PRAHAAR: పహల్గామ్ ఉగ్రదాడి తర్వాత సరిహద్దు ఉగ్రవాదం, ఉగ్రవాదుల పట్ల కేంద్ర ప్రభుత్వం అత్యంత కఠినమైన వైఖరిని అవలంబించింది. ఉగ్రవాదంపై ‘జీరో టాలరెన్స్’ విధానాన్ని అమలు చేస్తూ కేంద్ర ప్రభుత్వం మొదటిసారిగా ఒక ప్రత్యేక యాంటీ టెర్రర్ పాలసీని విడుదల చేసింది. దీనికి ‘ప్రహార్’ (PRAHAAR) అని పేరు పెట్టారు. ఫిబ్రవరి 23, 2026న కేంద్ర హోం మంత్రిత్వ శాఖ 8 పేజీల ఈ విధాన పత్రాన్ని విడుదల చేస్తూ సంబంధిత విభాగాలు, అధికారులు దీనిని ఖచ్చితంగా పాటించాలని ఆదేశించింది.
ఈ పాలసీ ముఖ్య ఉద్దేశ్యం ఏమిటి?
భారతదేశపు యాంటీ టెర్రర్ పాలసీ ‘ప్రహార్’ ప్రధాన లక్ష్యం నిఘా వర్గాల సమాచారాన్ని సమర్థవంతంగా ఉపయోగించుకుని ఉగ్రదాడులను అడ్డుకోవడం, తక్షణమే తిప్పికొట్టడం. సైబర్ దాడులు, డ్రోన్ల దుర్వినియోగం, డార్క్ వెబ్, క్రిమినల్ హ్యాకర్లు, క్రిప్టో వాలెట్లు, ఎన్క్రిప్షన్ టెక్నాలజీ వంటివి ఉగ్రవాదుల చేతుల్లోకి వెళ్లకుండా ఆపడం. ఇన్ఫ్రాస్ట్రక్చర్, లాజిస్టిక్స్, కెమికల్, బయోలాజికల్, రేడియోలాజికల్, న్యూక్లియర్ మెటీరియల్స్ ఉగ్రవాదులకు అందకుండా నిరోధించడం.
Also Read: ఇది దేవుడికే చేసిన మహా అపచారం : లడ్డూ కల్తీ వ్యవహారం సీఎం చంద్రబాబు తీవ్ర ఆరోపణలు
ఈ విధానంలో భాగస్వాములు ఎవరు?
‘ప్రహార్’ పాలసీలో భాగంగా పోలీస్, ఆర్మీ, NSG, NIA, RAW, IB విభాగాలతో పాటు డాక్టర్లు, లాయర్లు, సైకాలజిస్టులు మరియు సివిల్ సొసైటీని కూడా అనుసంధానిస్తారు. విదేశీ ఇంటెలిజెన్స్ సంస్థలతో సమన్వయం పెంచుకోవడంపై దృష్టి పెడతారు. అల్-ఖైదా, జైష్-ఎ-మహ్మద్, లష్కరే తాయిబా, ISIS వంటి అంతర్జాతీయ ఉగ్రవాద సంస్థల నుండి పొంచి ఉన్న ముప్పును ఎదుర్కోవడానికి, స్లీపర్ సెల్స్ కార్యకలాపాలను అరికట్టడానికి ఈ ఏజెన్సీలన్నీ కలిసి పనిచేస్తాయి.
ప్రహార్ (PRAHAAR) అంటే ఏమిటి?
P – Prevention (నివారణ): ఉగ్రదాడులు జరగకముందే వాటిని అడ్డుకోవడం. యువత ఆన్లైన్ ఉగ్రవాదం వైపు వెళ్లకుండా చూడటం, ఉగ్రవాదులకు నిధులు, ఆయుధాలు అందకుండా చేయడంపై దృష్టి సారిస్తారు.
R – Responses (స్పందన): ఒకవేళ ఉగ్రదాడి జరిగితే అత్యంత వేగంగా స్పందించి తిప్పికొట్టడం. దీనికోసం పోలీస్, NSG, NIA, ఆర్మీ సమన్వయంతో పనిచేస్తాయి.
A – Aggregating (ఏకీకరణ): ఉగ్రవాదానికి వ్యతిరేకంగా అన్ని భద్రతా సంస్థలను ఒకే తాటిపైకి తీసుకురావడం. కేంద్ర, రాష్ట్ర ప్రభుత్వాలు, ఏజెన్సీలన్నీ ఒకే రకమైన SOP (ప్రామాణిక విధానం) పాటిస్తాయి.
H – Human Rights and Law (మానవ హక్కులు- చట్టం): ప్రతి చర్య చట్టానికి లోబడి ఉంటుంది. ఉగ్రవాదాన్ని ఏ మతం లేదా కులంతో ముడిపెట్టరు. చర్యల సమయంలో మానవ హక్కులను గౌరవిస్తారు.
A – Attenuating (తగ్గించడం): ఉగ్రవాదాన్ని ప్రోత్సహించే పరిస్థితులను, తీవ్రవాద భావజాలాన్ని మూలాల నుండే నిర్మూలించడం.
A – Aligning (అంతర్జాతీయ సహకారం): ఉగ్రవాద నిర్మూలనకు ప్రపంచ దేశాల సహకారాన్ని తీసుకోవడం. ఇంటెలిజెన్స్ షేరింగ్, FATF వంటి అంతర్జాతీయ సంస్థల సాయంతో ఉగ్రవాదుల ఏరివేత.
R – Resilience (స్థితిస్థాపకత/పునరుద్ధరణ): దాడులు జరిగినప్పుడు సమాజం,వ్యవస్థలు త్వరగా కోలుకునేలా చేయడం.