విడాకులు తీసుకున్న మ‌రో టీమిండియా క్రికెట‌ర్!

Rahul Chahar: భారత క్రికెటర్ రాహుల్ చాహర్- ఈషానీ జోహార్ ఇప్పుడు విడిపోయారు. వివాహమైన దాదాపు 4 ఏళ్ల తర్వాత రాహుల్, ఈషానీ నుండి విడాకులు తీసుకున్నారు. వీరిద్దరూ పరస్పర అంగీకారంతో విడాకులు తీసుకోవాలని నిర్ణయించుకున్నారు. రాహుల్ స్వయంగా తన సోషల్ మీడియా ఖాతాలో పోస్ట్ చేస్తూ ఈ విషయాన్ని వెల్లడించారు. తాను చాలా చిన్న వయసులో వివాహం చేసుకున్నానని, ఆ సమయంలో తనను తాను, తన విలువను, జీవిత దిశను పూర్తిగా అర్థం చేసుకోలేకపోయానని రాహుల్ తన పోస్ట్‌లో పేర్కొన్నారు. రాహుల్- ఈషానీ వివాహం మార్చి 2022లో జరిగింది. అప్పుడు రాహుల్ వయస్సు కేవలం 22 ఏళ్లు మాత్రమే.

విడాకుల వివరాలను స్వయంగా వెల్లడించిన రాహుల్ చాహర్

26 ఏళ్ల స్పిన్నర్ రాహుల్ చాహర్ సోషల్ మీడియా వేదికగా విడాకుల సమాచారాన్ని అందించారు. రాహుల్ తన పోస్ట్‌లో ఇలా రాశారు. నేను చాలా చిన్న వయసులో పెళ్లి చేసుకున్నాను. అప్పుడు నా గురించి, నా విలువ గురించి, నా జీవిత లక్ష్యం గురించి నాకు సరైన అవగాహన లేదు అని పేర్కొన్నారు. గత 15 నెలలుగా కోర్టుల చుట్టూ తిరుగుతూ ఓర్పు, సహనం, సత్యం శక్తిని తాను దగ్గరగా అనుభవించానని ఆయన తెలిపారు. ఇప్పుడు చట్టపరమైన ప్రక్రియ పూర్తయిందని, తన జీవితంలోని ఈ అధ్యాయం ముగిసిందని ఆయన పేర్కొన్నారు.

Also Read: ఈ దేశాల్లో బంగారు నాణేలు చలామణి!

రాహుల్ ఇంకా ఇలా అన్నారు. నేను ఈ అధ్యాయాన్ని కోపంతోనో లేదా పశ్చాత్తాపంతోనో కాకుండా, స్పష్టతతో ముగిస్తున్నాను. కొన్ని బంధాలు శాశ్వతం కాదు. అవి మనల్ని మేల్కొల్పడానికి, నేర్పించడానికి, మార్చడానికి వస్తాయని పేర్కొన్నాడు. ఇప్పుడు తాను గతంలో కంటే తెలివిగా, ఆత్మవిశ్వాసంతో, భవిష్యత్తుపై స్పష్టతతో ఉన్నానని ఆయన చెప్పారు.

పోస్ట్ చివరలో రాహుల్ దీనిని ఒక ముగింపుగా కాకుండా కొత్త ఆరంభంగా అభివర్ణించారు. ఇకపై తన జీవితాన్ని ఆత్మగౌరవం, శాంతి, మెరుగైన నిర్ణయాల పునాదిపై ముందుకు తీసుకెళ్తానని చెప్పారు. ఎటువంటి చేదు జ్ఞాపకాలు లేకుండా కేవలం నేర్చుకున్న పాఠాలు, గౌరవం, కొత్త ఆరంభం చేసే ధైర్యంతో ముందుకు సాగుతున్నట్లు ఆయన స్పష్టం చేశారు.

2022లో రాహుల్ – ఈషానీ వివాహం

రాహుల్ చాహర్- ఈషానీ జోహార్ వివాహం మార్చి 9, 2022న గోవాలో జరిగింది. అంతకుముందు 2019లో జైపూర్‌లో వీరిద్దరికీ నిశ్చితార్థం జరిగింది. వీరి వివాహ వేడుకలో కేవలం కుటుంబ సభ్యులు మాత్రమే పాల్గొన్నారు. ఇందులో రాహుల్ సోదరుడు, భారత స్టార్ బౌలర్ దీపక్ చాహర్ కూడా ఉన్నారు. ఆ సమయంలో ఈ పెళ్లి బాగా చర్చనీయాంశమైంది. ఎందుకంటే రాహుల్ అప్పటికే ఐపీఎల్‌లో హిట్ అయ్యి, టీమ్ ఇండియాలో చోటు కోసం ప్రయత్నిస్తున్నారు. అలాగే ఆయన చిన్న వయసులో పెళ్లి చేసుకోవడం కూడా మీడియాలో హెడ్ లైన్స్‌గా నిలిచింది. కానీ ఇప్పుడు పెళ్లి జరిగిన నాలుగో వార్షికోత్సవం కంటే ముందే వీరి బంధం విడిపోయింది.