KKR vs RCB: ఐపీఎల్ 2025 ప్రారంభ వేడుక మార్చి 22న ఈడెన్ గార్డెన్స్‌లో జరగనుంది. కానీ అభిమానులకు బ్యాడ్ న్యూస్ అని నివేదిక‌లు చెబుతున్నాయి. ఐపీఎల్ తొలి మ్యాచ్ రద్దు కావొచ్చు. మార్చి 22న కోల్‌కతాలో భారీ వర్షం కురిసే అవకాశం ఉంది. ఇండియన్ ప్రీమియర్ లీగ్ 18వ ఎడిషన్ మార్చి 22 నుంచి ప్రారంభం కానుంది. కోల్‌కతా నైట్ రైడర్స్, రాయల్ ఛాలెంజర్స్ బెంగళూరు (KKR vs RCB) మధ్య ప్రారంభ మ్యాచ్‌కు ముందు ఈడెన్ గార్డెన్స్ స్టేడియంలో గ్రాండ్ ఓపెనింగ్ వేడుకను నిర్వహించనున్నారు. అయితే మ్యాచ్ రోజు నగరంలోని పలు ప్రాంతాల్లో వాతావరణ శాఖ ఆరెంజ్ అలర్ట్ ప్రకటించింది.
పంజాబీ గాయకుడు కరణ్ ఔజ్లా, బాలీవుడ్ గాయని శ్రేయా ఘోషల్, బాలీవుడ్ నటి దిశా పటానీ IPL 2025 ప్రారంభ వేడుకలో ప్రదర్శన ఇవ్వనున్నారు. ఈ విషయాన్ని ఐపీఎల్ అధికారికంగా ప్రకటించింది. టాస్‌కు 1 గంట ముందు సాయంత్రం 6 గంటలకు వేడుక ప్రారంభమవుతుంది. అయితే వర్షం కురిసే అవకాశం ఉండటంతో అభిమానుల్లో ఆందోళన పెరిగింది. వర్షం ప‌డితే మ్యాచ్ (కేకేఆర్ వర్సెస్ ఆర్‌సీబీ 1వ మ్యాచ్) మాత్రమే కాదు.. ఓపెనింగ్ వేడుక కూడా రద్దయ్యే ప్రమాదం ఉంది.
Also Read: World Test Championship: ప్రపంచ టెస్టు ఛాంపియన్‌షిప్‌లో భారీ మార్పు!
కోల్‌కతాలోని వాతావరణ శాఖ మార్చి 20 నుంచి 22 వరకు ఆరెంజ్ అలర్ట్ ప్రకటించింది. అంటే ఇక్కడ భారీ వర్షాలు కురిసే అవకాశం ఉంది. వాతావరణ వెబ్‌సైట్ ప్రకారం మార్చి 22న రోజంతా వర్షాలు కురిసే అవకాశం ఉంది. ఉదయం 10 గంటలకు వర్షం కురిసే అవకాశం 70 శాతం కాగా, మ్యాచ్ జరిగే సమయానికి దాని సంభావ్యత 40 శాతానికి తగ్గుతుంది. కోల్‌కతాలో శనివారం వర్షం కురిసే అవకాశం ఉండటంతో మ్యాచ్ రద్దు లేదా ఓవర్లు కట్ అయ్యే ప్రమాదం ఉంది. మ్యాచ్‌కు ముందు వర్షం కురిస్తే మ్యాచ్ ప్రారంభమయ్యే వరకు వేచి చూడొచ్చు కానీ అలాంటి పరిస్థితుల్లో ప్రారంభోత్సవం నిర్వహించడం కష్టమే. మధ్యాహ్నం కూడా వర్షం కురిస్తే మైదానంలో వేడుకలకు సిబ్బంది శ్రమ రెట్టింపు అవుతుంది.
ఐపీఎల్ 2025లో 13 వేదికల్లో మ్యాచ్‌లు జరగనున్నాయి
మార్చి 22 నుంచి ఐపీఎల్ 18వ సీజన్ ప్రారంభం కానుంది. IPL 2025 ఫైనల్ కూడా ఈడెన్ గార్డెన్స్ స్టేడియంలో జరుగుతుంది. టోర్నీలో మొత్తం 74 మ్యాచ్‌లు 13 వేదికల్లో జరగనున్నాయి.