AP – Telangana: తెలుగు రాష్ట్రాలు ఆంధ్రప్రదేశ్‌, తెలంగాణలకు కేంద్ర ప్రభుత్వం శుభవార్త అందించింది. రోడ్ల అభివృద్ధికి అవసరమైన నిధులను కేటాయించింది. ఈ క్రమంలో ఆంధ్రప్రదేశ్‌కు రూ.498 కోట్లు, తెలంగాణకు రూ.516 కోట్ల నిధులను కేంద్రం విడుదల చేసింది. ఈ నిధులతో రాష్ట్రీయ రహదారులు, ఫ్లైఓవర్ల నిర్మాణం చేపట్టనున్నారు.
ఆంధ్రప్రదేశ్‌లో రోడ్డు అభివృద్ధి ప్రణాళికలు
ఆంధ్రప్రదేశ్‌లో మొత్తం 200.06 కిలోమీటర్ల మేర 13 రాష్ట్ర రహదారులకు కేంద్ర రహదారి మౌలిక వసతుల నిధి (CRIF) నుంచి నిధులు కేటాయించారు. ఇందులో ముఖ్యంగా గుంటూరు – నల్లపాడు రైల్వే మార్గంలో ఉన్న శంకర్ విలాస్ రహదారి ఓవర్‌బ్రిడ్జ్ (RoB) నిర్మాణం కోసం రూ.98 కోట్లు కేటాయించారు. ఈ రహదారి నాలుగు వరుసలుగా నిర్మించబడనుంది, ఇది గుంటూరు పట్టణం ట్రాఫిక్ రద్దీని తగ్గించేందుకు కీలకంగా ఉండనుంది.
తెలంగాణకు కేటాయించిన నిధులు
తెలంగాణలో NH 565లోని నకిరేకల్ – నాగార్జునసాగర్ మధ్య 14 కిలోమీటర్ల పొడవు ఉన్న నాలుగు లేన్ బైపాస్ రహదారి నిర్మాణం కోసం రూ.516 కోట్ల నిధులు కేటాయించారు. ఈ ప్రాజెక్టుతో నకిరేకల్ – నాగార్జున సాగర్ మధ్య కనెక్టివిటీ మెరుగుపడటంతో పాటు, నల్గొండ పట్టణానికి ట్రాఫిక్ రద్దీ తగ్గనుందని అంచనా వేస్తున్నారు.
NH 565 రహదారి ప్రాధాన్యత
తెలుగు రాష్ట్రాలకు కీలకంగా మారిన NH 565 రహదారి, తెలంగాణలోని నకిరేకల్ వద్ద NH 65తో కలసి, నల్గొండ, మాచర్ల, ఎర్రగొండపాలెం, కనిగిరి పట్టణాల గుండా వెళ్లి రెండు రాష్ట్రాల మధ్య రవాణా వ్యవస్థను మెరుగుపరచనుంది. ఈ రహదారి అభివృద్ధితో వాణిజ్య కార్యకలాపాలు పెరిగి, తెలుగు రాష్ట్రాల మధ్య ప్రయాణ సౌలభ్యం మరింతగా మెరుగవుతుంది.
ఇతర రాష్ట్రాలకు కూడా నిధుల కేటాయింపు
ఆంధ్రప్రదేశ్‌, తెలంగాణతో పాటు మహారాష్ట్ర, గోవా వంటి రాష్ట్రాల్లో కూడా రోడ్డు అభివృద్ధికి నిధులు కేటాయించినట్లు రోడ్డు రవాణా, రహదారుల శాఖ మంత్రి నితిన్ గడ్కరీ ప్రకటించారు. ముఖ్యంగా మహారాష్ట్రలో జాతీయ రహదారి 63లో ఉద్గీర్ నుండి దేగలూరు వరకు , అడంపూర్ ఫాటా నుండి సగ్రోలి ఫాటా వరకు రెండు లేన్‌ల రోడ్డు పునరావాసం, అభివృద్ధి కోసం రూ.809.77 కోట్లు విడుదల చేసినట్లు తెలిపారు.
ఈ ప్రాజెక్టులతో మహారాష్ట్రలోని లాతూర్, నాందేడ్ సరిహద్దు జిల్లాలు, తెలంగాణలోని నిజామాబాద్ జిల్లాతో కలవనున్నాయి. ఈ మార్గం పారిశ్రామిక, వ్యవసాయ, వాణిజ్య రంగాలకు సహాయపడటమే కాకుండా, మరాఠ్వాడా, తెలంగాణ ప్రాంతాల ఆర్థిక అభివృద్ధికి కీలకంగా మారనుంది.
Sirimanotsavam : నేడు పైడితల్లి అమ్మవారి సిరిమానోత్సవం.. భారీగా చేరుకుంటున్న భక్తులు..