడియం) మరియు శ్రీలంకలోని కొలంబో (ఆర్. ప్రేమదాస స్టేడియం)లలో మ్యాచ్లను నిర్వహిస్తోంది. ఈ టోర్నమెంట్ 12 సంవత్సరాల తర్వాత భారత్లో జరుగుతోంది. అన్ని మ్యాచ్లు భారత కాలమానం ప్రకారం మధ్యాహ్నం 3 గంటలకు ప్రారంభమవుతాయి.
Also Read: Good News For Farmers: రైతులకు రేవంత్ ప్రభుత్వం మరో శుభవార్త!
The countdown begins ⏳
The full schedule for the ICC Women’s Cricket World Cup 2025 is out 🗓
Full details ➡ https://t.co/lPlTaGmtat pic.twitter.com/JOsl2lQYpy
— ICC (@ICC) June 16, 2025
ఎనిమిది జట్లు పాల్గొననున్నాయి
టోర్నమెంట్లో భారత్, ఆస్ట్రేలియా, ఇంగ్లండ్, దక్షిణాఫ్రికా, న్యూజిలాండ్, శ్రీలంక, బంగ్లాదేశ్, పాకిస్తాన్ జట్లు పాల్గొంటాయి. ఆస్ట్రేలియా గత చాంపియన్గా బరిలోకి దిగుతోంది. 2022లో న్యూజిలాండ్లో జరిగిన ఫైనల్లో ఇంగ్లండ్ను ఓడించి టైటిల్ గెలిచింది. పాకిస్తాన్, బంగ్లాదేశ్ ఏప్రిల్ 2025లో జరిగిన క్వాలిఫైయర్ టోర్నమెంట్లో టాప్-2లో నిలిచి ఈ వరల్డ్ కప్కు అర్హత సాధించాయి.
భారత జట్టు మ్యాచ్లు
భారత జట్టు తన ప్రచారాన్ని సెప్టెంబర్ 30న బెంగళూరులో శ్రీలంక మ్యాచ్తో ప్రారంభిస్తుంది. ఆ తర్వాత అక్టోబర్ 5న కొలంబోలో పాకిస్తాన్తో, అక్టోబర్ 9న విశాఖపట్నంలో దక్షిణాఫ్రికాతో, అక్టోబర్ 12న విశాఖపట్నంలో ఆస్ట్రేలియాతో, అక్టోబర్ 19న ఇండోర్లో ఇంగ్లండ్తో, అక్టోబర్ 23న గౌహతిలో న్యూజిలాండ్తో, అక్టోబర్ 26న బెంగళూరులో బంగ్లాదేశ్తో ఆడుతుంది.
హైబ్రిడ్ మోడల్
భారత్- పాకిస్తాన్ మధ్య రాజకీయ ఉద్రిక్తతల కారణంగా బీసీసీఐ, పీసీబీ మధ్య ఒప్పందం ప్రకారం పాకిస్తాన్ జట్టు భారత్లో ఆడకుండా వారి అన్ని మ్యాచ్లు కొలంబోలో జరుగుతాయి. ఈ హైబ్రిడ్ మోడల్ ఈ ఏడాది ఛాంపియన్స్ ట్రోఫీ కోసం కూడా అమలు చేశారు. దీనిలో భారత్ తమ మ్యాచ్లను దుబాయ్లో ఆడింది.