Cricketer Passed Away: టీ20 వరల్డ్ కప్ 2026 సన్నాహాలు ముమ్మరంగా సాగుతున్న తరుణంలో క్రికెట్ ప్రపంచంలో ఒక విషాద వార్త చోటుచేసుకుంది. ఇంగ్లాండ్ మాజీ క్రికెటర్ టోనీ పిగోట్ 67 ఏళ్ల వయసులో కన్నుమూశారు. ఫిబ్రవరి 2న ఆయన తుదిశ్వాస విడిచారు. ఈ వార్తతో క్రికెట్ వర్గాల్లో విషాద ఛాయలు అలముకున్నాయి. టోనీ ఇంగ్లాండ్ జాతీయ జట్టు తరపున ఎక్కువ కాలం ఆడకపోయినా డొమెస్టిక్ క్రికెట్లో (ఘరోలు క్రికెట్) తనదైన ముద్ర వేశారు.
1984లో అరంగేట్రం- పెళ్లిని వాయిదా వేసుకుని మరీ
టోనీ పిగోట్ 1984లో ఇంగ్లాండ్ తరపున తన ఏకైక టెస్ట్ మ్యాచ్ ఆడారు. న్యూజిలాండ్తో జరిగిన ఈ మ్యాచ్లో ఆయన 12 పరుగులు చేయడంతో పాటు 2 వికెట్లు తీశారు. ఒక ఆటగాడు గాయపడటంతో అనూహ్యంగా టోనీకి ఈ అవకాశం వచ్చింది. ఆసక్తికరమైన విషయం ఏమిటంటే.. దేశం తరపున ఆ టెస్ట్ మ్యాచ్ ఆడేందుకు ఆయన తన వివాహాన్ని కూడా వాయిదా వేసుకున్నారు. అయితే ఆ మ్యాచ్ తర్వాత ఆయనకు ఇంగ్లాండ్ జట్టులో మళ్లీ చోటు దక్కలేదు.
చిన్న వయసులోనే ససెక్స్ జట్టులో చేరిన పిగోట్, 1978లో సర్రే జట్టుతో జరిగిన ఫస్ట్ క్లాస్ మ్యాచ్లో హ్యాట్రిక్ సాధించి అందరి దృష్టిని ఆకర్షించారు. క్రికెట్ నుండి రిటైర్ అయిన తర్వాత ఆయన ససెక్స్ క్లబ్కు చీఫ్ ఎగ్జిక్యూటివ్ ఆఫీసర్ (CEO)గా కూడా సేవలందించారు.
Also Read: మరోసారి ధనుష్తో జత కట్టనున్న సాయి పల్లవి!
We are saddened to learn of the passing of former Sussex Cricket player and Chief Executive, Tony Pigott. 💙 pic.twitter.com/IQdtbcJk9l
— Sussex Cricket (@SussexCCC) February 2, 2026
ససెక్స్ క్రికెట్ సంతాపం
టోనీ పిగోట్ మృతి పట్ల ససెక్స్ క్రికెట్ క్లబ్ సోషల్ మీడియా వేదికగా తీవ్ర దిగ్భ్రాంతి వ్యక్తం చేసింది. “ససెక్స్ మాజీ ఆటగాడు. చీఫ్ ఎగ్జిక్యూటివ్ ఆఫీసర్ టోనీ పిగోట్ మరణవార్త వినడం మాకు ఎంతో బాధ కలిగించింది” అని పేర్కొంది.
డొమెస్టిక్ కెరీర్ గణాంకాలు
టోనీ పిగోట్ తన సుదీర్ఘ డొమెస్టిక్ కెరీర్లో అద్భుతమైన రికార్డులను కలిగి ఉన్నారు.
ఫస్ట్ క్లాస్ క్రికెట్: 260 మ్యాచ్ల్లో 19.28 సగటుతో 4841 పరుగులు చేయడమే కాకుండా, 672 వికెట్లు పడగొట్టారు. ఇందులో 26 సార్లు ఐదు వికెట్ల ప్రదర్శన ఉంది.
లిస్ట్ A క్రికెట్: 270 మ్యాచ్ల్లో 1727 పరుగులు, 377 వికెట్లు తన ఖాతాలో వేసుకున్నారు.