విశ్వం గుట్టు చెప్పిన గులకరాయి..మీరు చూసారా ఈ రాయిని ?

Ibpamryd

మాములుగా తీగ లాగితే డొంకతా కదిలినట్టు అనే సామెతను చెబుతూ ఉంటారు. తాజాగా అలాంటి ఘటన ఒకటి చోటు చేసుకుంది. ఈజిప్టులో లభించిన ఒక గులకరాయి విశ్వంలో చోటుచేసుకున్న ఒక భారీ పేలుడుకు సంబంధించిన రహస్యాలను బయటపడుతోంది. కానీ ఈ గులకరాయి అసలు మన సౌరవ్యవస్థకు చెందినదే కాదని,మన సౌరవ్యవస్థ పురుడు పోసుకోవడానికి ముందే ఇది ఏర్పడిందని పరిశోధకులు కచ్చితమైన నిర్ధారణకు రావడం జరిగింది. ఈజిప్ట్ లోని నైరుతి భాగంలో లభించిన ఈ గులకరాయి జొహన్నెస్‌బర్గ్‌ విశ్వవిద్యాలయ పరిశోధకులను విపరీతంగా ఆకట్టుకోవడంతో పాటు విభిన్నంగా కనపడుతూ వారిలో ఆసక్తి రేకెత్తించింది. అయితే ఆ గులకరాయి భూగ్రహానికి చెందిన కాదని, 2013లో ప్రకటించిన విషయం తెలిసిందే.

ఆ తర్వాత రెండేళ్లకు ఇది కనీసం ఇప్పటివరకు అవగాహన ఉన్న ఉల్క లేదా తోకచుక్కలకు కూడా చెందినది కాదని నిర్ధారించగా తాజాగా ఇప్పుడు ఈ రాయి హైపాటియా అనే శిలకు చెందినదని, మన సౌరవ్యవస్థ ఆవల సంభవించిన సూపర్నోవా మాదిరి భారీ పేలుడు కారణంగా ఇది ఏర్పడిందని నిర్ధారణకు వచ్చారు శాస్త్రవేత్తలు. ఆ గులకరాయి కథ విషయానికి వస్తే సూర్యుడి కంటె అయిదు రెట్లు అధికంగా ద్రవ్యరాశి ఉండే ఓ అంతరిస్తున్న నక్షత్రం కారణంగా కొన్ని వేల సంవత్సరాల కిందట ఓ భారీ పేలుడు సంభవించింది. ఈ అనంత విశ్వంలో చోటుచేసుకున్న భారీ పేలుళ్లలో ఇది కూడా ఒకటి అని చెప్పవచ్చు.

అయితే ఈ విస్ఫోటనం సద్దుమణిగిన తరువాత పేలుడు కారణంగా వెలువడిన గ్యాస్‌ అణువులు సమీపంలోని ధూళి కణాలకు అతుక్కోవడం ప్రారంభించాయి. మిలియన్ల సంవత్సరాల తర్వాత, మన సౌరవ్యవస్థ ఉద్భవించడానికి ముందు ఇవి హైపాటియా శిలగా మారాయి. కాలక్రమంలో ఈ మాతృశిల భూమివైపు దూసుకెళ్లడం ఆరంభించింది. భూ వాతావరణంలో దీని ప్రవేశ తాపానికి నైరుతి ఈజిప్ట్‌లోని ద గ్రేట్‌ శాండ్‌ సీ ఒత్తిడి ప్రభావం తోడై ఈ శిల విచ్ఛిన్నానికి, సూక్ష్మ పరిమాణంలో వజ్రాలు ఉద్భవించడానికి దారితీసింది. అలా అలా భూమికి చేరిన ఈ హైపాటియా రాయిలో మన సౌరవ్యవస్థలో ఇప్పటివరకూ ఏ పదార్థంలోనూ కనిపించని నికెల్‌ ఫాస్పైడ్‌ను కనుగొన్నారు. ప్రోటాన్‌ మైక్రోప్రోబ్‌ను ఉపయోగించి, ఈ రాయిలో 15 రకాల విభిన్న మూలకాలు ఉన్నట్టు అత్యంత కచ్చితత్వంతో గుర్తించాను అని జొహన్నెస్‌బర్గ్‌ విశ్వవిద్యాలయ ప్రొఫెసర్‌ జాన్‌ క్రామెర్స్‌ వెల్లడించారు.