Rohit Sharma: 13 నవంబర్ 2014… భారత క్రికెట్ చరిత్రలో కోల్కతాలోని ఈడెన్ గార్డెన్స్ ఒక అద్భుతాన్ని చూసిన రోజు అది. ఆ అద్భుతాన్ని బహుశా ఎవరూ పునరావృతం చేయలేరేమో! ఆ రోజున రోహిత్ శర్మ (Rohit Sharma) శ్రీలంకపై ఏం చేశారో? అది క్రికెట్ పుస్తకాల్లో “అసాధ్యాన్ని సుసాధ్యం” చేసిన ఘట్టంగా నిలిచిపోయింది. వన్డే క్రికెట్లో అత్యధిక వ్యక్తిగత స్కోరు 264 పరుగులు నేటికీ ఆయన పేరిట ఉంది. దీనిని సాధించి సరిగ్గా 10 సంవత్సరాలు పూర్తయ్యాయి.
కోల్కతాలో సృష్టించిన చరిత్ర
శ్రీలంకతో జరిగిన ఆ మ్యాచ్లో భారత్ మొదట బ్యాటింగ్ చేసింది. ప్రారంభం కొంచెం నెమ్మదిగా ఉన్నా రోహిత్ శర్మ సహనంతో ఆరంభించి, నెమ్మదిగా తన ఇన్నింగ్స్ను ముందుకు తీసుకెళ్లారు. ఒకసారి లయ దొరికిన తర్వాత ఈడెన్ గార్డెన్స్ ప్రతి మూల “హిట్మ్యాన్” నినాదాలతో దద్దరిల్లింది. రోహిత్ కేవలం 173 బంతుల్లో 33 ఫోర్లు, 9 సిక్సర్లు కొట్టారు. ఆయన కొట్టిన ప్రతి షాట్లో సమయపాలన, శక్తి, క్లాస్ కనిపించాయి.
Also Read: Sakhi Suraksha : మహిళల కోసం ‘సఖి సురక్ష’ ప్రారంభించబోతున్న కూటమి సర్కార్
‘హిట్మ్యాన్’ అనే పేరుకి ఆరంభం
ఈ ఇన్నింగ్స్ తర్వాత క్రికెట్ ప్రపంచంలో రోహిత్ శర్మకు “హిట్మ్యాన్” అనే కొత్త పేరు వచ్చింది. రోహిత్ ఈ పేరు ఆయన బ్యాటింగ్ శైలికి ప్రతీకగా మారింది. ఆయన తన సమయపాలనను దూకుడుగా కొట్టే స్ట్రోక్స్తో కలిపి ఒక సమతుల్యతను సాధించారు. ఇది ప్రత్యర్థులకు ఊపిరి పీల్చుకునే అవకాశం కూడా ఇవ్వలేదు. ఆ ఇన్నింగ్స్ తర్వాత రోహిత్ శర్మ వైట్ బాల్ క్రికెట్లో తిరుగులేని రారాజు అయ్యారు. అంతేకాదు వన్డేల్లో మూడు డబుల్ సెంచరీలు చేసిన ఏకైక బ్యాట్స్మెన్ కూడా ఆయనే.
శ్రీలంకపై రోహిత్ ప్రతాపం
రోహిత్ శర్మ అద్భుతమైన ఈ ఇన్నింగ్స్ కారణంగా భారత్ 50 ఓవర్లలో 404/5 పరుగుల భారీ స్కోరును నమోదు చేసింది. శ్రీలంక బౌలర్లు నువాన్ కులశేఖర అయినా.. ఏంజెలో మాథ్యూస్ అయినా అందరి బంతులు “హిట్మ్యాన్” బ్యాటింగ్ ముందు తేలిపోయాయి. దీనికి సమాధానంగా శ్రీలంక జట్టు 43.1 ఓవర్లలో కేవలం 251 పరుగులకే ఆలౌట్ అయ్యింది. భారత్ ఈ మ్యాచ్ను 153 పరుగుల తేడాతో గెలుచుకుంది.
నేటికీ చెక్కుచెదరని రికార్డు
10 సంవత్సరాలు గడిచిపోయాయి. చాలా మంది గొప్ప బ్యాట్స్మెన్లు వచ్చారు.. వెళ్లారు. కానీ వన్డేల్లో 264 పరుగుల రికార్డును ఇప్పటికీ ఎవరూ బద్దలు కొట్టలేకపోయారు. “శర్మా జీ కా బేటా” మైదానంలో తుఫానులా చెలరేగిన ఆ రోజును అభిమానులు ఇప్పటికీ గుర్తు చేసుకుంటారు.