Flight Faces Tech Issue: తమిళనాడులోని తిరుచిరాపల్లి విమానాశ్రయంలో శుక్రవారం సాయంత్రం ఎయిరిండియా విమానం హైడ్రాలిక్స్ విఫలమవడంతో (Flight Faces Tech Issue) కలకలం రేగింది. ఈ విమానంలో 140 మంది ప్రయాణికులు ఉన్నారు. విమానం హైడ్రాలిక్ సిస్టమ్ ఫెయిల్ అయిందని, దీంతో విమానం ల్యాండ్ కాలేదని విమానం పైలట్ ఎయిర్పోర్ట్ అధికారులకు సమాచారం అందించాడు. దీంతో విమానం గంటల తరబడి ఆకాశంలో చక్కర్లు కొడుతూనే ఉంది. అయితే రాత్రి 8:14 గంటల ప్రాంతంలో విమానం సురక్షితంగా ల్యాండ్ అయింది. ల్యాండింగ్తో ఎయిర్పోర్ట్లోని ప్రజలు పైలట్ కోసం చప్పట్లు కొట్టారు.
140 మంది ప్రయాణికులతో కూడిన విమానం తిరుచ్చి విమానాశ్రయం నుండి షార్జాకు సాయంత్రం 5.43 గంటలకు బయలుదేరింది. అయితే కొద్దిసేపటికే సాంకేతిక లోపం ఏర్పడింది. తిరుచ్చి ఎయిర్పోర్ట్ డైరెక్టర్ ప్రకారం.. హైడ్రాలిక్ వైఫల్యం గురించి పైలట్ ఎయిర్ స్టేషన్కు సమాచారం అందించాడు. తిరుచిరాపల్లి నుంచి షార్జా వెళ్లే ఎయిర్ ఇండియా ఎక్స్ప్రెస్ విమానం IX 613 తిరుచిరాపల్లి విమానాశ్రయంలో క్షేమంగా ల్యాండ్ అయింది. DGCA పరిస్థితిని పర్యవేక్షించింది. విమానం సాధారణంగా నడుస్తోంది అని పౌర విమానయాన మంత్రిత్వ శాఖ ఒక ప్రకటనలో తెలిపింది.
ఎయిర్పోర్ట్ డైరెక్టర్ సమాచారం ఇస్తూ.. విమానం గాలిలో ఉన్నప్పుడు ఇంధనాన్ని డంపింగ్ చేయాలనే ఆలోచనను ముందుగా పరిగణించినట్లు చెప్పారు. కానీ విమానం నివాస ప్రాంతంపై తిరుగుతోంది. కాబట్టి అలా చేయడం సరైనదని భావించలేదు. విమానాన్ని బెల్లీ ల్యాండింగ్ చేసే అవకాశం కూడా మాకు ఉంది. ఇందుకు సంబంధించిన సన్నాహాలు కూడా పూర్తయ్యాయి. ఈ సమయంలో అంబులెన్స్లు, రెస్క్యూ బృందాలను సిద్ధంగా ఉంచారు. పైలట్ తెలివితేటలు, విమానాశ్రయంతో సమన్వయం కారణంగా విమానం సురక్షితంగా ల్యాండ్ అయింది. ప్రయాణికులందరూ సురక్షితంగా ఉన్నారు. హైడ్రాలిక్ వ్యవస్థ వైఫల్యానికి గల కారణాలను పరిశీలిస్తున్నారు.
సురక్షితంగా దిగిన కెప్టెన్, సిబ్బందికి అభినందనలు: సీఎం
ల్యాండింగ్ అనంతరం తమిళనాడు సీఎం ఎంకే స్టాలిన్ స్పందిస్తూ.. ఎయిరిండియా ఎక్స్ప్రెస్ విమానం సురక్షితంగా ల్యాండ్ అయిందన్న వార్త వినడం సంతోషంగా ఉందని, ల్యాండింగ్ గేర్ సమస్య వచ్చినట్లు సమాచారం అందిన వెంటనే అధికారులతో ఫోన్లో మాట్లాడినట్లు తెలిపారు. అత్యవసర సమావేశం నిర్వహించి అవసరమైన అన్ని భద్రతా చర్యలను అమలు చేయాలని ఆదేశించారు. అగ్నిమాపక యంత్రాలు, అంబులెన్స్లు, వైద్య సహాయాన్ని మోహరించడం ఇందులో ఉంది. ప్రయాణీకులందరికీ నిరంతరం భద్రత కల్పించాలని, తదుపరి సహాయాన్ని అందించాలని సీఎం జిల్లా కలెక్టర్ను ఆదేశించిన విషయాన్ని గుర్తుచేశారు. సురక్షితమైన ల్యాండింగ్ కోసం కెప్టెన్, సిబ్బందికి నా అభినందనలు అని తెలిపారు.