తమిళనాడు రాజకీయాల్లో నూతన శక్తిగా ఆవిర్భవించిన తమిళగ వెట్రి కజగం (TVK) పార్టీ చీఫ్ విజయ్ కాస్త గ్యాప్ తర్వాత బహిరంగ సభలో పాల్గొంటున్న నేపథ్యంలో పుదుచ్చేరిలో ఉద్రిక్తత నెలకొంది. ఆ మధ్య కరూర్లో జరిగిన తొక్కిసలాట సంఘటన తర్వాత విజయ్ సభలకు దూరమయ్యాడు. తాజాగా ఈరోజు ప్రజల మధ్యకు వచ్చాడు. దీంతో ఈ సభకు భారీ సంఖ్యలో అభిమానులు, కార్యకర్తలు తరలివచ్చే అవకాశం ఉన్నందున, అధికారులు పుదుచ్చేరిలోని ఉప్పాలంలోని ఎక్స్పో గ్రౌండ్లో కట్టుదిట్టమైన భద్రతా ఏర్పాట్లు చేశారు. అయితే ఎంతటి పకడ్బందీ ఏర్పాట్లు చేసినా, భద్రతా లోపాన్ని సూచిస్తూ ఓ అనూహ్య ఘటన చోటుచేసుకుంది. ఒక వ్యక్తి తుపాకీతో సభా ప్రాంగణంలోకి ప్రవేశించేందుకు ప్రయత్నిస్తూ, పోలీసుల తనిఖీల్లో పట్టుబడ్డాడు. ఈ ఘటనతో భద్రతా సిబ్బంది ఒక్కసారిగా అప్రమత్తమయ్యారు.
Japan Earthquake : ప్రభాస్ ఎలా ఉన్నాడంటూ ఫ్యాన్స్ లో అందోళన
తుపాకీతో పట్టుబడిన వ్యక్తిని పోలీసులు వెంటనే అదుపులోకి తీసుకుని విచారించగా, అతని వివరాలు వెల్లడయ్యాయి. ఆ వ్యక్తిని డేవిడ్గా గుర్తించారు. డేవిడ్ శివగంగై జిల్లా టీవీకే కార్యదర్శి ప్రభుకు వ్యక్తిగత భద్రతా గార్డుగా పనిచేస్తున్నట్లు ప్రాథమిక దర్యాప్తులో తేలింది. రాజకీయ నాయకుల బహిరంగ సభలకు, ముఖ్యంగా ఆయుధాలను తీసుకురావడం అనేది తీవ్రమైన భద్రతా నిబంధనల ఉల్లంఘన. ఈ నేపథ్యంలో, శివగంగై జిల్లా టీవీకే కార్యదర్శి గార్డు వద్ద తుపాకీ ఉండటం, దానితో అతడు సభా ప్రాంగణంలోకి ప్రవేశించేందుకు ప్రయత్నించడం అనేక అనుమానాలకు తావిస్తోంది. అనుమతి లేకుండా, లైసెన్స్ ఉన్నా లేకపోయినా, భారీ జన సమూహం ఉన్నచోట తుపాకీతో ప్రవేశించడం అనేది భద్రతా పరంగా అంగీకారయోగ్యం కాదు. ఈ సంఘటన విజయ్ భద్రతపై, అలాగే బహిరంగ సభల నిర్వహణలో భద్రతా ప్రమాణాలపై అనేక ప్రశ్నలను లేవనెత్తుతోంది.
ఈ సంఘటన విజయ్ బహిరంగ సభ ప్రాముఖ్యతను మరింత పెంచింది. రాజకీయాల్లోకి అడుగుపెట్టిన తర్వాత విజయ్ నిర్వహిస్తున్న ఈ సభకు వేలాది మంది ప్రజలు వస్తుండగా, ఈ తుపాకీ ఘటన అభిమానుల్లో మరియు కార్యకర్తల్లో ఆందోళన కలిగించింది. ఒక వైపు కరూర్ తొక్కిసలాట విషాదం ఇంకా మరువకముందే, మరోవైపు ఈ విధమైన భద్రతా లోపం కనిపించడం ఆందోళనకరం. పోలీసులు డేవిడ్ను అదుపులోకి తీసుకుని, అతడి ఉద్దేశం ఏమిటి, ఆ తుపాకీకి సంబంధించిన సరైన పత్రాలు ఉన్నాయా అనే కోణంలో లోతుగా దర్యాప్తు చేస్తున్నారు. ఈ ఘటన నేపథ్యంలో పుదుచ్చేరి అధికారులు ఎటువంటి అవాంఛనీయ సంఘటనలు జరగకుండా, మిగిలిన సభా కార్యక్రమాన్ని విజయవంతంగా నిర్వహించేందుకు భద్రతను మరింత కఠినతరం చేశారు.