బంగ్లాదేశ్ ఆట‌గాడిపై నిషేధం విధించిన బీసీసీఐ.. కార‌ణ‌మిదేనా?

Mustafizur Rahman: బంగ్లాదేశ్ ఫాస్ట్ బౌలర్ ముస్తాఫిజుర్ రెహమాన్‌ను జట్టు నుంచి విడుదల చేయాలని భారత క్రికెట్ నియంత్రణ మండలి (BCCI), ఐపీఎల్ ఫ్రాంచైజీ కోల్‌కతా నైట్ రైడర్స్ (KKR)ను ఆదేశించింది. దీనితో ముస్తాఫిజుర్ రెహమాన్ ఇకపై ఐపీఎల్ 2026లో ఆడలేరు. అయితే అసలు బీసీసీఐ ఈ కఠిన నిర్ణయం ఎందుకు తీసుకోవాల్సి వచ్చింది? ఇంత వివాదం జరుగుతున్నా కేకేఆర్ స్వయంగా ఎందుకు అతడిని తొలగించలేదు? దీనికి సంబంధించిన పూర్తి వివరాలు ఇప్పుడు తెలుసుకుందాం.

వివాదానికి నేపథ్యం

ముస్తాఫిజుర్ రెహమాన్‌ను ఐపీఎల్ 2026 వేలంలో కేకేఆర్ ఫ్రాంచైజీ రూ. 9.20 కోట్లకు కొనుగోలు చేసింది. అయితే ఇటీవల బంగ్లాదేశ్‌లో హిందూ మైనారిటీలపై జరుగుతున్న దాడుల నేపథ్యంలో సోషల్ మీడియాలో నిరసనలు వెల్లువెత్తాయి. కేకేఆర్ జట్టు యజమాని షారుఖ్ ఖాన్ పైన, అలాగే బీసీసీఐపైన తీవ్ర స్థాయిలో విమర్శలు వచ్చాయి. బంగ్లాదేశీ ఆటగాడిని ఐపీఎల్‌లో ఎలా ఆడిస్తారని పలువురు రాజకీయ నాయకులు కూడా ప్రశ్నించారు. ఈ వివాదం ముదురుతుండటంతో బీసీసీఐ జోక్యం చేసుకుని, ముస్తాఫిజుర్‌ను విడుదల చేయాలని కేకేఆర్‌ను ఆదేశించింది.

KKR స్వయంగా ఎందుకు బయటకు పంపలేదు?

వేలంలో ఒక ఆటగాడిని కొనుగోలు చేసిన తర్వాత ఫ్రాంచైజీకి అతడిని నేరుగా తొలగించే అధికారం ఉండదు. ఐపీఎల్ నిబంధనల ప్రకారం.. ఒక ఆటగాడు గాయపడినా వ్యక్తిగత కారణాలతో అందుబాటులో లేకపోయినా లేదా తనే స్వయంగా తప్పుకున్నా మాత్రమే జట్టు నుంచి తొలగించవచ్చు. ఫిట్‌గా ఉండి అందుబాటులో ఉన్న ఆటగాడిని ఫ్రాంచైజీ స్వయంగా తీసేయలేదు. అందుకే బీసీసీఐ నేరుగా రంగంలోకి దిగి ఆదేశాలు జారీ చేయాల్సి వచ్చింది. బోర్డు ఆదేశాల మేరకు మాత్రమే ఫ్రాంచైజీలు ఇలాంటి నిర్ణయం తీసుకోగలవు.

Also Read: మీ గోళ్లపై నల్లటి చారలు ఏర్ప‌డుతున్నాయా?

ముందున్న పెద్ద ప్రశ్నలు

టీ20 వరల్డ్ కప్ 2026 పరిస్థితి

వచ్చే నెలలో జరగనున్న టీ20 వరల్డ్ కప్ కోసం బంగ్లాదేశ్ జట్టు భారత్‌కు రావాల్సి ఉంది. ఫిబ్రవరి 7 నుంచి ప్రారంభమయ్యే ఈ టోర్నీలో బంగ్లాదేశ్ మ్యాచ్‌లు భారత్‌లోనే జరగాలి. తాజా పరిణామాల నేపథ్యంలో పాకిస్థాన్ మాదిరిగానే బంగ్లాదేశ్ కూడా భారత్ రాకుండా తమ మ్యాచ్‌లను శ్రీలంకలో ఆడుతుందా? అన్నది ఇప్పుడు సందిగ్ధంగా మారింది.

విదేశీ లీగ్‌లలో బంగ్లా ఆటగాళ్లు

ఐపీఎల్ ఫ్రాంచైజీల యజమానులకే విదేశీ లీగ్‌లలో కూడా జట్లు ఉన్నాయి (ఉదాహరణకు ILT20లో MI ఎమిరేట్స్). ప్రస్తుతం ఆ జట్టులో బంగ్లాదేశ్ స్టార్ షకీబ్ అల్ హసన్ ఆడుతున్నారు. భారత్ తీసుకున్న ఈ నిర్ణయం ప్రభావం ఆ లీగ్‌లపై కూడా పడుతుందా? ఇతర లీగ్‌ల నుంచి కూడా బంగ్లా ఆటగాళ్లను తొలగిస్తారా? అనేది చూడాలి.