IND vs NZ: భారత్- న్యూజిలాండ్ మధ్య 5 మ్యాచ్ల టీ-20 సిరీస్ జరుగుతోంది. సిరీస్లో మొదటి మ్యాచ్ జనవరి 21న నాగ్పూర్లో జరుగుతోంది. ఈ మ్యాచ్లో భారత జట్టు టాస్ ఓడి బ్యాటింగ్కు దిగింది. ఓపెనర్ అభిషేక్ శర్మ అద్భుతమైన మెరుపు ఇన్నింగ్స్ ఆడగా సూర్యకుమార్ యాదవ్, హార్దిక్ పాండ్యా, రింకూ సింగ్ కూడా విధ్వంసం సృష్టించారు. ఈ మ్యాచ్తో భారత జట్టు సరికొత్త చరిత్ర సృష్టించింది.
భారత జట్టు సరికొత్త రికార్డు
ఈ మ్యాచ్లో భారత జట్టు నిర్ణీత 20 ఓవర్లలో 7 వికెట్ల నష్టానికి 238 పరుగులు చేసింది. దీని ద్వారా టీ-20ఐ ఫార్మాట్లో న్యూజిలాండ్పై భారత్ తన అత్యధిక స్కోరును నమోదు చేసింది. గతంలో న్యూజిలాండ్పై భారత్ ఇంత భారీ స్కోరును ఎప్పుడూ చేయలేదు. తద్వారా మ్యాచ్ ముగియకముందే టీమ్ ఇండియా చరిత్ర పుటల్లోకెక్కింది.
Also Read: జొమాటో సీఈఓ పదవికి రాజీనామా చేసిన గోయల్!
అభిషేక్ శర్మ తుఫాన్ ఇన్నింగ్స్
అభిషేక్ శర్మ న్యూజిలాండ్ బౌలర్లపై విరుచుకుపడుతూ కేవలం 35 బంతుల్లో 84 పరుగుల అద్భుత ఇన్నింగ్స్ ఆడాడు. తన ఇన్నింగ్స్లో ఈ ఎడమచేతి వాటం ఓపెనర్ 5 ఫోర్లు, 8 సిక్సర్లు బాదాడు. టీ-20ల్లో భారత్ తరఫున అత్యధిక సిక్సర్లు బాదిన విషయంలో అభిషేక్ శర్మ.. యువరాజ్ సింగ్ను కూడా వెనక్కి నెట్టాడు. అభిషేక్ కాకుండా సూర్యకుమార్ యాదవ్ 22 బంతుల్లో 32 పరుగులు చేయగా, హార్దిక్ పాండ్యా కేవలం 6 బంతుల్లోనే 25 పరుగులు సాధించాడు. చివరలో రింకూ సింగ్ 20 బంతుల్లో 44 పరుగులు చేసి అజేయంగా నిలవడంతో టీమ్ ఇండియా స్కోరు 238 పరుగులకు చేరింది.
టీ-20ల్లో భారత్ సాధించిన అత్యధిక స్కోర్లు
- 297/6- బంగ్లాదేశ్ (2024)
- 283/1- దక్షిణాఫ్రికా (2024)
- 260/5- శ్రీలంక (2017)
- 244/4- వెస్టిండీస్ (2016)
- 240/3- వెస్టిండీస్ (2019)
- 238/7- న్యూజిలాండ్ (2026)