Jasprit Bumrah: భారత్, ఇంగ్లండ్‌ల మధ్య జరుగుతున్న నాలుగో టెస్ట్ మ్యాచ్‌లో మూడు రోజుల ఆట పూర్తయైన తర్వాత ఇంగ్లాండ్ తమ పట్టును కొనసాగిస్తోంది. ఈ క్రమంలో నాలుగో రోజు ఆట ప్రారంభమయ్యే ముందు భారత మాజీ క్రికెటర్ మొహమ్మద్ కైఫ్ చేసిన ఒక సంచలన వ్యాఖ్య క్రికెట్ ప్రపంచంలో చర్చనీయాంశంగా మారింది. మాంచెస్టర్ టెస్ట్ తర్వాత పేసర్ జస్ప్రీత్ బుమ్రా (Jasprit Bumrah) టెస్ట్ క్రికెట్‌కు వీడ్కోలు పలకవచ్చని కైఫ్ అభిప్రాయపడ్డారు.
మొహమ్మద్ కైఫ్ వ్యాఖ్యలు.. బుమ్రా రిటైర్మెంట్ ఊహాగానాలు
మొహమ్మద్ కైఫ్ జస్ప్రీత్ బుమ్రా గురించి మాట్లాడుతూ.. “జస్ప్రీత్ బుమ్రా రాబోయే టెస్ట్ మ్యాచ్‌లలో ఆడడు అని నేను భావిస్తున్నాను. అతను టెస్ట్ క్రికెట్ నుంచి రిటైర్మెంట్ తీసుకోవచ్చు. అతను తన శరీరంతో చాలా ఇబ్బంది ప‌డుతున్నాడు. మాంచెస్టర్‌లో అతని బంతి వేగం కూడా తగ్గింది” అని అన్నారు. కైఫ్ తన వాదనను కొనసాగిస్తూ.. “బుమ్రా చాలా మంచి, నిజాయితీ గల వ్యక్తి. ఒకవేళ అతను దేశానికి 100 శాతం ఇవ్వలేనని భావిస్తే అతను టెస్ట్ క్రికెట్ నుంచి రిటైర్ అవుతాడు. అతనికి వికెట్లు రాలేదు. అది వేరే విషయం. కానీ అతని వేగం 125-130 కి.మీ. గంటల వరకు మాత్రమే ఉంది” అని పేర్కొన్నారు.
Also Read: Hari Hara Veera Mallu: హ‌రి హ‌ర వీర‌మ‌ల్లు రెండు రోజుల క‌లెక్ష‌న్స్ ఇదే!
అతను మరింత వివరిస్తూ.. “జస్ప్రీత్ బుమ్రా ఉత్సాహంపై ఎటువంటి సందేహం లేదు. కానీ అతని శరీరం ఇప్పుడు సహకరించడం లేదు. ఈ మ్యాచ్ నుంచి స్పష్టంగా తెలుస్తోంది. అతనికి భవిష్యత్తులో చాలా ఇబ్బందులు ఎదురవుతాయి. బహుశా అతను టెస్ట్ క్రికెట్ నుంచి రిటైర్ అవుతాడు. విరాట్ కోహ్లీ, రోహిత్ శర్మ, ఆర్. అశ్విన్ తర్వాత బుమ్రా కూడా ఈ ఫార్మాట్ నుంచి వెళ్లిపోవచ్చు. అభిమానులు అతను లేని టెస్ట్ మ్యాచ్‌లను చూడటానికి అలవాటు పడాలి. నా ఊహ తప్పు కావాలని నేను కోరుకుంటున్నాను. కానీ నేను చూసినది ఆధారంగా చెప్తున్నాను” అని స్పష్టం చేశారు.
మాంచెస్టర్ టెస్ట్‌లో జస్ప్రీత్ బుమ్రా ప్రదర్శన
మాంచెస్టర్ టెస్ట్‌లో జస్ప్రీత్ బుమ్రా ప్రభావవంతంగా కనిపించలేదు. మూడవ రోజు ఆట ముగిసే సమయానికి అతను కేవలం ఒక్క వికెట్ మాత్రమే తీశాడు. మొదటి 20 ఓవర్లలో బుమ్రా ఒక్క వికెట్ కూడా తీయలేకపోయాడు. ఇప్పటివరకు అతను 28 ఓవర్లు బౌలింగ్ చేసి, 95 పరుగులు ఇచ్చాడు. మూడవ సెషన్‌లో అతను జామీ స్మిత్ వికెట్ తీసినప్పటికీ అతని సాధారణ వేగం, పదును ఈ మ్యాచ్‌లో కనిపించలేదని కైఫ్ అభిప్రాయం.