Vice Presidential Election: ఉపరాష్ట్రపతి ఎన్నికల (Vice Presidential Election) బరిలో బీజేపీ నేతృత్వంలోని ఎన్డీఏ సీపీ రాధాకృష్ణన్ను నిలబెట్టగా.. కాంగ్రెస్ నేతృత్వంలోని ఇండియా బ్లాక్ సుప్రీంకోర్టు మాజీ న్యాయమూర్తి బి. సుదర్శన్ రెడ్డిని తమ ఉమ్మడి అభ్యర్థిగా ప్రకటించడంతో ఈ ఎన్నికల పోరు ఆసక్తికరంగా మారింది. ముఖ్యంగా ఇది కేవలం ఒక రాజకీయ పోరు మాత్రమే కాదని, సిద్ధాంతాల మధ్య జరుగుతున్న యుద్ధం అని ఇండియా కూటమి స్పష్టం చేసింది.
బీజేపీ తమిళ వ్యూహానికి ‘సుదర్శన చక్రం’
బీజేపీ తమిళ అభ్యర్థి సీపీ రాధాకృష్ణన్ను బరిలోకి దించి డీఎంకేతో పాటు ఇండియా కూటమిని ఇబ్బంది పెట్టాలని చూసినప్పటికీ.. ఇండియా కూటమి మాత్రం దీనికి ప్రతిగా సుప్రీంకోర్టు మాజీ న్యాయమూర్తి బి. సుదర్శన్ రెడ్డిని నిలబెట్టి వ్యూహాత్మకంగా వ్యవహరించింది. ఈ నిర్ణయంతో ప్రతిపక్షాలు ఒక్కతాటిపై నిలబడటమే కాకుండా, అధికార పక్షం మిత్రపక్షాలను, మద్దతుదారులను కూడా సందిగ్ధంలో పడేసింది.
ఎన్డీఏ అభ్యర్థి సీపీ రాధాకృష్ణన్ తమిళనాడుకు చెందినవారు కాగా, ఇండియా కూటమి అభ్యర్థి బి. సుదర్శన్ రెడ్డి తెలంగాణలోని రంగారెడ్డి జిల్లాకు చెందినవారు. ప్రస్తుతం బీజేపీకి రాజకీయంగా పైచేయి ఉన్నప్పటికీ, బి. సుదర్శన్ రెడ్డిని బరిలోకి దించి కాంగ్రెస్ ప్రతిపక్ష ఐక్యతను చాటిచెప్పడంతో పాటు ఎన్డీఏ మిత్రపక్షాలను కూడా ఇరకాటంలో పెట్టింది.
బి. సుదర్శన్ రెడ్డి రాజకీయాలకు దూరంగా ఉండే ఒక వ్యక్తి కాబట్టే ప్రతిపక్షాలు ఆయనను అభ్యర్థిగా ఎంపిక చేశాయి. కాంగ్రెస్ అధ్యక్షుడు మల్లికార్జున్ ఖర్గే, ఎన్సీపీ అధ్యక్షుడు శరద్ పవార్, ఎస్పీ ఎంపీ ధర్మేంద్ర యాదవ్, డీఎంకే ఎంపీ కనిమొళి, టీఎంసీ ఎంపీ శతాబ్ది రాయ్ వంటి ఇండియా కూటమి నాయకులు సుదర్శన్ రెడ్డిని ఉమ్మడి అభ్యర్థిగా ప్రకటించారు. 2022 ఉపరాష్ట్రపతి ఎన్నికలలో ఓటింగ్కు దూరంగా ఉన్న మమతా బెనర్జీ పార్టీ కూడా ఈసారి పూర్తిగా మద్దతు ఇచ్చింది.
Also Read: Asia Cup 2025: ఆసియా కప్లో సూపర్ ఓవర్ ఉంటుందా? బౌల్ ఔట్ ఉంటుందా?
సుదర్శన్ రెడ్డి పేరుపై అందరి ఏకాభిప్రాయం కుదిరిన తర్వాత.. ఆమ్ ఆద్మీ పార్టీ నుండి టీఎంసీ వరకు అందరూ మద్దతు ఇచ్చారు. టీఎంసీ నాయకుడు డెరెక్ ఓ’బ్రియన్ అరవింద్ కేజ్రీవాల్తో సమావేశమై సుదర్శన్ రెడ్డికి మద్దతు తీసుకున్నారు. దీంతో ఇండియా కూటమి పూర్తిగా ఐక్యంగా కనిపించింది. ఇండియా కూటమి నుండి విడిపోయిన ఆమ్ ఆద్మీ పార్టీ కూడా సుదర్శన్ రెడ్డికి మద్దతు ప్రకటించింది.
