Pakistan Visas: ICC ODI ప్రపంచ కప్ 2023 అక్టోబర్ 5 నుండి భారతదేశంలో ప్రారంభం కానుంది. ఈ మెగా ఈవెంట్ ప్రారంభానికి ముందు సెప్టెంబర్ 29 నుండి ప్రాక్టీస్ మ్యాచ్‌లు ఉన్నాయి. తద్వారా మెగా ఈవెంట్ ప్రారంభానికి ముందు అన్ని జట్లు భారత పరిస్థితులలో తమను తాము సిద్ధం చేసుకోవచ్చు. అదే సమయంలో పాకిస్తాన్ జట్టు (Pakistan Visas) భారతదేశానికి రావడానికి ఇంకా వీసాలు అందుకోలేదు.
ఈసారి వన్డే ప్రపంచకప్‌లో భారత్‌తో సహా మొత్తం 10 జట్లు పాల్గొంటున్నాయి. ఇందులో పాకిస్థాన్ మినహా మిగతా జట్లన్నీ భారత్‌కు రావడానికి వీసా పొందాయి. ESPN Cricinfo ప్రకారం.. పాకిస్తాన్ ప్రపంచ కప్ కోసం భారతదేశానికి బయలుదేరే ముందు దుబాయ్‌లో ప్రాక్టీస్ చేయాలని ప్లాన్ చేసింది. ఆ తర్వాత అక్కడి నుంచి నేరుగా హైదరాబాద్‌కు బయలుదేరి రావాల్సి ఉండగా వీసా రాకపోవడంతో పాక్ జట్టు ప్లాన్ బెడిసికొట్టింది.
పాకిస్థాన్ క్రికెట్ జట్టు వారం రోజుల క్రితం వీసా కోసం దరఖాస్తు చేసుకుంది. సెప్టెంబరు 27న దుబాయ్‌కి వెళ్లి పాక్ టీమ్ అక్కడి నుంచి భారత్‌కు రావాలనుకుంది. అయితే, వీసా ఆలస్యం కారణంగా పాకిస్తాన్ జట్టు ఇప్పుడు వారి UAE ప్రణాళికను రద్దు చేయాలని నిర్ణయించుకుందని నివేదికలో పేర్కొంది. వీసా ఆలస్యంపై పాక్ టీమ్ మేనేజ్‌మెంట్ తమకు నిర్ణీత గడువులోగా వీసా లభిస్తుందని ఆశాభావం వ్యక్తం చేసింది. ప్రపంచకప్‌కు ముందు సెప్టెంబర్ 29న హైదరాబాద్‌లో న్యూజిలాండ్ జట్టుతో పాకిస్థాన్ జట్టు ప్రాక్టీస్ మ్యాచ్ ఆడాల్సి ఉంది.
నసీమ్ షా అవుట్.. హసన్ అలీకి చోటు
2023 వన్డే ప్రపంచకప్ కోసం పాకిస్థాన్ తన 15 మంది సభ్యుల జట్టును సెప్టెంబర్ 22న ప్రకటించింది. భుజం గాయం కారణంగా మొత్తం మెగా ఈవెంట్‌కు దూరంగా ఉన్న నసీమ్ షా పేరు ఇందులో చేర్చలేదు. అతని స్థానంలో హసన్ అలీని జట్టులోకి తీసుకున్నారు. షాదాబ్ ఖాన్, మహమ్మద్ నవాజ్, ఉసామా మీర్ సహా ముగ్గురు స్పిన్ బౌలర్లు కూడా జట్టులోకి వచ్చారు.
వన్డే వరల్డ్ కప్ 2023 టోర్నీ కోసం పాకిస్తాన్ జట్టు: ఫకార్ జమాన్, ఇమామ్ ఉల్ హక్, అబ్దుల్లా షఫీక్, బాబర్ ఆజమ్ (కెప్టెన్), మహ్మద్ రిజ్వాన్, సౌద్ షకీల్, ఇఫ్తికర్ అహ్మద్, సల్మాన్ ఆలీ అఘా, షాదబ్ ఖాన్, ఉసమా మిర్, మహ్మద్ నవాజ్, షాహీన్ షా ఆఫ్రిదీ, హారీస్ రౌఫ్, మహ్మద్ వసీం జూనియర్, హసన్ ఆలీ
ట్రావెలింగ్ రిజర్వు ప్లేయర్లు: అబ్రర్ అహ్మద్, జమాన్ ఖాన్, మహ్మద్ హారీస్