Patiala Necklace : రాజకుటుంబానికి దక్కని రూ.230 కోట్ల పటియాలా హారం.. ఆ మోడల్ ఒంటిపై..!

patiala necklace

మనవారికి వజ్రాల హారాలు అంటే ఎక్కడ లేని ప్రేమ. అందులోనూ ఇలాంటి హారం కనిపిస్తే.. కళ్లన్నీ దానిపైనే. దీని అందం కూడా చూపుతిప్పుకోనివ్వని విధంగా ఉంది. అప్పట్లో పంజాబ్ లోని పటియాలాను పాలించిన రాజా భూపేందర్ సింగ్ కు ఈ హారం అంటే చాలా ఇష్టం. ప్రపంచంలోనే ఏడో పెద్ద వజ్రాన్ని ఈ నగలో పొదిగారు. భూమిపై ఇప్పటివరకు లభించిన పసుపు పచ్చ వజ్రాలలో ఇదే పెద్దది కూడా. అలాంటి
ఈ నగ.. తరువాతి కాలంలో చోరీకి గురైంది. మళ్లీ ఇప్పుడు ఆ హారాన్ని పోలిన నగ ఓ ఫ్యాషన్ షో లో కనిపించడంతో.. మళ్లీ ఆ ఆభరణం వార్తల్లోకొచ్చింది.

రాజ కుటుంబం ఎన్ని తరాలయినా సరే ఈ వజ్రాన్ని ధరించేలా ఏర్పాటు చేశారు రాజా భూపేందర్ సింగ్. అందుకే దానిని ఈ నగలో పొదిగారు. ఈ ఆభరణం తయారీ బాధ్యతను కార్టియర్ సంస్థకు అప్పగించారు. ఈ నగను ఐదు వరసల హారంగా తయారుచేశారు. మొత్తం 2,930 వజ్రాలను పొదిగారు. అరుదుగా లభించే కెంపులతోనూ అలంకరించారు. వీటన్నింటి మధ్యలో బాగా హైలెట్ అయ్యేలా.. పసుపు పచ్చ వజ్రాన్ని ఉంచారు. ఈ హారం ఖరీదు ఇప్పటి లెక్కల ప్రకారమైతే దాదాపు రూ.230 కోట్ల ఉంటుంది.

ఇక్కడ ముఖ్యమైన విషయం ఏమిటంటే.. 1948 లో ఈ విలువైన ఆభరణం.. రాజావారి ఖజానాలో కనిపించకుండా పోయింది. తరువాత 1982లో సోత్ బే వేలం సంస్థ ద్వారా వేలానికి వచ్చింది. కాకపోతే హారం లేకుండా కేవలం వజ్రాన్నే వేలానికి పెట్టారు. కొద్దికాలం గడిచిన తరువాత లండన్ లో పురాతన వస్తువులను అమ్మే ఓ షాపులో ఈ వజ్రాల హారంలో కొద్దిభాగం కనిపించింది. ఆ తరువాత ఈమధ్యే న్యూయార్క్ లో జరిగిన ఒక ఫ్యాషన్ షో లో కార్టియర్ బ్రాండ్ అంబాసిడర్ గా ఉన్న ఎమ్మా చాంబర్లీన్ ఒంటిపై పటియాలా హారంలోని చోకర్ తరహా భాగం దర్శనమిచ్చింది.

ఈ హారం సుప్రసిద్ధమైనది అయినా సరే.. భద్రతను ఛేదించి మరీ చోరీ చేశారు. తరువాతి కాలంలో బయటపడ్డ ఆ హారాన్ని కార్టియార్ సంస్థవారే కొనుగోలు చేశారు. కాకపోతే అందులో వజ్రాలు లేకపోవడంతో వాటి స్థానంలో రంగురాళ్లు పొదిగారు. లండన్ లో ప్రదర్శనకు పెట్టారు. ఇప్పుడు మళ్లీ ఈ పటియాలా హారం అందరి దృష్టినీ ఆకర్షిస్తోంది.