IND vs SL: ద్రావిడ్ చేతుల మీదుగా స్పెషల్ క్యాప్.. కోహ్లీ భావోద్వేగం

666

టెస్ట్ క్రికెట్ లో వంద మ్యాచ్ లు ఆడడం సాధారణ విషయం కాదు…ఆ మాటకు వస్తే టీ ట్వంటీ ఫార్మాట్ క్రేజ్ పెరిగిపోతున్న వేళ సంప్రదాయ క్రికెట్ లో నిలకడగా కొనసాగడం అంత సులువు కాదు.నిజానికి ఈ ఆటగాడు ప్రతిభకు టెస్ట్ క్రికెట్ నే కొలమానంగా చెప్తారు. అందుకే ఈ ఫార్మాట్ లో రాణిస్తే ఆ ప్లేయర్ కు తిరుగు లేనట్టే. భారత్ క్రికెట్ లో రికార్డుల రారాజుగా పేరు తెచ్చుకున్న విరాట్ కోహ్లీ ఇప్పుడు టెస్టుల్లో వంద మ్యాచ్ లు పూర్తి చేసుకున్నాడు. లంకతో మొహాలీ వేదికగా ప్రారంభమైన తొలి టెస్టు తో కోహ్లీ ఈ మైలురాయి అందుకున్నాడు. ప్రత్యేకమయిన మ్యాచ్ కావడంతో బీసీసీఐ కూడా ప్రత్యేక ఏర్పాట్లు చేసింది. వందో టెస్ట్ సందర్భంగా ఆట ఆరంభానికి ముందు కోహ్లీ నీ సత్కరించింది. కోచ్ రాహుల్ ద్రావిడ్ చేతుల మీదుగా ప్రత్యేకంగా రూపొందించిన క్యాప్ ను అందించింది. ఈ సందర్భంగా కోహ్లీ తీవ్ర భావోద్వేగానికి గురయ్యాడు.

కోహ్లీ సతీమణి అనుష్క శర్మను కూడా మైదానంలోకి ఆహ్వానించి , జట్టు సహచరులు ముందు ద్రావిడ్ ఈ జ్ఞాపికను అందజేశారు.ఇది తనకు చాలా ప్రత్యేకమైన క్షణమనీ, తన భార్య , సోదరుడు కూడా ఇక్కడే ఉన్నారనీ, అందరూ చాలా గర్వంగా ఉన్నారన్నాడు . బీసీసీఐకి కూడా ధన్యవాదాలన్న కోహ్లీ అభిమానుల రాకతో ఈ మ్యాచ్ మరింత ప్రత్యేకంగా నిలిచిందనీ ఎమోషనల్ అయ్యాడు. కాగా 90 ఏళ్ల భారత టెస్టు క్రికెట్ చరిత్రలో కేవలం 11 మంది క్రికెటర్లు మాత్రమే ఈ ఘనత సాధించగలిగారు. ఇప్పుడు కోహ్లీ 12వ భారత ఆటగాడిగా వంద టెస్టుల క్లబ్ లో చేరాడు. ఈ మ్యాచ్ కోసం బీసీసీఐ 50 శాతం మంది అభిమానులను అనుమతించడం తో చాలా రోజుల తర్వాత మొహాలీ క్రికెట్ స్టేడియం కోహ్లీ కోహ్లీ అంటూ ఫాన్స్ నినాదాలతో హోరెత్తిపోయింది.