Rakhi : ప్రతి సంవత్సరం శ్రావణ పౌర్ణమి రోజు భారతదేశం అంతటా సంబరాలు సందడిగా మారుతుంది. కారణం రాఖీ పండుగ, లేదా రక్షాబంధన్. ఇది ప్రధానంగా హిందూ మతానికి చెందిన పండుగగా పరిగణించబడుతుందే గానీ, వాస్తవానికి ఇది మతపరమైన సరిహద్దులను దాటి ప్రతి కుటుంబంలో బంధాలను, ప్రేమను బలపరిచే వేడుకగా మారింది. పురాణాల ప్రకారం, రాఖీ పండుగకు ఆధారమైన కథల్లో ఇంద్రుడి కథ ప్రాముఖ్యం సంతరించుకుంది. రాక్షసులతో యుద్ధంలో ఉన్న ఇంద్రుడి రక్షణ కోసం అతని భార్య శచిదేవి, శ్రీకృష్ణుడిని ఆశ్రయించింది. శ్రీకృష్ణుడు ఇచ్చిన దారాన్ని శచి ఇంద్రుడి మణికట్టుకి కట్టి, అతని రక్షణ కోసం ప్రార్థించింది. ఈ సంఘటనే రాఖీ పండుగకు బీజాంశంగా మారింది. ఈ ఆచారం నేటికీ కొనసాగుతూ, ప్రతి ఏడాది రక్షాబంధన్ రోజున సోదరీమణులు తమ అన్నలకు లేదా తమ్ముళ్లకు రాఖీ కట్టి, వారి రక్షణ కోసం ఆశీర్వదిస్తారు. పరస్పరం చేయగా, అన్నలు జీవితాంతం సోదరీని రక్షించాలన్న వాగ్దానంతో సంతృప్తి చెందుతారు.
Read Also: Indian Army : అమెరికాతో వాణిజ్య ఉద్రిక్తతల నడుమ ఆర్మీ కీలక పోస్ట్..
హిందూమతంతో పాటు, సిక్కు, జైన మతాలకు చెందినవారు కూడా ఈ పండుగను ఎంతో శ్రద్ధగా జరుపుకుంటారు. విశేషంగా జైన సమాజంలో, ఈ పండుగకు ప్రత్యేక ప్రాధాన్యం ఉంది. ఒక విశ్వాసం ప్రకారం, ఒక రాఖీ రోజు విశ్ణుకుమార్ అనే మహానుభావుడు 700 మంది జైన సన్యాసులను రక్షించాడని నమ్ముతారు. అందువల్ల జైన సమాజంలో రక్షాబంధన్ ఒక పవిత్ర పండుగగా విలసిల్లుతోంది. ఇంతటితో కథ ఆగదు. ముస్లిం, క్రైస్తవ మతాల ప్రజలు కూడా తమ స్నేహితులు, తోబుట్టువులతో రాఖీ పండుగను జరుపుకుంటూ, తమ మధ్య ప్రేమను పంచుకుంటున్నారు. ఇది రాఖీ పండుగను మతపరమైన సరిహద్దులకు అతీతంగా చేస్తూ, భారతీయ సంస్కృతి ఐక్యతకు ప్రతిరూపంగా నిలిపింది.
ఈ పండుగ మన దేశంలో నేటికీ సోదర – సోదరీమణుల మధ్య అనుబంధాన్ని మరింత బలపరుస్తూ, కుటుంబం అనే బంధాన్ని గట్టిగా కట్టిపడేస్తోంది. వ్యస్త జీవనశైలిలో తీరిక లేకుండా ఉండే తోబుట్టువులు, ఈ రోజు ఒకే చోట కలుసుకొని తమ అనుబంధాన్ని ఘనంగా జరుపుకుంటారు. అన్నా-చెల్లెలు, అక్కా-తమ్ముళ్లు చిన్ననాటి జ్ఞాపకాలను పంచుకుంటూ, తమ ప్రేమను మరోసారి వ్యక్తం చేస్తారు. ఇలా రాఖీ పండుగ ద్వారా మనం మన సంస్కృతిని, బంధాలను, కుటుంబ విలువలను నిలబెట్టుకుంటున్నాం. ఇది కేవలం ఒక సాంప్రదాయంగా కాకుండా, ప్రేమ, రక్షణ, కుటుంబ ఐక్యతకు చిహ్నంగా రూపాంతరం చెందింది. ఒక రాఖీ ధారం మాత్రమే కాదు… అది ఒక నమ్మకం, ఒక బంధం, ఒక బాధ్యత.
ఇకపోతే.. ఈ ఏడాది రక్షాబంధన్ పండుగ ఆగస్టు 9న వచ్చింది. దేశవ్యాప్తంగా ఈ పండుగను ఘనంగా జరుపుకుంటారు. అయితే భారతదేశంతో పాటు ఇతర దేశాలలో, ఇతర మతాల వారు కూడా దీన్ని జరుపుకుంటారు. భారతదేశంలోనే కాదు ఈ పండుగను నేపాల్‌లోనూ ఘనంగా జరుపుకుంటారు. పాకిస్తాన్ , మారిషస్ వంటి ఇతర దేశాలలో కూడా రాఖీ పండుగ జరుపుకుంటారు. పాకిస్తాన్ , మారిషస్ వంటి ఇతర దేశాలలో హిందువులతో పాటూ అక్కడుకున్న కొందరు ముస్లింలు కూడా రాఖీ పండుగ జరుపుకుంటారు. మారిషస్ లో భారతీయ మూలాలకు చెందిన ప్రజలు భారీగా నివసిస్తున్నారు. అక్కడ రక్షాబంధన్ వేడుక వైభవంగా జరుపుకుంటారు.
Read Also: Marri Janardhan Reddy : బిఆర్ఎస్ ను వీడే ప్రసక్తే లేదు – మర్రి జనార్దన్ రెడ్డి