కెప్టెన్సీ పోయిందన్న కసితో వెస్టిండీస్ మాజీ కెప్టెన్ నికోలస్ పూరన్ టీ 10 లీగ్ లో రెచ్చిపోయాడు. దక్కన్ గ్లాడియేటర్స్ కెప్టెన్ గా వ్యవహరిస్తున్న నికోలస్ పూరన్ విధ్వంసం సృష్టించాడు. కేవలం 33 బంతుల్లోనే 5 ఫోర్లు, 8 సిక్స్లతో 77 పరుగులు చేసి నాటవుట్ గా నిలిచాడు. అతడితో పాటు ఓడియన్ స్మిత్ 23 పరుగులతో రాణించాడు. ఈ టోర్నీ ఆరంభానికి ముందు రోజే వెస్టిండీస్ కెప్టెన్సీకి పూరన్ గుడ్ బై చెప్పాడు. టీ20 ప్రపంచకప్లో ఘోర పరాభావానికి నైతిక బాధ్యత వహిస్తూ పూరన్ ఈ నిర్ణయం తీసుకున్నాడు.
అటు ఐపీఎల్ టీమ్ సన్ రైజర్స్ హైదరాబాద్ కూడా పూరన్ ను మినీ వేలానికి ముందు వదిలేసింది. ఈ కసితో మరింత రెచ్చిపోయిన విండీస్ వికెట్ కీపర్ తన బ్యాటింగ్ సత్తా రుజువు చేశాడని కరేబియన్ ఫ్యాన్స్ అంటున్నారు. కాగా ఈ మ్యాచ్ లో 35 పరుగుల తేడాతో టీమ్ అబుధాబి పై గ్లాడియేటర్స్ విజయం సాధించింది. 135 పరుగుల భారీ లక్ష్యంతో బరిలోకి దిగిన అబుదాబి నిర్ణీత 10 ఓవర్లలో 6 వికెట్లు కోల్పోయి 99 పరుగులకే పరిమితమైంది.