హైదరాబాద్ నడిబొడ్డున శుక్రవారం రాత్రి దారుణం జరిగింది. ప్రేమపెళ్లి చేసుకున్నాడన్న కక్షతో నీరజ్ పన్వార్ అనే యువకుడిపై నలుగురు వ్యక్తులు కత్తులతో దాడి చేశారు. ఒకేసారి నలుగురు వ్యక్తులు దాడి చేయడంతో నీరజ్ అక్కడిక్కడే మరణించాడు. ప్రేమపెళ్లి చేసుకున్నాడన్న కారణంగా ఈ మధ్యే నాగరాజు అనే యువకుడిని అతడి భార్య సోదరుడు నడిరోడ్డుపై చంపేసిన ఘటన మరవకముందే ఈ తరహాలో నగరంలో రెండో ఘటన జరగడం కలకలం రేపుతోంది. కేవలం 15 రోజుల వ్యవధిలోనే ఇలాంటి ఘటనలు రెండు జరగడంపై నగర జనం వణికిపోతున్నారు.
బేగంబజార్ పరిధిలోని మచ్చిమార్కెట్ లో ఓ యువకుడిపై నలుగురు వ్యక్తులు కత్తులతో విచక్షణారహితంగా పొడిచారు. ఈ ఘటనలో నిందితులు కత్తులతో 20 సార్లు పొడవడంతో బాధితుడు అక్కడిక్కడే మరణించాడు. ఘటన తర్వాత నిందితులు బైక్ పై పరారయ్యారు. సమాచారం తెలుసుకున్న పోలీసులు వివరాలు సేకరించారు. . మృతుడు నీరజ్ పన్వార్ అని తెలిసింది. సంవత్సరం క్రితం ఓ యువతిని ప్రేమ వివాహం చేసుకున్నాడని పోలీసులు విచారణలో తేలింది. అప్పటి నుంచి అతడిపై యువతి కుటుంబం పగ పెంచుకున్నట్లు సమాచారం. ఈ ప్రాథమిక సమాచారంతో షాహినాథ్ గంజ్ పోలీసులు మృత‌దేహాన్ని ఉస్మానియా హాస్పిటల్ కు తరలించారు. ఘటనపై కేసు నమోదు చేసి దర్యాప్తు చేపట్టారు.