India WTC Final: భారత్-న్యూజిలాండ్ మధ్య మూడు మ్యాచ్‌ల టెస్ట్ సిరీస్ జరగగా కివీస్ జట్టు 3-0తో గెలిచింది. అయితే సిరీస్ కోల్పోయిన తర్వాత కూడా టీం ఇండియాకు మూడో టెస్టులో విజయం సాధించే అవకాశం వచ్చింది. కానీ జట్టు 147 పరుగుల లక్ష్యాన్ని కూడా అందుకోలేకపోయింది. ఈ ఓటమి తర్వాత వరల్డ్ టెస్ట్ ఛాంపియన్షిప్ పాయింట్ల పట్టికలో టీమిండియా ఘోర పరాజయాన్ని చవిచూసింది. నిజానికి ముంబై టెస్టులో ఓడిన టీమిండియా డబ్ల్యూటీసీ పాయింట్ల పట్టికలో (India WTC Final) కూడా మొదటి స్థానాన్ని కోల్పోయింది. ఇప్పుడు జట్టు ఫైనల్ ఆడడం చాలా కష్టంగా కనిపిస్తోంది.
WTC పాయింట్ల పట్టికలో భారత్‌కు షాక్
ప్రపంచ టెస్ట్ ఛాంపియన్షిప్ 2023-25 పాయింట్ల పట్టికలో టీమ్ ఇండియాకు భారీ ఎదురుదెబ్బ తగిలింది. ఎందుకంటే ముంబై టెస్టుకు ముందు టీమిండియా పాయింట్ల పట్టికలో మొదటి స్థానంలో ఉంది. అయితే ఈ మ్యాచ్‌లో ఓడిన టీమిండియా రెండో స్థానానికి పడిపోయింది. ఆస్ట్రేలియా మొదటి స్థానానికి చేరుకుంది. టీమిండియా ఇప్పటి వరకు 14 మ్యాచ్‌ల్లో 8 విజయాలు, 5 ఓటములను ఎదుర్కొని 98 పాయింట్లతో ఉంది. జట్టు PCT 58.330. కాగా ఆస్ట్రేలియా 12 మ్యాచ్‌ల్లో 8 విజయాలు నమోదు చేసింది. శ్రీలంక మూడో స్థానంలో, న్యూజిలాండ్ నాలుగో స్థానంలో, దక్షిణాఫ్రికా 5వ స్థానంలో ఉన్నాయి.
Also Read: Ajaz Patel: టీమిండియాను వ‌ణికించిన అజాజ్ ప‌టేల్ ఎవ‌రో తెలుసా? ఒక‌ప్ప‌టి భార‌తీయుడే!
టీమిండియా ఫైన‌ల్‌కు వెళ్లాలంటే..
భారత జట్టు ఇప్పుడు బోర్డర్-గవాస్కర్ ట్రోఫీ ఆడాల్సిన ఆస్ట్రేలియాలో పర్యటించాల్సి ఉంది. ఇరు జట్లు ఒకదానితో ఒకటి 5 మ్యాచ్‌ల సిరీస్‌ను ఆడనున్నాయి. అయితే WTCని దృష్టిలో ఉంచుకుని ఈ సిరీస్ రెండు జట్లకు ముఖ్యమైనది. ఇప్పుడు భారత్‌కు ఎలాగైనా సిరీస్ గెలవడం తప్పనిసరి అయింది. ఇప్పటి వరకు కేవలం సిరీస్ మాత్రమే కాకుండా 5లో 4 విజయాలు నమోదు చేయాల్సి ఉంది. కాగా ఒక మ్యాచ్ డ్రాగా ముగియాల్సి ఉంటుంది. అప్పుడే టీమ్ ఇండియా డబ్ల్యూటీసీ ఫైనల్‌లో చోటు దక్కించుకోగలదు. ఎందుకంటే టీమిండియాకు శ్రీలంక, న్యూజిలాండ్, దక్షిణాఫ్రికా గట్టి పోటీనిస్తున్నాయి.
ముంబై టెస్టులో ఘోర పరాజయం
ముంబై టెస్టులో టీమిండియా 25 పరుగుల తేడాతో ఓడిపోయింది. తొలుత ఆడిన న్యూజిలాండ్ 235 పరుగులు చేసింది. దీనికి సమాధానంగా టీమిండియా 263 పరుగులకు ఆలౌటైంది. టీమ్ ఇండియా ఆధిక్యం సాధించింది. అయితే ఈ ఆధిక్యం జట్టుకు సహకరించలేకపోయింది. ఆ తర్వాత మూడో ఇన్నింగ్స్‌లో 174 పరుగులు చేసిన కివీస్ జట్టు భారత్‌కు 147 పరుగుల లక్ష్యాన్ని అందించింది. ఈ స్వల్ప లక్ష్యాన్ని ఛేదించేందుకు వచ్చిన టీమిండియా 121 పరుగులకే కుప్పకూలడంతో 25 పరుగుల తేడాతో ఓటమి పాలైంది.