ప్రతిపక్షాల ‘సుదర్శన చక్రంలో’ చిక్కుకున్న పార్టీలు
బి. సుదర్శన్ రెడ్డిని అభ్యర్థిగా నిలబెట్టడం చంద్రబాబు నాయుడు, వైఎస్ జగన్ మోహన్ రెడ్డి, కేసీఆర్ వంటి నాయకులను ధర్మసంకటంలో పడేసింది. సుదర్శన్ రెడ్డి తెలంగాణలోని రంగారెడ్డి జిల్లాకు చెందినవారు కాబట్టి ఇది తెలంగాణ, ఆంధ్రప్రదేశ్ రాజకీయ నాయకులను ప్రభావితం చేసే ఒక వ్యూహంగా భావిస్తున్నారు. ప్రస్తుతం ఆంధ్రప్రదేశ్లో టీడీపీ అధికారంలో ఉండగా, వైఎస్ఆర్ కాంగ్రెస్ ప్రతిపక్షంలో ఉంది. తెలంగాణలో బీఆర్ఎస్ ప్రతిపక్షంలో ఉంది. వీరు ఎన్డీఏలోనూ లేరు.., ఇండియా బ్లాక్లోనూ లేరు. కాబట్టి వీరి మద్దతు ఉపరాష్ట్రపతి ఎన్నికలలో కీలకం కానుంది.
ఎన్డీఏ మిత్రపక్షమైన టీడీపీ అధినేత చంద్రబాబు నాయుడు, వైఎస్ఆర్ కాంగ్రెస్ అధినేత వైఎస్ జగన్ మోహన్ రెడ్డి ఇద్దరూ సుదర్శన్ రెడ్డి అభ్యర్థిత్వంపై నిర్ణయం తీసుకోవడంలో ఇబ్బందులు పడుతున్నారు. తెలుగు వ్యక్తిని బరిలోకి దించి ప్రతిపక్షం వారిని ఇరకాటంలో పడేసింది.
తెలంగాణలో ప్రతిపక్ష పార్టీ అయిన బీఆర్ఎస్కు కూడా బి. సుదర్శన్ రెడ్డి అభ్యర్థిత్వం టెన్షన్ పెంచింది. బీఆర్ఎస్ ఎంపీ కేఆర్ సురేష్ మాట్లాడుతూ.. ఇప్పటి వరకు ప్రభుత్వం తీసుకున్న దేశహిత నిర్ణయాలకు మద్దతు ఇచ్చామని, అయితే ఈ ఎన్నికలలో ఎవరికి మద్దతు ఇవ్వాలనే దానిపై ఇంకా నిర్ణయం తీసుకోలేదని అన్నారు. అలాగే, ఒడిశాలో ఇటీవల బీజేడీకి బీజేపీకి మధ్య సంబంధాలు దెబ్బతినడంతో, ఆ పార్టీ కూడా సందిగ్ధంలో పడింది.
ఇండియా కూటమి వ్యూహాత్మక అడుగు
బి. సుదర్శన్ రెడ్డి 2011లో సుప్రీంకోర్టు నుండి పదవీ విరమణ చేశారు. ఇటీవల తెలంగాణలో కాంగ్రెస్ ప్రభుత్వం నిర్వహించిన కుల సర్వే గణాంకాలను విశ్లేషించడానికి ఏర్పాటు చేసిన కమిటీకి ఆయన నాయకత్వం వహించారు. ఈ నేపధ్యంలో ప్రతిపక్షాలు సుదర్శన్ రెడ్డిని సామాజిక న్యాయానికి ప్రతీకగా ప్రచారం చేసే అవకాశం ఉంది. సుదర్శన్ రెడ్డి కర్ణాటకలో కూడా కుల సర్వేలో కాంగ్రెస్ ప్రభుత్వానికి అనధికారికంగా సహాయం చేస్తున్నారు. ఈ నేపథ్యం ద్వారా సామాజిక న్యాయంపై ఆధారపడిన దళిత, ఓబీసీ ఓటర్లను ఆకర్షించేందుకు ప్రతిపక్షాలు ప్రయత్నిస్తున్నాయి.
ఉపరాష్ట్రపతి ఎన్నికలు ఎందుకు ఆసక్తికరంగా మారాయి?
ఉపరాష్ట్రపతి ఎన్నికలలో పార్లమెంట్ ఉభయ సభల సభ్యులు ఓటు వేస్తారు. మొత్తం 782 మంది ఎంపీలలో ఎన్డీఏకు ప్రస్తుతం 418 మంది ఎంపీల మద్దతు ఉంది. విజయం సాధించడానికి అవసరమైన 392 మంది కంటే వారికి 26 మంది ఎక్కువ మద్దతు ఉంది. అయితే 2022 ఉపరాష్ట్రపతి ఎన్నికల తర్వాత రాజకీయ పరిస్థితి మారిపోయింది. ఆంధ్రప్రదేశ్లోని వైఎస్ఆర్ కాంగ్రెస్, బీజేడీ, బీఆర్ఎస్ వంటి పార్టీలు ఎన్డీఏకు దూరంగా ఉన్నాయి. అకాలీ దళ్, ఏఐఏడీఎంకే వంటి పార్టీలతో కూడా బీజేపీ సంబంధాలు దెబ్బతిన్నాయి. దీంతో ప్రతిపక్షాలు గతంలో కంటే బలంగా ఉన్నాయి. ముఖ్యంగా తెలుగు అభ్యర్థిని బరిలోకి దింపడం వల్ల రాజకీయ పరిస్థితి మారే అవకాశం ఉంది.