Virat Kohli: కింగ్ కోహ్లీని (Virat Kohli) రిటైర్మెంట్ తీసుకోవడానికి బలవంతం చేశారా? విరాట్ ఒత్తిడిలో తన ఇష్టమైన ఫార్మాట్‌కు వీడ్కోలు చెప్పాడా? ఇలాంటి అనేక ప్రశ్నలు ఈ సమయంలో ప్రతి క్రికెట్ అభిమాని హృదయంలో మెదులుతున్నాయి. కోహ్లీ రిటైర్మెంట్ గురించి వెల్లడైన విషయం ప్రతి ఒక్కరి పాదాల కింద నేల కదిలిపోయేలా చేసింది. మే 12న కోహ్లీ తన ఇన్‌స్టాగ్రామ్ ఖాతాలో భావోద్వేగ పోస్ట్ రాస్తూ క్రికెట్‌లో అత్యంత పొడవైన ఫార్మాట్ నుంచి రిటైర్మెంట్ ప్రకటించాడు. 36 సంవత్సరాల వయస్సులో కోహ్లీ రిటైర్మెంట్ వార్త ప్రతి ఒక్కరినీ ఆశ్చర్యపరిచింది. అయితే విరాట్ రిటైర్మెంట్‌పై వెలుగులోకి వచ్చిన సంచలనాత్మక వార్త బహుశా ఏ భారతీయ క్రికెట్ అభిమానికి నచ్చకపోవచ్చు.
కోహ్లీ రిటైర్మెంట్‌పై కీల‌క విషయం వెల్ల‌డి
విరాట్ కోహ్లీ రిటైర్మెంట్‌కు ముందే అతను రిటైర్ కాబోతున్నాడ‌నే ఊహాగానాలు తీవ్రంగా వచ్చాయి. కోహ్లీ తన రిటైర్మెంట్ గురించి బీసీసీఐకి తెలియజేశాడని రిపోర్ట్‌లు వెలువడ్డాయి. భారత క్రికెట్ బోర్డు కోహ్లీని ఒప్పించే ప్రయత్నంలో ఉందని, అతను ఇంగ్లాండ్ టూర్‌కు ఉండాల‌ని బీసీసీఐ విరాట్‌ను కోరిన‌ట్లు నివేదిక‌లు వచ్చాయి. అయితే దైనిక్ జాగరణ్‌లోని తాజా రిపోర్ట్‌లో వెల్లడైన విషయం ప్రతి ఒక్కరినీ షాక్‌కు గురిచేసింది. రిపోర్ట్ ప్రకారం.. బీసీసీఐ కోహ్లీని రిటైర్మెంట్ తీసుకోవద్దని ఎలాంటి విన్నపం చేయలేదని పేర్కొంది. కోహ్లీకి టెస్టు జట్టులో స్థానం క‌ష్ట‌మ‌ని, ఫామ్ కారణంగా అతనికి స్థానం లభించడం లేదని బీసీసీఐ సందేశం అందించినట్లు రిపోర్ట్‌లో పేర్కొన్నారు. బీసీసీఐ అధికారి ఒక‌రు దైనిక్ జాగరణ్‌తో మాట్లాడుతూ.. “బీసీసీఐ ఎవరినీ వేడుకోదు. ఒక ఆటగాడి నిర్ణయం అతని వ్యక్తిగత ఎంపిక. మేము దానిలో ఎలాంటి జోక్యం చేసుకోము” అని చెప్పారు.
Also Read: Neeraj Chopra: ఇక‌పై లెఫ్టినెంట్ కల్నల్‌గా నీరజ్‌ చోప్రా.. ఆయ‌న జీతం ఎంతో తెలుసా?
మీటింగ్‌లో నిర్ణయం ఖరారు
ఆయ‌న మ‌రింత మాట్లాడుతూ.. “మే 7న ముంబైలో ఒక మీటింగ్ జరిగింది. అక్కడ రోహిత్ శర్మకు అతనికి టెస్టు జట్టులో స్థానం ఇవ్వ‌డం కుద‌ర‌ద‌ని చెప్పారు. అదే సమయంలో కోహ్లీకి కూడా ఇదే సందేశం ఇచ్చారు. అయితే, అతని తుది నిర్ణయం కోసం వేచి చూశారు” అని పేర్కొన్నారు. కోహ్లీ బ్యాట్ ఆస్ట్రేలియా టూర్‌లో పూర్తిగా నిశ్శబ్దంగా ఉంది. విరాట్ ఐదు టెస్ట్ మ్యాచ్‌లలో కేవలం 23 సగటుతో 190 పరుగులు మాత్రమే చేయగలిగాడు. అలాగే న్యూజిలాండ్‌తో జరిగిన హోమ్ సిరీస్‌లో కోహ్లీ ఆరు ఇన్నింగ్స్‌లలో కేవలం 93 పరుగులు మాత్రమే సాధించాడు.