తమిళనాడు అసెంబ్లీ ఎన్నికల ఫలితాల వేళ ఒక విషాదకర సంఘటన చోటుచేసుకుంది. రాజకీయాల్లో తన అభిమాన నటుడు విజయ్ ఎక్కడ ఓడిపోతారో అన్న భయంతో ఒక వీరాభిమాని ప్రాణాల మీదకు తెచ్చుకున్నాడు. ఈ ఘటన కృష్ణగిరి జిల్లాలో కలకలం రేపింది. కృష్ణగిరికి చెందిన కె. మహేంద్రన్ అనే యువకుడు నటుడు విజయ్కు వీరాభిమాని. విజయ్ ‘తమిళగ వెట్రి కళగం’ (TVK) పార్టీని స్థాపించినప్పటి నుంచి మహేంద్రన్ పార్టీలో అత్యంత క్రియాశీలకంగా పనిచేశారు. అయితే, ఓట్ల లెక్కింపు ప్రారంభం కావడానికి కొద్దిసేపటి ముందు విజయ్ ఎన్నికల్లో ఓడిపోతారని కొన్ని వదంతులు మార్కెట్లో వ్యాపించాయి. దీంతో తీవ్ర మనస్తాపానికి గురైన మహేంద్రన్, తన అభిమాన నాయకుడు ఓడిపోతారన్న ఆవేదనను తట్టుకోలేక గొంతు కోసుకుని ఆత్మహత్యాయత్నానికి పాల్పడ్డారు.
రక్తపు మడుగులో మహేంద్రన్.. ఆసుపత్రికి తరలింపు
రక్తపు మడుగులో పడి ఉన్న మహేంద్రన్ను గమనించిన స్థానికులు మరియు తోటి కార్యకర్తలు హుటాహుటిన ఆయనను కృష్ణగిరి ప్రభుత్వ వైద్య కళాశాల ఆసుపత్రికి తరలించారు. ప్రస్తుతం ఆయన పరిస్థితి విషమంగా ఉండటంతో వైద్యులు ఐసీయూ (ICU)లో అత్యవసర చికిత్స అందిస్తున్నారు. కృష్ణగిరి టౌన్ పోలీసులు ఈ ఘటనపై కేసు నమోదు చేసి విచారణ చేపడుతున్నారు. కేవలం రాజకీయ ఓటమి భయంతో ఇంతటి తీవ్ర నిర్ణయం తీసుకోవడం పట్ల స్థానికులు దిగ్భ్రాంతి వ్యక్తం చేస్తున్నారు.
దూసుకెళ్తున్న టీవీకే.. అభిమానులకు నేతల విజ్ఞప్తి
ఒకవైపు మహేంద్రన్ ప్రాణాలతో పోరాడుతుండగా, మరోవైపు కౌంటింగ్ ట్రెండ్స్లో విజయ్ పార్టీ అనూహ్యంగా దూసుకుపోతోంది. తాజా ఫలితాల ప్రకారం విజయ్ తాను పోటీ చేసిన రెండు చోట్లా ఆధిక్యంలో ఉండటమే కాకుండా, పార్టీ కూడా వందకు పైగా స్థానాల్లో ముందంజలో ఉంది. ఈ నేపథ్యంలో టీవీకే నాయకులు స్పందిస్తూ.. అభిమానులు ఎవరూ భావోద్వేగాలకు లోనై ప్రాణాలు తీసుకోవద్దని, ఫలితాలు సానుకూలంగానే వస్తున్నాయని విజ్ఞప్తి చేస్తున్నారు. గెలుపోటములు రాజకీయాల్లో సహజమని, ప్రాణాలు తీసుకోవడం దేనికీ పరిష్కారం కాదని వారు సూచిస్తున్నారు.
