తెలంగాణ హైకోర్టు ప్రధాన న్యాయమూర్తిగా జస్టిస్ ఉజ్జల్ భుయాన్‌ను నియమిస్తూ కేంద్ర ప్రభుత్వం ఉత్తర్వులు జారీ చేసింది. ప్రస్తుత ప్రధాన న్యాయమూర్తి సతీష్ చంద్ర శర్మను ఢిల్లీ హైకోర్టు ప్రధాన న్యాయమూర్తిగా బదిలీ చేస్తూ నోటిఫై చేసింది.తెలంగాణ హైకోర్టులో అత్యంత సీనియర్ న్యాయమూర్తి అయిన జస్టిస్ భుయాన్ గౌహతి హైకోర్టులో న్యాయమూర్తిగా పనిచేశారు. అక్కడ ఆయన అక్టోబర్ 2011లో నియమితులయ్యారు. 2019 నవంబర్‌లో బాంబే హైకోర్టుకు బదిలీ అయ్యారు. బొంబాయి హైకోర్టులో రెండేళ్లపాటు పనిచేసిన తర్వాత తెలంగాణ హైకోర్టుకు బదిలీ అయ్యారు. నవంబర్ 22, 2021న తెలంగాణ హైకోర్టులో న్యాయమూర్తిగా బాధ్యతలు చేప‌ట్టారు.
రాజ్‌భవన్‌లో రెండు లేదా మూడు రోజుల్లో జస్టిస్ భుయాన్ ప్రమాణ స్వీకారం చేయనున్నారు. కొత్త ప్రధాన న్యాయమూర్తితో గవర్నర్ ప్రమాణ స్వీకారం చేయిస్తారు. ప్రధాన న్యాయమూర్తి ప్రమాణ స్వీకారోత్సవానికి రాష్ట్ర ముఖ్యమంత్రి హాజరుకావాలని ప్రోటోకాల్ ఉంది. దాదాపు నెల రోజుల క్రితం, మే 17న ప్రధాన న్యాయమూర్తి ఎన్‌వి రమణ నేతృత్వంలోని సుప్రీంకోర్టు కొలీజియం వివిధ హైకోర్టుల న్యాయమూర్తులను ప్రధాన న్యాయమూర్తులుగా మరియు ప్రస్తుత ప్రధాన న్యాయమూర్తులను ఇతర హైకోర్టులకు బదిలీ చేస్తూ కేంద్ర ప్రభుత్వానికి ఒక తీర్మానాన్ని పంపింది. తీర్మానాలను ఆమోదించడంలో కేంద్ర ప్రభుత్వం జాప్యం చేసింది. ఆమోదం అనంతరం రాష్ట్రపతి రామ్‌నాథ్‌ కోవింద్‌ ఆమోదం తెలిపారు.