Delhi High Court : ట్రాన్స్‌జెండర్ల మరుగుదొడ్ల నిర్మాణానికి 8వారాల గ‌డువు ఇచ్చిన ఢిల్లీ హైకోర్టు

Delhi High Court

దేశ రాజధానిలో ట్రాన్స్‌జెండర్ల కోసం పబ్లిక్ టాయిలెట్ల నిర్మాణానికి ఢిల్లీ హైకోర్టు మంగళవారం ఎనిమిది వారాల గడువు విధించింది. లేని పక్షంలో ఢిల్లీ ప్రభుత్వం, ఎన్‌డిఎంసి సంబంధిత ఉన్నతాధికారులను వ్యక్తిగత హాజరుకు ఆదేశిస్తామని హెచ్చరించింది. ప్రధాన న్యాయమూర్తి సతీష్ చంద్ర శర్మ నేతృత్వంలోని ధర్మాసనం.. నగర పాలక సంస్థ దాఖలు చేసిన స్టేటస్ రిపోర్ట్ ప్రకారం, నిర్మాణ ప్రక్రియ కొనసాగుతున్నదని పేర్కొన్నప్పటికీ, లింగమార్పిడి జనాభా కోసం పబ్లిక్ టాయిలెట్లు నిర్మించలేదని పేర్కొంది. ట్రాన్స్‌జెండర్ల కోసం పబ్లిక్ టాయిలెట్ల నిర్మాణం విషయంలో లింగమార్పిడి వ్యక్తుల (హక్కుల పరిరక్షణ) చట్టాన్ని దృష్టిలో ఉంచుకుని రాష్ట్రం తగిన చర్యలు తీసుకుందని కోర్టుకు తెలియజేస్తూ స్టేటస్ రిపోర్ట్ దాఖలు చేయబడింది. అయితే మరుగుదొడ్లు లేవని స్టేటస్ రిపోర్టు వెల్లడించింది. ఎనిమిది వారాల్లోగా వీలైనంత త్వరగా మరుగుదొడ్లు నిర్మించేలా చూడాలని ప్రభుత్వానికి కోర్టు సమయం ఇచ్చింది.