హైదరాబాద్‌లోని బల్కంపేట ఎల్లమ్మ ఆలయంలో జులై మొదటి వారంలో నిర్వహించే వార్షిక కల్యాణ మహోత్సవాలకు విస్తృత ఏర్పాట్లు చేయనున్నారు. మంగళవారం ఏర్పాట్లపై అధికారుల‌తో మంత్రి త‌ల‌సాని శ్రీనివాస్‌యాద‌వ్ సమీక్షా సమావేశం నిర్వ‌హించారు. జూలై 5న కల్యాణం, జూలై 4న ఎదురుకోలు, జూలై 6న రథోత్సవం నిర్వహించనున్నట్లు మంత్రి త‌ల‌సాని తెలిపారు. ఈ ఏడాది బల్కంపేట ఎల్లమ్మ ఆలయంలో కల్యాణం ఘనంగా నిర్వహించనున్నారు. తెలంగాణ ఆవిర్భవించిన తర్వాత బోనాలు ఘనంగా నిర్వహించడమే కాకుండా అన్ని మతాల పండుగలు ఘనంగా జరిగేలా ముఖ్యమంత్రి కే చంద్రశేఖర్‌రావు హామీ ఇచ్చారని త‌ల‌సాని తెలిపారు. అమ్మ‌వారి కల్యాణాన్ని ప్రత్యక్ష ప్రసారం చేయనున్న‌ట్లు ఆయ‌న పేర్కొన్నారు.
క‌ళ్యాణ స‌మ‌యంలో ఆల‌య ప్రాంగ‌ణంలో ఆరోగ్య శిబిరాల ఏర్పాటు, ఆలయానికి వెళ్లే రహదారుల పునరుద్ధరణ, పారిశుధ్యం, భద్రతా ఏర్పాట్లు, ట్రాఫిక్ మళ్లింపు తదితర ఏర్పాట్లలో భాగంగా భక్తులకు సౌకర్యవంతంగా, సక్రమంగా దర్శనం కోసం బారికేడ్లను కూడా ఏర్పాటు చేస్తారు. పాస్‌లు దుర్వినియోగం కాకుండా నకిలీలు కాకుండా బార్‌కోడ్‌తో కూడిన దర్శన పాస్‌లను జారీ చేయాలని మంత్రి త‌ల‌సాని అధికారులను ఆదేశించారు.