Tennis Star Jailed :బోరిస్ బెకర్ కు రెండున్నరేళ్ల జైలు శిక్ష

టెన్నిస్ ప్రపంచంలో తనకంటూ ప్రత్యేక గుర్తింపు తెచ్చుకున్న జర్మన్ దిగ్గజ ఆటగాడు బోరిస్ బెకర్. సంచలన ఆటతీరుతో 17 ఏళ్లకే ఎంట్రీ ఇచ్చి కొద్ది కాలంలోనే స్టార్ ప్లేయర్ గా ఎదిగిన బెకర్ తన కెరీర్ లో ఆరు గ్రాండ్ స్లామ్ టైటిల్స్ గెలిచాడు. అయితే రిటైర్మెంట్ తర్వాత అతను చేసిన తప్పిదాలు ఇప్పుడు బెకర్ ను జైలు శిక్ష అనుభవించేలా చేశాయి. ఎంతో మంది యువ ఆటగాళ్లకు స్ఫూర్తిగా నిలిచిన బెకర్ బ్యాంకులను మోసం చేసిన అప్రతిష్ట మూట కట్టుకున్నాడు.
దివాలా కేసులో మాజీ టెన్నిస్ గ్రేట్ బోరిస్ బెకర్‌కు కోర్టు రెండున్నరేళ్ల జైలు శిక్ష విధించింది. అతను దివాలా తీసిన తర్వాత బ్యాంకు ఖాతా నుంచి వేల డాలర్లను అక్రమంగా బదిలీ చేసినందుకు కోర్టు అతన్ని దోషిగా నిర్ధారించింది. మూడుసార్లు వింబుల్డన్ ఛాంపియన్‌గా నిలిచిన అతను ఈ నెల ప్రారంభంలో దివాలా చట్టం కింద నాలుగు ఆరోపణలకు పాల్పడ్డాడు. ఈ కేసులో గరిష్టంగా ఏడేళ్ల జైలు శిక్ష పడనుంది. జూన్ 2017లో దివాలా తీసిన తర్వాత జర్మన్ ఆటగాడు తన మాజీ భార్య బార్బరా, షిర్లీ లిలీ బేకర్‌తో సహా ఇతర ఖాతాలకు తన వ్యాపార ఖాతా నుంచి వందల వేల పౌండ్‌లను బదిలీ చేశాడు. అతను జర్మనీలో ఆస్తిని ప్రకటించడంలో విఫలమైనందుకుగాను 825,000 యూరోల బ్యాంకు రుణాలు, టెక్ సంస్థలో షేర్లను దాచిపెట్టినందుకు కూడా దోషిగా నిర్ధారించారు.
ఈ జర్మన్ ఆటగాడు రెండు వింబుల్డన్ ట్రోఫీలు, ఒలింపిక్ బంగారు పతకంతో సహా అనేక అవార్డులను అందజేయడంలో విఫలమయ్యాడనే ఆరోపణతో సహా మరో 20 ఆరోపణలపై అతను నిర్దోషిగా ప్రకటించారు. కోర్టు విధించిన శిక్షలో సగం కాలం జైలులోనే గడపాల్సి ఉంటుంది.