Uni-GAUGE 2026 Exam : ఇంజనీరింగ్ విద్యను అభ్యసించాలనుకునే విద్యార్థులకు కీలకమైన ‘కామెడ్కె యుజిఇటి (COMEDK UGET) / యూని-గేజ్ (Uni-GAUGE) 2026’ ప్రవేశ పరీక్ష ప్రకటన విడుదలైంది. ఈ ఏడాది మే 09న దేశవ్యాప్తంగా ఈ పరీక్షను నిర్వహించనున్నారు. కర్ణాటకలోని 150కి పైగా ప్రముఖ ప్రైవేట్ ఇంజనీరింగ్ కళాశాలలతో పాటు, దేశవ్యాప్తంగా ఉన్న 30కి పైగా ప్రసిద్ధ విశ్వవిద్యాలయాలలో ప్రవేశం పొందడానికి ఈ పరీక్ష ఒక బంగారు అవకాశంగా నిలుస్తోంది. సుమారు 1,40,000 మంది విద్యార్థులు ఈ జాతీయ స్థాయి కంప్యూటర్ ఆధారిత పరీక్షకు హాజరవుతారని అధికారులు అంచనా వేస్తున్నారు.
విద్యార్థులు తమ దరఖాస్తులను ఫిబ్రవరి 3 నుండి మార్చి 16, 2026 వరకు ఆన్లైన్ ద్వారా సమర్పించవచ్చు. భారతదేశంలోని 200 నగరాల్లో 400 కంటే ఎక్కువ కేంద్రాలలో ఈ పరీక్ష జరగనుంది. ఈ సందర్భంగా కామెడ్కె ఎగ్జిక్యూటివ్ సెక్రటరీ డాక్టర్ కుమార్ మాట్లాడుతూ.. పారదర్శకత, నిష్పాక్షికతకు పెద్దపీట వేస్తూ ప్రతిభావంతులైన యువతకు నాణ్యమైన విద్యను అందించడమే తమ లక్ష్యమని పేర్కొన్నారు. కేవలం ప్రవేశ పరీక్షతోనే ఆగకుండా, విద్యార్థులలో నైపుణ్యాలను పెంచేందుకు ‘కామెడ్కె కేర్స్’ పేరుతో ఇన్నోవేషన్ హబ్లను కూడా ఏర్పాటు చేయడం విశేషం.
ఈ ఇన్నోవేషన్ హబ్లు విద్యార్థులకు కేవలం థియరీ మాత్రమే కాకుండా, పరిశ్రమలకు అవసరమైన ప్రయోగాత్మక శిక్షణను అందిస్తున్నాయి. కర్ణాటక అంతటా విస్తరించి ఉన్న 9 హబ్లలో 3D ప్రింటింగ్, రోబోటిక్స్, ఆర్టిఫిషియల్ ఇంటెలిజెన్స్ (AI), మరియు డేటా సైన్స్ వంటి అత్యాధునిక సాంకేతికతలపై శిక్షణ ఇస్తున్నారు. ఇంజనీరింగ్ విద్యలో ఇటువంటి వినూత్న మార్పులు తీసుకువచ్చిన దేశంలోనే మొదటి రాష్ట్రంగా కర్ణాటక నిలిచింది. ఉన్నత చదువుల కోసం సిద్ధమవుతున్న విద్యార్థులు ఈ అవకాశాన్ని వినియోగించుకుని తమ కెరీర్ను ఉన్నతంగా తీర్చిదిద్దుకోవచ్చు.