Kerala Doctor: కేరళలోని కన్నూరులో ‘2 రూపాయల డాక్టర్’గా పేరొందిన డాక్టర్ (Kerala Doctor) ఎ.కె. రాయరూ గోపాల్ కన్నుమూశారు. వృద్ధాప్య సంబంధిత అనారోగ్య సమస్యలతో ఆయన ఆరోగ్యం క్షీణించగా, 80 సంవత్సరాల వయసులో తుది శ్వాస విడిచారు. గత 50 సంవత్సరాలుగా పేదలకు అతి తక్కువ ఫీజుతో వైద్యం అందించిన ఆయన ‘జనతా డాక్టర్’గా ప్రజల హృదయాల్లో నిలిచిపోయారు.
అంకితభావంతో కూడిన వైద్య సేవలు
డాక్టర్ గోపాల్ తమ నివాసమైన ‘లక్ష్మి’లోనే క్లినిక్‌ను ఏర్పాటు చేసుకొని, రోగులకు వైద్యం అందించేవారు. ఆయన ఉదయం 3 గంటలకే క్లినిక్‌ను తెరిచి, రోజంతా రోగులకు సేవలు చేసేవారు. కూలీలు, విద్యార్థులు, నిరుపేదలు ఇలా రోజుకు 300 మందికి పైగా రోగులు ఆయన వద్దకు వచ్చేవారు. అవసరమైన వారికి ఉచితంగా మందులు కూడా ఇచ్చి తన సేవలకు అంకితభావాన్ని చాటుకున్నారు.
ప్రముఖుల సంతాపం
డాక్టర్ గోపాల్ మృతి పట్ల కేరళ ముఖ్యమంత్రి పినరాయి విజయన్ సంతాపం తెలిపారు. 50 సంవత్సరాల పాటు అతి తక్కువ ఫీజుతో వైద్యం అందించిన ఆయన పేదల పాలిట మెస్సీహా అని, ఆయన మరణం రాష్ట్రానికి తీరని లోటని పేర్కొన్నారు. గత ఏడాదిగా ఆరోగ్య సమస్యల కారణంగా ఆయన క్లినిక్‌ను మూసివేయడంతో పేద ప్రజలు తీవ్ర ఇబ్బందులు పడ్డారు. అయినా కూడా ఆర్థిక ఇబ్బందుల వల్ల సహాయకుడిని పెట్టుకోలేక ఆయన క్లినిక్‌ను తిరిగి తెరవలేకపోయారు.
Also Read: Jagadeesh Vs Kavitha : కవిత జ్ఞానానికి నా జోహార్లు – జగదీష్ రెడ్డి కౌంటర్
ఇదే తరహాలో మధ్యప్రదేశ్‌లో
జూలై 5న మధ్యప్రదేశ్‌లోని జబల్‌పూర్‌కు చెందిన డాక్టర్ మునీశ్వర్ చంద్ర డావర్ కూడా కన్నుమూశారు. ఆయన కూడా 14 సంవత్సరాల పాటు కేవలం 2 రూపాయలకు పేదలకు చికిత్స అందించారు. వైద్య వృత్తిని కేవలం డబ్బు సంపాదన కోసమే కాకుండా, ప్రజల సేవ కోసమూ వినియోగించిన ఈ ఇద్దరు మహానుభావుల సేవలు మరువలేనివి. వారి నిస్వార్థ సేవలు ఎందరికో స్ఫూర్తినిస్తాయి.