Rohit Sharma: భారతదేశం- ఆస్ట్రేలియా మధ్య జరగబోయే 3 మ్యాచ్‌ల వన్డే సిరీస్, 5 మ్యాచ్‌ల టీ-20 సిరీస్‌ల కోసం భారత క్రికెట్ జట్టును ప్రకటించారు. వన్డే జట్టుకు కొత్త కెప్టెన్‌గా శుభ్‌మన్ గిల్ ఎంపికయ్యారు. రోహిత్ శర్మ (Rohit Sharma) స్థానంలో అతనికి కెప్టెన్సీని అప్పగించారు. ఈ సిరీస్‌కు విరాట్ కోహ్లీని కూడా జట్టులోకి తీసుకున్నారు. అయితే కెప్టెన్‌గా రోహిత్ శర్మకు వన్డేల్లో అద్భుతమైన రికార్డు ఉన్నప్పటికీ అతనికి కెప్టెన్సీని ఇవ్వకపోవడం చర్చనీయాంశమైంది.
రోహిత్ శర్మతో అన్యాయం జరిగిందా?
వన్డే ఫార్మాట్‌లో రోహిత్ శర్మ భారతదేశానికి అద్భుతమైన సేవలు అందించారు. తన చివరి వన్డే టోర్నమెంట్ అయిన ఛాంపియన్స్ ట్రోఫీలో భారత్‌కు విజయాన్ని కూడా అందించారు. కెప్టెన్‌గా రోహిత్ శర్మ గణాంకాలు ఎంఎస్ ధోని మరియు విరాట్ కోహ్లీ కంటే కూడా మెరుగ్గా ఉన్నాయి. కెప్టెన్‌గా రోహిత్ శర్మ వన్డేలలో విజయ శాతం గురించి మాట్లాడితే.. అతను భారత్‌కు దాదాపు 75 శాతం మ్యాచ్‌లను గెలిపించాడు. అదే సమయంలో విరాట్ కోహ్లీ విజయ శాతం 68.42 కాగా, ఎంఎస్ ధోని విజయ శాతం 55 గా ఉంది.
Also Read: Virat Kohli- Rohit Sharma: ఆస్ట్రేలియా సిరీస్ త‌ర్వాత వ‌న్డేల‌కు రోహిత్, కోహ్లీ రిటైర్మెంట్?!
రోహిత్ శర్మ తన కెప్టెన్సీలో 27 ICC ఈవెంట్లలో టీమిండియాకు నాయకత్వం వహించారు. ఈ సమయంలో భారత్ కేవలం 2 మ్యాచ్‌లలో మాత్రమే ఓడిపోయింది. 25 మ్యాచ్‌లలో విజయం సాధించింది. మొత్తం మీద రోహిత్ వన్డే ఫార్మాట్‌లో భారత్ తరఫున 56 మ్యాచ్‌లకు నాయకత్వం వహించగా.. టీమిండియా 42 మ్యాచ్‌లలో గెలిచి, 12 మ్యాచ్‌లలో ఓటమిని చవిచూసింది. అద్భుతమైన రికార్డు ఉన్నప్పటికీ 2027 ప్రపంచ కప్‌ను దృష్టిలో ఉంచుకుని యువ నాయకుడికి బాధ్యతలు అప్పగించాలనే ఉద్దేశంతోనే ఈ నిర్ణయం తీసుకున్నట్లు క్రికెట్ విశ్లేషకులు భావిస్తున్నారు.
ఆస్ట్రేలియా పర్యటనకు భారత జట్లు
వన్డే సిరీస్‌కు టీమిండియా జట్టు
- శుభ్‌మన్ గిల్ (కెప్టెన్), రోహిత్ శర్మ, విరాట్ కోహ్లీ, శ్రేయస్ అయ్యర్ (వైస్ కెప్టెన్), అక్షర్ పటేల్, కేఎల్ రాహుల్ (వికెట్ కీపర్), నితీశ్ కుమార్ రెడ్డి, వాషింగ్టన్ సుందర్, కుల్‌దీప్ యాదవ్, హర్షిత్ రాణా, మహ్మద్ సిరాజ్, అర్ష్‌దీప్ సింగ్, ప్రసిధ్ కృష్ణ, ధ్రువ్ జురెల్ (వికెట్ కీపర్), యశస్వి జైస్వాల్.
టీ-20 సిరీస్‌కు టీమిండియా జట్టు
- సూర్యకుమార్ యాదవ్ (కెప్టెన్), అభిషేక్ శర్మ, శుభ్‌మన్ గిల్ (వైస్ కెప్టెన్), తిలక్ వర్మ, నితీశ్ కుమార్ రెడ్డి, శివమ్ దూబే, అక్షర్ పటేల్, జితేష్ శర్మ (వికెట్ కీపర్), వరుణ్ చక్రవర్తి, జస్‌ప్రీత్ బుమ్రా, అర్ష్‌దీప్ సింగ్, కుల్‌దీప్ యాదవ్, హర్షిత్ రాణా, సంజూ శాంసన్ (వికెట్ కీపర్), రింకూ సింగ్, వాషింగ్టన్ సుందర్.