ICU Patient: కామారెడ్డి ప్రభుత్వాసుపత్రిలో దారుణ ఘ‌ట‌న‌.. ఐసీయూలో ఉన్న రోగిని కరిచిన ఎలుకలు..!

Safeimagekit Resized Img 11zon

ICU Patient: శనివారం రాత్రి కామారెడ్డి ప్రభుత్వాసుపత్రిలో ఇంటెన్సివ్ కేర్ యూనిట్ (ఐసీయూ)లో కోమాలో ఉన్న ఓ రోగి (ICU Patient) చెవులు, చేతులు, కాళ్లను ఎలుకలు కొరికాయి. కామారెడ్డిలోని హౌసింగ్‌ బోర్డు కాలనీకి చెందిన షేక్‌ ముజీబుద్దీన్‌ రక్తపోటు, మెదడు గడ్డకట్టడంతో గత వారం ప్ర‌భుత్వాసుప‌త్రిలో అడ్మిట్‌ అయ్యాడు. వెంటనే స్పందించిన ఆరోగ్య శాఖ మంత్రి సి.దామోదర రాజనరసింహ విచారణకు ఆదేశించడంతో డ్యూటీ ఆసుప‌త్రిలోని డ్యూటీ డాక్టర్‌, స్టాఫ్‌ నర్సుపై సస్పెన్షన్‌ వేటు వేసి మరో అధికారిని సస్పెండ్ చేశారు.

ఎలుకలను గమనించిన వెంటనే ఆసుపత్రి సిబ్బందికి సమాచారం అందించామని ముజీబుద్దీన్ కుటుంబ సభ్యులు తెలిపారు. ఎలుకలు కోర‌క‌డంతో ఆసుపత్రి సిబ్బంది ప్రథమ చికిత్స చేసి చికిత్స ప్రారంభించారు. కొంతమంది ఇన్ పేషెంట్లు తమ భద్రతకు భయపడి ఆసుపత్రి నుండి వెళ్లిపోయారని నివేదికలు తెలిపాయి. ఎలుకలను పట్టుకునేందుకు బోనులు, స్టిక్కీ ప్యాడ్‌లను ఏర్పాటు చేసినట్లు ఆసుపత్రి సిబ్బంది తెలిపారు.

Also Read: Student Suicides: విద్యార్థుల ఆత్మహత్యలపై చర్చించడమే లేదు: ఆర్ఎస్ ప్రవీణ్ కుమార్

ఈ విషయం తెలుసుకున్న రోగులు మీడియాతో మాట్లాడుతూ.. ఆస్పత్రిలో ఎలుకల బెడద ఎక్కువగా ఉందని తెలిపారు. ఆసుపత్రిలో ఇంతకుముందు మూడు ఎలుకలు కాటు సంఘటనలు నమోదయ్యాయని పేర్కొన్నారు. ఐసీయూ, ఇతర వార్డుల్లో ఎలుకలు కనిపిస్తున్నా అధికారులు పట్టించుకోవడం లేదని ఆరోపించారు.

We’re now on WhatsApp : Click to Join

టీఎస్‌ వైద్య విధాన పరిషత్‌ కమిషనర్‌ డాక్టర్‌ అజయ్‌కుమార్‌ ఆదివారం ఆస్పత్రిని సందర్శించి ఘటనపై ఆరా తీసి ముజీబుద్దీన్‌ కుటుంబసభ్యులతో మాట్లాడారు. కోమాలో ఉన్న బాధితుడి పరిస్థితి నిలకడగా ఉందని వైద్యులు.. కమిషనర్‌కు తెలిపారు. విచారణకు ఆదేశించిన ఆరోగ్య మంత్రి రాజనరసింహ ఆరోగ్య సంరక్షణలో ఎటువంటి లోపాలను సహించబోమని హామీ ఇచ్చారు. ఘటనపై జిల్లా కలెక్టర్ జితేష్ వి.పాటిల్ ప్రభుత్వానికి నివేదిక సమర్పించారు. నివేదిక ఆధారంగా డ్యూటీ మెడికల్ ఆఫీసర్, స్టాఫ్ నర్సుపై వైద్య విద్య డైరెక్టర్ డాక్టర్ త్రివేణి సస్పెన్షన్ వేటు వేశారు. కామారెడ్డి జిల్లా ఆరోగ్య సేవల సమన్వయకర్త ఎస్.విజయలక్ష్మి సేవలను ప్రభుత్వానికి సరెండర్ చేశారు.