MS Dhoni: చెన్నై సూపర్ కింగ్స్ (CSK) దిగ్గజం మహేంద్ర సింగ్ ధోనీ (MS Dhoni) శుక్రవారం మైదానంలోకి దిగ‌గానే ఓ రికార్డు క్రియేట్ చేయ‌నున్నాడు. సన్‌రైజర్స్ హైదరాబాద్ (SRH)తో చెపాక్ స్టేడియంలో జరిగే ఐపీఎల్ మ్యాచ్‌లో మైదానంలోకి రాగానే.. అతను తన కెరీర్‌లో 400వ టీ20 మ్యాచ్ ఆడిన‌ట్లు అవుతోంది. ధోనీ కెప్టెన్సీలోని చెన్నై సూపర్ కింగ్స్ ప్రస్తుతం ఎనిమిది మ్యాచ్‌లలో కేవలం రెండు విజయాలతో పాయింట్ల పట్టికలో అట్టడుగున ఉంది. అయితే సన్‌రైజర్స్ హైదరాబాద్ కూడా అంతే చెడ్డ పరిస్థితిలో ఉంది. ఎనిమిది మ్యాచ్‌లలో ఆరు ఓడిపోయి తొమ్మిదో స్థానంలో ఉంది. ఈ మ్యాచ్‌లో ఓడిన జట్టు చివరి స్థానంలో ఉంటుంది. ప్లేఆఫ్ రేసు నుండి బయటకు వెళ్లే ప్రమాదం మరింత పెరుగుతుంది.
ధోనీ టీ20 క్రికెట్‌లో 400 మ్యాచ్‌లు ఆడిన ప్రపంచంలోని 24వ, భారతదేశం నుండి నాల్గవ ఆటగాడిగా నిలుస్తాడు. అతనికి ముందు భారత్ తరపున విరాట్ కోహ్లీ (407), దినేష్ కార్తీక్ (412), రోహిత్ శర్మ (456) ఈ విజయాన్ని సాధించారు. ఇప్పటివరకు భారత్, చెన్నై సూపర్ కింగ్స్, రైజింగ్ పూణే సూపర్‌జెయింట్, జార్ఖండ్ తరపున ఆడిన 399 టీ20 మ్యాచ్‌లలో ధోనీ 7,566 పరుగులు చేశాడు. అతని సగటు 38.02, 28 అర్ధసెంచ‌రీలు సాధించాడు. అతని ఉత్తమ స్కోరు 84* పరుగులు. వికెట్ కీపర్‌గా అతను 318 క్యాచ్‌లు పట్టాడు.
ధోనీ 2007 టీ20 వరల్డ్ కప్‌ను భారత్ కోసం, CSK కోసం ఐదు ఐపీఎల్ టైటిళ్లను, రెండు చాంపియన్స్ లీగ్ టీ20 టైటిళ్లను గెలుచుకున్నాడు. టీ20 క్రికెట్‌లో అత్యధిక మ్యాచ్‌లు ఆడిన రికార్డు వెస్టిండీస్‌కు చెందిన కీరన్ పొలార్డ్ (695) పేరిట ఉంది. ఆ తర్వాత డ్వేన్ బ్రావో (582), పాకిస్తాన్‌కు చెందిన షోయబ్ మాలిక్ (557) ఉన్నారు. ధోనీ భారత్ తరపున 400 టీ20 మ్యాచ్‌లు ఆడిన నాల్గవ ఆటగాడిగా నిలుస్తాడు. ఐపీఎల్‌లో ధోనీ 272 మ్యాచ్‌లు, 237 ఇన్నింగ్స్‌లలో 5,377 పరుగులు చేసి ఆరో అత్యధిక పరుగులు సాధించిన బ్యాట్స్‌మన్‌గా ఉన్నాడు. అతని సగటు 38.96. ధోనీ ఐపీఎల్‌లో 24 అర్ధసెంచ‌రీలు సాధించాడు.
Also Read: Pahalgam Terror Attack : భారత్, పాకిస్థాన్‌లు సంయమనం పాటించాలి : ఐక్యారాజ్యసమితి
ఈ సీజన్‌లో ధోనీ మరోసారి ఫినిషర్ పాత్రలో ఉన్నాడు. ఇప్పటివరకు అతను 8 ఇన్నింగ్స్‌లలో 33.50 సగటు మరియు 152.27 స్ట్రైక్ రేట్‌తో 134 పరుగులు చేశాడు,. ఇందులో ఉత్తమ స్కోరు 30*. ఈ మ్యాచ్‌లో విజయం మాత్రమే ధోనీ జట్టుకు ఐపీఎల్‌లో ముందుకు సాగే అవకాశాన్ని ఇస్తుంది. లేకపోతే ఒక ఓటమి వారి ప్లే ఆఫ్ ఆశ‌ల‌పై నీళ్లు చ‌ల్లుతుంది.