Hardik Pandya: టీ-20 క్రికెట్లో టీమ్ ఇండియా అద్భుత ప్రదర్శన కొనసాగుతోంది. సూర్యకుమార్ యాదవ్ పగ్గాలు చేపట్టినప్పటి నుండి భారత జట్టు ఈ ఫార్మాట్లో దూసుకుపోతోంది. అయితే టీమ్ ఇండియాకు అనేక చిరస్మరణీయ విజయాలను అందించడంలో హార్దిక్ పాండ్యా పాత్ర అత్యంత కీలకం. కేవలం బ్యాట్తోనే కాకుండా బంతితో కూడా అతను అద్భుతాలు చేస్తున్నాడు. టీ-20 ప్రపంచకప్ టైటిల్ను గెలవడంలోనూ హార్దిక్ కీలక పాత్ర పోషించాడు.
వైట్ బాల్ క్రికెట్లో భారత జట్టు బ్యాటింగ్, బౌలింగ్ విభాగాలకు హార్దిక్ వెన్నెముక వంటివాడు. గతంలోనే అతను కెప్టెన్ అయ్యే అవకాశం కొద్దిలో చేజారింది. కానీ రాబోయే కాలంలో సెలక్టర్లు జట్టు బాధ్యతలను హార్దిక్ చేతికి అప్పగించే అంశాన్ని పరిశీలించవచ్చు. హార్దిక్ తదుపరి టీ-20 కెప్టెన్ కావడానికి గల 5 ప్రధాన కారణాలు ఇప్పుడు తెలుసుకుందాం.
సూర్యకుమార్ యాదవ్ ఫామ్ తగ్గడం
కెప్టెన్సీ చేపట్టినప్పటి నుండి సూర్యకుమార్ యాదవ్ వ్యక్తిగత ఫామ్ ఆందోళన కలిగిస్తోంది. కెప్టెన్గా రాణిస్తున్నప్పటికీ బ్యాటర్గా ఆయన వైఫల్యం జట్టుపై ప్రభావం చూపుతోంది. ఆయన ఫామ్ ఇలాగే కొనసాగితే ప్లేయింగ్ 11లో ఆయన స్థానంపై ప్రశ్నలు తలెత్తవచ్చు. అప్పుడు సెలక్టర్లు సహజంగానే హార్దిక్ వైపు మొగ్గు చూపే అవకాశం ఉంది.
Also Read: పాలు తాగడం అందరికీ మంచిది కాదా? డాక్టర్ల కొత్త హెచ్చరిక!
టీ-20 ప్రపంచకప్ 2026 ఫలితం
సూర్యకుమార్ కెప్టెన్సీకి అసలైన పరీక్ష 2026 టీ-20 ప్రపంచకప్లో ఎదురుకానుంది. సొంతగడ్డపై జరిగే ఈ మెగా టోర్నీలో భారత్ తన టైటిల్ను నిలబెట్టుకోవడంలో విఫలమైతే కెప్టెన్సీ మార్పు అనివార్యం కావచ్చు. అటువంటి పరిస్థితుల్లో అనుభవం ఉన్న హార్దిక్ మొదటి ఛాయిస్ అవుతాడు.
కెప్టెన్గా హార్దిక్ అద్భుత రికార్డు
హార్దిక్ పాండ్యాకు టీ-20 కెప్టెన్గా మంచి ట్రాక్ రికార్డ్ ఉంది. అంతర్జాతీయ స్థాయిలో అతను కెప్టెన్సీ వహించిన 16 మ్యాచ్లలో భారత్ 10 మ్యాచ్ల్లో విజయం సాధించింది. కేవలం 5 మ్యాచ్ల్లోనే ఓడిపోయింది. IPLలో గుజరాత్ టైటాన్స్ను మొదటి సీజన్లోనే ఛాంపియన్గా నిలబెట్టాడు. రెండో సీజన్లో ఫైనల్కు చేర్చాడు. సెలక్టర్ల దృష్టిలో ఇది పెద్ద సానుకూల అంశం.
గిల్కు టీ-20 కెప్టెన్సీ కష్టమే
శుభ్మన్ గిల్ టెస్టులు, వన్డేల్లో బ్యాటర్గా కెప్టెన్గా రాణిస్తున్నప్పటికీ టీ-20 ఫార్మాట్లో మాత్రం ఇబ్బంది పడుతున్నాడు. ఈ ఏడాది పొట్టి ఫార్మాట్లో గిల్ ప్రదర్శన ఆశాజనకంగా లేదు. టీ-20 ప్రపంచకప్ జట్టులో కూడా అతనికి చోటు దక్కలేదు. కాబట్టి గిల్ కంటే హార్దిక్కే కెప్టెన్సీ అవకాశాలు మెండుగా ఉన్నాయి.
ఆల్రౌండర్గా తిరుగులేని ప్రదర్శన
టీ-20 ఇంటర్నేషనల్స్లో హార్దిక్ పాండ్యా రికార్డులు అమోఘం. భారత్ తరపున టీ-20ల్లో 2 వేల పరుగులు, 100 వికెట్లు తీసిన ఏకైక ఆటగాడు హార్దిక్. 2025లో ఆడిన 12 ఇన్నింగ్స్లలో 153 స్ట్రైక్ రేట్తో 302 పరుగులు చేయడమే కాకుండా, 12 వికెట్లు కూడా పడగొట్టాడు. అతని మ్యాచ్ విన్నింగ్ సామర్థ్యం అతడిని కెప్టెన్సీ రేసులో ముందుంచుతోంది.