Rohit Sharma: నవంబర్ 19, 2023 ఆ రోజు టీమ్ ఇండియా వరల్డ్ కప్ గెలవాలనే కల నీరుగారిపోయిన రోజు. లక్షలాది భారతీయ అభిమానుల మాదిరిగానే కెప్టెన్ రోహిత్ శర్మ (Rohit Sharma) హృదయంలో కూడా ఆ రోజు బాధ ఇప్పటికీ సజీవంగా ఉంది. అయితే ఇప్పుడు రోహిత్ ఈ విషయంపై తన మౌనాన్ని వీడాడు. ఆస్ట్రేలియాతో జరిగిన T20 వరల్డ్ కప్ 2024 కీలక మ్యాచ్ ముందు రోహిత్ డ్రెస్సింగ్ రూమ్‌లోని సంభాషణలను పంచుకున్నాడు. ప్రతి టోర్నమెంట్‌లో ఆస్ట్రేలియాను టోర్నమెంట్ నుండి బయటకు పంపడమే తన లక్ష్యమని తెలిపాడు.
‘కోపం ఎప్పుడూ ఉంటుంది…’ రోహిత్ వ్యాఖ్య
స్టార్ స్పోర్ట్స్‌తో మాట్లాడుతూ రోహిత్ కీలక వ్యాఖ్య‌లు చేశాడు. “కోపం ఎప్పుడూ ఉండేది. ఈ కోపం మీ మనసులో ఎక్కడో ఒక చోట నడుస్తూ ఉంటుంది. వీళ్లు మన నవంబర్ 19ను పాడు చేశారు. అంటే దేశం మొత్తం రోజును దెబ్బతీశారు. ఇప్పుడు ఈ ఆస్ట్రేలియా జట్టు ఎదురొస్తే వీళ్లకు ఏదో మంచి బహుమతి ఇవ్వాలనిపిస్తుంది. అది వరల్డ్ కప్ టోర్నమెంట్ నుండి బయటకు పంపడం వంటిది” అని చెప్పుకొచ్చాడు.
రోహిత్ చెప్పిన ప్రకారం.. బ్యాటింగ్‌కు దిగినప్పుడు అతను నేరుగా ప్రతీకార భావనతో ఆడడు. కానీ డ్రెస్సింగ్ రూమ్‌లో ఆటగాళ్ల మధ్య నిరంతరం సరదాగా, హాస్యంగా సంభాషణలు జరుగుతాయి. అందరూ ఒకే మాట చెప్పుకుంటారు. ఈ జట్టును టోర్నమెంట్ నుండి బయటకు పంపితేనే సంతృప్తిగా ఉంటుందని. ఆటగాళ్లంతా సరదాగా ఈ మాటలు చెప్పినప్పటికీ ఈ మాటల వెనుక ఉన్న భావన చాలా వ్యక్తిగతమైనదని రోహిత్ తెలిపాడు.
Also Read: Research Report: రిపోర్ట్‌.. ప్ర‌జ‌లు అత్య‌ధికంగా అనుస‌రించే మ‌తాలు ఏవో తెలుసా?
2023 వన్డే వరల్డ్ కప్
2023 వన్డే వరల్డ్ కప్‌లో భారత్ లీగ్ దశ నుండి సెమీఫైనల్ వరకు ఒక్క మ్యాచ్‌లో కూడా ఓడలేదు. టీమ్ ఇండియా స్వదేశంలో అద్భుతమైన ఫామ్‌లో ఉంది. కానీ ఆస్ట్రేలియా ఫైన‌ల్ మ్యాచ్ రోజు భారత్‌ను ఆరు వికెట్ల తేడాతో ఓడించి వరల్డ్ కప్ కలను భగ్నం చేసింది. “ఆ ఓటమిని మరచిపోవడం సులభం కాదు. ఆ రోజు దేశం మొత్తం నీరసించిపోయింది. ఒక విషయం మీ మనసులో నాటుకుపోతే మీరు ప్రతిసారీ దానిని మార్చడానికి ప్రయత్నిస్తారు” అని రోహిత్ పేర్కొన్నాడు.
T20 వరల్డ్ కప్‌లో ప్రతీకారం
T20 వరల్డ్ కప్ 2024లో భారత్- ఆస్ట్రేలియా సూపర్-8 చివరి మ్యాచ్‌లో తలపడ్డాయి. ఆస్ట్రేలియాను టోర్నమెంట్ నుండి బయటకు పంపే అవకాశం భారత్‌కు లభించింది. భారత్ అప్పటికే సెమీఫైనల్ రేసులో బలమైన స్థితిలో ఉంది. కానీ ఆస్ట్రేలియాకు ఆఫ్ఘనిస్తాన్‌తో జరిగిన ఓటమి తర్వాత భారత్‌తో మ్యాచ్‌లో గెలవడం అవసరం. అలాంటి సమయంలో రెండు జట్లు తలపడ్డప్పుడు టీమ్ ఇండియా ఆ మ్యాచ్‌ను గెలిచింది. అది మాత్రమే కాకుండా ఆస్ట్రేలియాను టోర్నమెంట్ నుండి బయటకు పంపింది. ఈ విధంగా భారత్.. ఆసీస్‌పై ప్రతీకారం తీర్చుకుంది.